قازاققا كەلىن بولعان جاپون قىزى

وتاندىق بالەت الەمىندە وزىندىك ورنى بار ءبيشى قازىر الەمدىك دەڭگەيدەگى ساحنالاردان شاقىرتۋ الىپ جاتىر. ءبىراق ول ەشقايدا كەتكىسى كەلمەيدى.

«جاپون كەلىن» اتانعان سەرينا نەلىكتەن قازاقستاندى باقىتىم دەيدى؟ ول ەلىمىزگە قالاي كەلدى؟ جاستايىنان بيگە قۇمار سەرينانىڭ ارمانى تۋعان جەرى وكيناۆادا ەمەس، وقۋىن وقىعان سانكت- پەتەربۋرگتا دا ەمەس، قازاقستاندا ورىندالدى.

ونىڭ ەلگە كەلۋىنە ورىس بالەت اكادەمياسىندا ساباق بەرگەن قازاق قىزى «الەمدىك جيزەل» التىناي اسىلمۇراتوۆا ىقپال ەتتى. ول كەزدە قازاقستان تۋرالى از بىلەتىن سەرينا سوندا دا كەلۋگە شەشىم قابىلدايدى.

سەرينا سۋناگاۆا، «استانا وپەرا» تەاترىنىڭ سوليسى:

- ءبىرىنشى مەن الماتىعا كەلدىم. ىشتەي قوبالجىعانىم راس. مەن ءۇشىن قازاقستان - مۇلدەم باسقا الەم. ءبىراق مەنى وتە جاقسى كۇتىپ الدى. اۋەجايدان باستاپ تەك كۇلىمدەگەن ادامدار كەزدەستى. بۇگىنگە دەيىن اينالامداعى ادامداردان، ارىپتەستەرىمنەن تەك جاقسىلىق كوردىم. مەن قازاقستاندى وتە قاتتى جاقسى كورەمىن.

سەرينا قازاقستانمەن ءومىرىنىڭ ەڭ ءماندى دە قىزىقتى كەزەڭدەرىمەن بايلانىستىرادى. سەبەبى مۇندا ول وتباسىن قۇرىپ، انا اتانادى. قازاق پەن جاپوندى قۇدا ەتكەن ءبيشى قىز قازىر سالت- ءداستۇرىمىزدىڭ ءبارىن بىلەدى.

سەرينا سۋناگاۆا، «استانا وپەرا» تەاترىنىڭ سوليسى:

- مەن قازاقشا ەتتى جاقسى كورەمىن. قوناقتار كەلسە، مەرەكەلەر بولسا دايىنداۋعا تىرىسامىن. ماعان وتە ۇنايدى.

اباي اتىنداعى ۇلتتىق وپەرا جانە بالەت تەاترىندا ءبىراز جىل جۇمىس ىستەگەن سەرينانى استاناعا تۇرسىنبەك نۇرقاليەۆ ارنايى شاقىرادى. ول سەرينانىڭ جۇمىسقا دەگەن جاۋاپكەرشىلىگىن، اكتەرلىك شەبەرلىگىن بىردەن بايقاعان.

الەمدىك ساحنا ءۇشىن جاپوندىق بالەرينالار ەكزوتيكاعا اينالعان. سوندىقتان سەريناعا شەتەلدە جۇمىس ىستەۋ تۋرالى ۇسىنىستار ءجيى تۇسەدى. الايدا جاپون ارۋى، قازاقتىڭ كەلىنى قازاقستاننان كەتكىسى كەلمەيتىنىن ايتادى. كەرىسىنشە، بولاشاقتا «استانا وپەرا» تەاترىن ءوزى تۋعان قالا وكيناۆاعا، ودان ارى بۇكىل الەمگە تانىستىرسام دەگەن ارمانى بار.

www.24.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى