رەسەيگە جالعا بەرىلگەن تايسويعان سىناق الاڭى ەلىمىزگە قايتارىلادى
پرەزيدەنت سىناق الاڭىن پايدالانۋ ءتارتىبى تۋرالى كەلىسىمگە وزگەرىستەر مەن تولىقتىرۋلار ەنگىزۋ تۋرالى جارلىققا قول قويدى.
بۇل ءسۇيىنشى حاباردى پارلامەنت سەناتىنىڭ دەپۋتاتى سارسەنباي ەڭسەگەنوۆ اتىراۋ مۇناي جانە گاز ينستيتۋتى ۇجىمىمەن كەزدەسۋدە جەتكىزدى.
سارسەنباي ەڭسەگەنوۆ، ق ر پارلامەنتى سەناتىنىڭ دەپۋتاتى:
ق ر پرەزيدەنتى 2015 - جىلدىڭ اقپان ايىنىڭ باسىندا 629 ۇشۋ- سىناق الاڭىنا رەسەيگە جالعا بەرىلگەن اتىراۋ وبلىسى جەرلەرىنىڭ كورديناتتارىن ماقۇلداپ، وعان ۇكىمەت اتىنان قول قويۋعا ق ر قورعانىس مينيسترلىگىنە وكىلەتتىك بەردى. ق ر قورعانىس مينيسترلىگى مەن ر ف قورعانىس مينيسترىلىگى كەلىسىلگەن، ەلباسىنىڭ جارلىعىمەن ماقۇلدانعان وسى وزگەرىستەرگە قۇجاتتى رەسىمدەپ قول قويادى. بۇدان كەيىن ۇكىمەت قاۋلىسىمەن پارلامەنت قاراۋىنا ەنگىزىلەدى. زاڭ بولىپ قابىلدانۋى كەرەك. مەن قورعانىس ءمينيسترىنىڭ ورىنباسارى ساپاروۆ وقاسپەن سويلەستىم، ناۋرىز ايىندا قول قويۋ جوسپارلانىپ وتىر دەدى.
ايتا كەتەيىك، تايسويعان اۋماعى 1949 - جىلدان باستاپ اسكەري سىناق الاڭىنا اينالدى. مۇنداعى يادرولىق سىناقتار 1952 - جىلى باستالدى. 1966-1977 - جىلدار ارالىعىندا 24 مارتە يادرولىق قارۋ سىناعى جاسالعان. جارىلىستىڭ جەردەگى تەرەڭدىگى 500 مەترگە دەيىن جەتكەن. بۇل اۋماقتى ۇشۋ سىناعى رەتىندە پايدالانۋ قازاقستان جانە رەسەي تاراپتارى 1995 - جىلى 20 - قاڭتاردا ماسكەۋدە كەلىستى. قورعانىس مينيسترلىگىنىڭ اقپاراتى بويىنشا، 2000 - جىلدان باستاپ قازىرگى ۋاقىتقا دەيىن تايسويعان اسكەري پوليگونىندا قارۋ- جاراق سىناعى جۇرگىزىلمەگەن.
پوليگون اۋماعى 749 مىڭ شارشى شاقىرىم جەردى الىپ جاتىر. ونىڭ اۋماعىنا قىزىلقوعا اۋدانىنىڭ ۇشتەن ءبىرى، يندەر اۋدانىنىڭ سارىماي، شاعىل، بۇقار اۋىلدارى جانە اتىراۋ قالاسىنىڭ اقجار ەلدى مەكەنى كىرەدى. مىڭ جارىم ادام پوليگون اۋماعىندا تۇرىپ كەلەدى.
ەندى سول اۋماقتىڭ 600 مىڭ شارشى شاقىرىمى ەلىمىزگە قايتارىلادى. قوس تاراپتىڭ كەلىسىمىنەن سوڭ 50 دەن استام شارۋا قوجالىعى، «قاز مۇناي گاز» ۇلتتىق كومپانياسىنا قاراستى ۋاز، قوڭدىباي كەن ورىندارى مەن ماتين بىرىككەن كاسىپورنىنىڭ جۇمىسىنا جان بىتىرمەك. سارسەنباي ەڭسەگەنوۆتىڭ ايتۋىنشا، رەسەيلىك تاراپ ءاۋ- باستا قايتارىلاتىن جەردىڭ ورنىنا باسقا اۋماق ءبولۋدى سۇراعان. «ءبىراق قازاقستان تاراپى ول ءوتىنىشتى قاناعاتتاندىرمادى. قازىر قوسىمشا جەر ءبولۋ ماسەلەسى كۇن تارتىبىندە جوق»، - دەدى سەناتور ەڭسەگەنوۆ.
«استانا» ارناسى
