قازاقستاندىقتار رەسەيدەن ازىق-تۇلىكتى توننالاپ تاسىدى
نوۆو سىبىر وبلىسىنىڭ فەرمەرلەرى قازاقستاننان كارتوپ جەتكىزۋگە ۇلكەن تاپسىرىس العانىن مالىمدەدى. رەسەيلىك ءونىمنىڭ باعاسى رۋبل باعامىنىڭ تومەندەۋىنە بايلانىستى قازاقستانداعى باعاعا قاراعاندا 8-10 رۋبلگە (24-30 تەڭگەگە) ارزان. جەلتوقسان مەن قاڭتار ايلارىندا جەرگىلىكتى ەكى كومپانيانىڭ ءوزى قازاقستانعا 250 توننا كارتوپ جىبەردى. الايدا اقپاندا باعانىڭ كوتەرىلۋىنە بايلانىستى سۇرانىس تا ازايدى. دەگەنمەن قازاقستاندىقتار سول كومپانيالاردىڭ بار كارتوبىن تۇگەل ساتىپ الدى. «80 تونناداي كارتوپ قالدى. كارتوپتىڭ بارلىعى تاسىپ الىندى. ساتاتىن تۇك جوق. مەنىڭ تانىستارىمدا دا ەشتەڭە جوق»، - دەيدى فەرمەرلىك شارۋا قوجالىعىنىڭ باسشىسى يگور ۆويتەنكو. ەندى نوۆو سىبىر وبلىسىندا كارتوپتىڭ كوكتەمگى تاپشىلىعى مەن باعانىڭ ءوسۋى كۇتىلىپ وتىر.
رۋبل باعامىنىڭ تومەندەۋىنە بايلانىستى قازاقستاندىقتار ازىق-تۇلىكتىڭ وزگە دە تۇرلەرىن جاپپاي ساتىپ الدى. سۇلى مەن قاراقۇمىق جارماسى ۇلكەن سۇرانىسقا يە بولدى. قاراقۇمىقتىڭ كەلىسى 55 رۋبلدەن (165 تەڭگە) ساتىلدى. الايدا قازاقستاندىق وندىرۋشىلەر باعانى تۇسىرگەننەن كەيىن دۇرلىكپە سۇرانىس تا توقتادى.
«قازاقستاندىقتار سول جاعالاۋدا ءبارىن كوتەرىپ ساتىپ الدى، تولماچيەۆسكي قويماسىن تولىق ساتىپ اكەتتى... نوۆو سىبىردە باعاسى جاعىنان سۇلى جارماسى جاقسى ساتىلدى. ونىڭ 370-380 تونناسى تاسىپ الىندى. قاراقۇمىقتىڭ 200 تونناعا جۋىعى «كەتتى»، ال ۋاتىلعان بۇرشاق «ۇشتى»، - دەيدى كاسىپكەر ستانيسلاۆ لەسكوۆسكي.
رۋبل باعامىنىڭ تومەندەۋى رەسەيدىڭ سيىر ەتىن دە تارتىمدى ەتتى. كەيبىر مالىمەتتەرگە قاراعاندا، قازاقستاندىقتار ەتتى توپتاماسىمەن، كولەمى 200 دەن 2 مىڭ كەلىگە دەيىن ساتىپ اكەتكەن. قانت تا جەكە ساتىپ الۋشىلاردىڭ نازارىنا ىلىكتى. الايدا رەسەيلىك ءونىمنىڭ سۇرانىسىن مولدوۆادان اكەلىنەتىن ارزان قانت تومەندەتتى. سونىمەن قاتار، قۇراق قانتىن ءوندىرۋشى قازاقستاندىق كاسىپورىندار دا باعانى ءتۇسىردى. الايدا ساتۋشىلار ەگەر رۋبلدىڭ باعامى وزگەرمەيتىن بولسا، دۇرلىكپە سۇرانىس قايتا كەلەدى دەپ كۇتىپ وتىر.
tengrinews.kz
