امەريكادان استاناعا جەتكەن التىن قىران

كورمە بارىسىندا جاقىندا ا ق ش- تىڭ نيۋ-يورك قالاسىندا وتكەن بايقاۋدا «قالا كورىنىستەرى» نوميناتسياسى بويىنشا جەڭىپ العان «التىن قىران» مەدالى تابىستالدى. كورمەگە سۋرەتشىنىڭ «قالا كورىنىستەرى» اتالىمى بويىنشا سالىنعان جيىرماعا جۋىق تۋىندىسى ونەرسۇيەر قاۋىمنىڭ نازارىنا ۇسىنىلدى.

ەسكە سالا كەتەيىك، جەڭىس كاكەن ۇلى جاقىندا نيۋ-يورك سۋرەتشىلەر وداعىنىڭ ۇيىمداستىرۋىمەن وتكەن حالىقارالىق ارت-جوباسىندا «Golden еagle» («التىن قىران») التىن مەدالىن جەڭىپ العان بولاتىن. بۇل حالىقارالىق كورمەگە ا ق ش، كانادا، ۇلى بريتانيا، فرانسيا، گەرمانيا، رەسەي، قىتاي، ارگەنتينا، كولۋمبيا، ەكۆادور، ماكاو، جاپونيا، وڭتۇستىك كورەيا، قازاقستان، قىرعىزستان، وزبەكستان، يزرايل، چەحيا، سلوۆاكيا سياقتى ەلدەردەن 1500 سۋرەتشىنىڭ ەڭبەگى قويىلعان. وتانداسىمىزدىڭ ونەرى باعالانىپ، وسى سايىستا توپ جارىپ شىقتى.

سونداي-اق سۋرەتشى كورمە بارىسىندا ەلورداداعى بالالار كوركەم سۋرەت مەكتەبىنە 50 گرافيكالىق جۇمىستارىن سىيعا تارتتى.

«بۇل - بىزگە بەرىلگەن ۇلكەن سىيلىق. ءبىزدىڭ مەكتەبىمىزدە جەڭىس كاكەن ۇلىنىڭ جۇمىستارى بار. ال بۇل سۋرەتتەر ءبىزدىڭ وقۋشىلارىمىزعا ساباق بارىسىندا قاجەت بولاتىنى ءسوزسىز. جەڭىس كاكەن ۇلىن جۇلدەسىمەن قۇتتىقتايمىز. بۇل جۇلدە ءبىزدىڭ مەكتەپتىڭ بالالارىنا دا «جۇعىستى بولسىن» دەگەن نيەتپەن، مىنا تەڭدەسسىز سىيلىقتى قۋانا-قۋانا قابىلدايمىن»، - دەپ العىسىن ءبىلدىردى بالالار مەكتەبىنىڭ ديرەكتورى يسەنوۆا گۇلزيا جاعىپار قىزى.

ايتا كەتەيىك، قازاقستان سۋرەتشىلەر وداعىنىڭ مۇشەسى، ق ر مادەنيەت قايراتكەرى، پرەزيدەنتتىك ستيپەنديا يەگەرى جەڭىس كاكەن ۇلى 1965-جىلى الماتى وبلىسىندا دۇنيەگە كەلگەن.

1988-جىلدان بەرى ەلىمىزدەگى كورمەلەرگە، سونداي-اق ا ق ش، گەرمانيا، تۇركيا ەلدەرىندە كورمەلەرگە قاتىسقان. 2000-جىلعى «مادەنيەتتى قولداۋ جىلى» بەلگىسىنىڭ اۆتورى. قازاقتىڭ بەينەلەۋ الەمى، قازاق سۋرەتشىلەرىنىڭ شىعارماشىلىق بولمىسى تۋرالى پۋبليتسيستيكالىق ەڭبەكتەرى ەنگەن «اق زەر» اتتى جيناقتىڭ اۆتورى. 200 گە جۋىق كىتاپتىڭ مۇقاباسىن بەزەندىرىپ، جارىققا شىعارعان.

الماتى، استانا قالالارىندا جەكە كورمەلەر ۇيىمداستىرىپ تۇرادى. كارتينالارى مەملەكەتتىك ءا. قاستەيەۆ اتىنداعى ونەر مۋزەيىندە، قازىرگى زامان ونەرى مۋزەيىندە، پرەزيدەنتتىك مادەنيەت ورتالىعىندا ساقتاۋلى. ەلىمىزدىڭ جانە شەتەلدەردىڭ (مولدوۆا، گەرمانيا، تۇركيا) جەكە كارتينا جيناۋشىلار قورىندا دا سۋرەتتەرى بار.

سونداي-اق 2009-جىلى تۇركيادا وتكەن سۋرەتشىلەردىڭ حالىقارالىق كورمەسىندە تۇركيا پرەزيدەنتى ابدوللا گۇل مىرزاعا تۇركىسوي-دىڭ اتىنان سۋرەتشى جەڭىس كاكەن ۇلىنىڭ «اماسيا» اتتى كارتيناسى سىيعا تارتىلعان بولاتىن.

 گۇلدەن وسپانوۆا

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى