گۇلنۇر ورازباي قىزى. جالاڭاش قىز - سورلى قىز
قىتايدان كەلگەن قانداسىمىز گۇلنۇر ورازباي قىزى - قازىر الماتى وبلىسى تالدىقورعان قالاسىندا تۇرادى.
ولەڭدى، قاسيەتتى پوەزيانى جانىنا سەرىك ەتىپ، جاڭا قىرىنان كورىنە باستاعان گۇلنۇردىڭ الدا كەلە جاتقان، ايەلدەردىڭ، انالارىمىزدىڭ مەرەكەسىنە وراي ءبىر توپ ولەڭىن نازارلارىڭىزعا ۇسىنعاندى ءجون كوردىك.
انا جالعىز
كىم بولساڭدا جالعىز اناڭ بار سەنىڭ،
اناڭدى كۇت، بولسا بويدا ار سەنىم.
جۇكتىلىكتەن ومىرتقاسى ءۇزىلىپ،
سەنى تۋدى سورعالاتىپ قان تەرىن.
سوسىن سەنى قاتتى قىسىپ باۋرىنا،
ءنار السىن دەپ ەمشەك سالدى اۋزىڭا.
تاڭنىڭ كوبىن تىك وتىرىپ اتىردى،
تاعى سەنى وڭگەرىپ- اپ الدىنا.
ءوستىپ ءجۇرىپ، سەنى ءتاي-ءتاي باستىردى،
الدىڭدا ىلعي جىلى - جۇمساق اس تۇردى.
بەسكە دەيىن بەسىك جىرمەن الديلەپ،
التى جاستا ساۋاتىڭدى اشتىردى.
ەل قاتارلى ءىشىپ- جەسىن، كيسىن دەپ،
سەنى ويلادى جۇمىر جۇرەك دۇرسىلدەپ.
تەلىم بولىپ ەڭبەك ەتتى تىنىمسىز،
دەنساۋلىعى سىر بەرسەدە بىرتىندەپ.
تاباننان سىز، توبەدەن كۇن وتكىزدى.
ءوزىن قويشى، ايتەۋ سەنى جەتكىزدى،
جاپ-جاس اناڭ وسىلايشا قارتايدى،
شاشتى قىراۋ، اجىم تورلاپ بەت ءجۇزدى.
سويتكەن اناڭ سەنەن بۇگىن نە كوردى،
ال سەن بولساڭ كورسەتپەيسىڭ توبەڭدى.
ساعان ساقتاپ قولعا تۇسكەن اسىلىن،
سەن كەلەر دەپ كوسەگەسى كوگەردى.
جۇلىپ تاستاپ تابانداعى شوگىرىن،
قورعا اناڭنىڭ ەندى قالعان ءومىرىن.
ارقالاپ- اپ بارماساڭدا مەككەگە،
اۋىرتپاساڭ ۇلكەن ولجا كوڭىلىن.
اناما
كىم مەنى سەنەن ارتىق كۇتىمدەگەن؟
مەن سەنىڭ ادام بولعام كۇشىڭمەنەن.
انا جان بويىڭداعى قاسيەتتى،
ماعان دا ءسىڭىرىپسىڭ سۇتىڭمەنەن.
كوز ىلمەي اتىرساڭدا جارىق تاڭدى،
بىلمەپسىڭ شارشاعان مەن جالىققاندى.
مەن ءۇشىن قابىرعاڭدى قايىستىرىپ،
مەن ءۇشىن تالدىرعانسىڭ ومىرتقاڭدى.
مەن ءۇشىن شوگىر تەسىپ تابانىڭدى،
اق شالدى-اۋ قارا ماقپال سامايىڭدى.
كەشىرگەن ازابىڭنىڭ ايعاعىنداي،
اجىمدەر ايمالادى اجارىڭدى.
قارتايا بەر، ولمەسەڭ بولدى ماعان،
سەرپىلىپ سەنى كورسەم سەرگىپ الام.
انالىق بورىشىڭدى سەن وتەدىڭ،
قارىزدار بولدى ساعان ەندى بالاڭ.
قىزىڭ مۇندا كەرەمەت مۇددەدە ءجۇر،
تىلەگىڭدى جالعاستى تىلەنە ءبىل.
التى قىردىڭ استىندا جاتسامداعى
اق ءسۇتىڭدى اقتاۋعا سۇرەم ءومىر.
ءبىز - قىزدارمىز
ءبىز قىزدارمىز قيلى- قيلى ادامدارمىز،
ەلدىڭ كوركى بولۋعا جارالعانبىز.
بىرەۋ تاپتاپ وتەتىن ءبىر شوق گۇلمىز،
ال بىرەۋلەر اسا الماس قامالدارمىز.
ءبىز قىزدارمىز قىزىققا قۇمار ەلمىز،
جىلاپ كەتسەك كوز جاسى بۇلاق ەلمىز.
كۇلىپ كەتسەك كۇلكىمىز تيىلمايتىن،
جانارىنان نۇر شاشقان شۋاق ەلمىز.
ءبىز قىزدارمىز تۋلاعان جۇرەكتەرمىز،
ىستىق قۇشاق، اق مامىق بىلەكتەرمىز.
قاتۋلانساق قارىسىپ قاباعىمىز،
قارلى داۋىل سوقتىرار ءبىر وكتەمبىز.
ءبىز قىزدارمىز اكەنىڭ ماقتانىمىز،
انالاردىڭ ايالاپ باققانىمىز.
بالالاردىڭ باقىتتى اناسىمىز،
جارىمىزدىڭ باعالاپ تاپقانىمىز.
ءبىز قىزدارمىز وتتارمىز جالىن ۇشقان،
اققۋلارمىز ايدىندى جانى قۇشقان.
شىڭعا بىتكەن شىنارمىز ماڭگى جاسىل،
سارعايامىز سارعايساق ساعىنىشتان.
ءبىز قىزدارمىز ەلىكتەي ەركەلەرمىز،
سىمباتىنا سىن جۇرمەس كوركەم ەلمىز.
نازىكتىگىن ەشكىمدە ولشەي الماس،
ءبىز ەجەلدەن تاۋسىلماس ەرتەك ەلمىز.
جالاڭاش قىز - سورلى قىز
بوتا كوز، نايزا كىرپىك، قالام قاستار،
اي ماڭداي، الما مويىن كىلەڭ جاستار.
قۇلاڭ شاش، قۇلىن ءمۇسىن، قىپشا بەلدەر،
ءسوزىمنىڭ سالماعى بار ساعان تاستار.
بارىڭدە ادەمىسىڭ اي مەن كۇندەي،
جۇرگەن جوق كوركىڭدى ەشكىم كورمەي، بىلمەي.
عاجايىپ سۇلۋلىعىڭ عارىپ بولدى،
ساي ەتىپ سىمباتىڭا كيىم كيمەي.
قىز دەگەن قىزعالداقتاي سيلى شاعىڭ،
كىمگە تاڭسىق كىندىكپەن قۇيمىشاعىڭ.
جالاڭاشتىق اپارار ارسىزدىققا،
اشقانى جامان ىرىم قىز قۇرساعىن.
جات كوزگە كورمە بولدى- اۋ جاس
شىنارىم،
نارەستەڭ ءنار الاتىن قوس بۇلاعىڭ.
سان ەتتى سازاندايىن سالقىلداتىپ.
كورمەگە ايلاندىردىڭ ءتوستى ءبارىڭ.
جوقشىلىق جۇدەتكەندەي ارىپ- اشىپ،
الشاڭدادىڭ اۋرەتتىڭ ءبارىن اشىپ.
قۇرت، شىبىن ۇيمەلەگەن ساسىق ەتتەي،
كارى- جاس بولدى ىرجاڭداپ ءبارى عاشىق.
دەمەيمىن ورانىپ ال ، قىمتانىپ ال،
قىزدىڭ دا قىزعا لايىق ءبىر ءسانى بار.
انالار ەسەر كوشكە قىزىڭدى ەرتپە،
ۇلتپىز عوي ۇلاعاتتى ۇرپاعى بار.
گۇلنۇر ورازباي قىزى.
