بەس قازاقستاندىق الەمنىڭ ەڭ باي ادامدارىنىڭ تىزىمىنە ەنىپ وتىر
رەيتينگكە قازاقستاندىقتاردىڭ ىشىندە بەس ازامات - بولات وتەمۇراتوۆ، ءاليجان يبراگيموۆ، تيمۋر مەن دينارا قۇلىبايەۆتار، ۆلاديمير كيم كىرىپ وتىر.
ەڭ باي قازاقستاندىق دەپ ق ر تەننيس فەدەراتسياسىنىڭ پرەزيدەنتى، كاسىپكەر بولات وتەمۇراتوۆ تانىلدى. 57 جاستاعى كاسىپكەردىڭ بايلىعى شامامەن 2,6 ميلليارد دوللارعا تەڭ. بىلتىر ونىڭ قاراجاتى 2,2 ميلليارد دوللارعا تەڭ بولاتىن. جالپى تىزىمدە وتەمۇراتوۆ 714- ورىندا تۇر. وتەمۇراتوۆتىڭ ەڭ ءبىرىنشى ءىرى جوباسى - «ا ت ف بانك» كومپانياسى بولدى. ونى كاسىپكەر يتاليانىڭ UniCredit كومپانياسىنا ساتىپ، مول تابىس تاپتى. كەيىن ميكرونەسيەلەر بەرەتىن Kassa Nova مەن كاسىپكەرلەرگە قىزمەت ىستەيتىن ForteBank بانكتەرىن اشتى. بىلتىر ميللياردەر «سامۇرىق- قازىنا» قورىنان تەمىربانك جانە اليانس بانك بانكتارىنىڭ بەلگىلى كولەمدەگى اكسيالارىن ساتىپ العان بولاتىن. سونىمەن قاتار بولات وتەمۇراتوۆتىڭ يەلىگىندە قازاقستاندا جانە وزگە دە ەلدەردە قوناقۇيلەر جەلىسى بار.
قازاقستاندىق ميللياردەرلەردىڭ ەكىنشى ورنىن الەمنىڭ ەڭ ءىرى وندىرۋشىلەردىڭ ءبىرى ENRC كومپانياسىنىڭ اكسيونەرى جانە «ەۋرازيالىق بانك» ا ق ءاليجان يبراگيموۆ يەلەندى. كەن ءوندىرۋ ارقىلى بايىعان كاسىپكەردىڭ بار بايلىعى 2,2 ميلليارد دوللارعا باعالانعان. 2014 - جىلى بۇل كورسەتكىش 1,7 ميلليارد دوللار شاماسىندا بولدى. Forbes ءتىزىمىنىڭ جالپى رەيتينگىسىندە ول 847- ورىندا.
ال قۇلىبايەۆتار جانۇياسى 894- ورىنعا جايعاسقان. ولاردىڭ ءارقايسىسىندا 2,1 ميلليارد دوللاردان بار. بىلتىر ولاردىڭ بايلىعى 1,8 ميلليارد دوللارعا باعالانعان بولاتىن. جۋرنال ولاردىڭ قىزمەت سالاسىن بانك ءىسى دەپ كورسەتكەن. دينارا قۇلىبايەۆا قازاقستاننىڭ حالىق بانكى كومپانياسىنىڭ اكسيونەرى ەكەنى بەلگىلى. تيمۋر قۇلىبايەۆ بولسا، قازاقستاننىڭ مۇناي- گاز سەكتورىندا ءىرى ويىنشىلاردىڭ ءبىرى. ول رەسەيدىڭ ەڭ ءىرى مۇناي- گاز كومپانياسى - «گازپرومنىڭ» ديرەكتورلار كەڭەسىنىڭ مۇشەسى، «KAZENERGY» قاۋىمداستىعىنىڭ، قازاقستان كاسىپكەرلەر پالاتاسىنىڭ پرەزيديۋم باسشىسى جانە قازاقستان بوكس فەدەراتسياسىنىڭ پرەزيدەنتى بولىپ تابىلادى.
مىس ماگناتى ۆلاديمير كيم 1,8 ميلليارد دوللارمەن كوش سوڭىن تۇيىندەدى. ول جالپى رەيتينگتە 1054 - ورىندا تۇر. قازىرگى ۋاقىتتا ۆ. كيم KAZ Minerals كومپانياسىنىڭ (بۇرىنعى «قازاق مىس») ماجوريتارلى اكسيونەرى.
اۆتور: جاسۇلان جولدىبايەۆ
