الەم اپتا ىشىندە: «يسلام مەملەكەتى» سودىرلارى باعا جەتپەس كونە جادىگەرلەردى تالقانداۋدا
«وسكار» سىيلىعىن تابىس ەتۋگە ارنالعان 87- شارا
وتكەن جەكسەنبىدە الەمدىك قوعامداستىق كينەماتوگرافيا سالاسىنداعى باستى وقيعالاردىڭ ءبىرى لوس- اندجەلەستە «وسكار» سىيلىعىن تابىس ەتۋدىڭ 87- سالتاناتتى شاراسىن تاماشالادى. اعىمداعى جىلى شوۋدى تانىمال امەريكاندىق اكتەر، ءانشى ءارى سيقىرشى نيل پاتريك حارريس جۇرگىزدى. ەستە بولسا، ول وتكەن جىلى «توني» سىيلىعىن تابىس ەتۋ شاراسىن، سونىمەن بىرگە 2 رەت «ەممي» تەلەۆيزيالىق سىيلىعىن تابىستاۋ سالتاناتىن جۇرگىزگەن بولاتىن.
كوپشىلىك كۇتكەندەي، جىلدىڭ ۇزدىك فيلمى بولىپ مەكسيكاندىق رەجيسسەر الەحاندرو گونسالەس ءينياريتۋدىڭ «بەردمەن» تۋىندىسى تانىلدى. مەكسيكالىق «دولبي» كينوتەاترىنىڭ ساحناسىنا 3 مارتە كوتەرىلىپ، ۇزدىك رەجيسسۋرا، بىرەگەي سەناري اتالىمدارىندا دا «وسكار» سىيلىعىن يەلەندى.
جىلدىڭ ۇزدىك اكتەرى «ۆسەلەننايا ستيۆەنا حوكينگا» فيلمىندە باستى ءرولدى سومداعان ەددي رەدمەين اتانسا، ۇزدىك اكتريسا اتالىمىندا «ۆسە ەشە ەليس» كارتيناسىنا تۇسكەن دجۋلياننا مۋر جەڭىسكە جەتتى.
ەكىنشى جوسپارداعى ۇزدىك ءرولدى ورىنداعانى ءۇشىن بەرىلەتىن سىيلىق دجەي كەي سيمونس («ودەرجيموست» ) پەن پاتريسيا اركەت («وتروچەستۆو») تابىستالدى.
ال «ۇزدىك دەرەكتى فيلم» اتالىمىندا رەجيسسەر لورا پويتراستىڭ ا ق ش بارلاۋ قىزمەتىنىڭ بۇرىنعى قىزمەتكەرى ەدۆارد سنوۋدەنگە ارنالعان «گراجدانين چەتىرە» اتتى جۇمىسى ۇزدىك دەپ تانىلدى.
اعىمداعى جىلى «ۇزدىك تولىق مەتراجدى مۋلتفيلم» اتالىمىن ىرىكتەۋدە توسىن جايتتار ورىن الدى دەسەك تە بولادى. ويتكەنى، الدىن الا بولجامدار قيىس كەتىپ، بۇل ساناتتاعى باس جۇلدە Walt Disney Animation Studios تۇسىرگەن «گورود گەرويەۆ» مۋلتفيلمىنە بەرىلدى. ال «ۇزدىك قىسقا مەتراجدى مۋلتفيلم» اتالىمىندا ادام مەن ءيتتىڭ دوستىعى جايىندا سىر شەرتەتىن «پير» تۋىندىسى «وسكار» سىيلىعىن الدى.
«سەلما» فيلمىندە ورىندالعان مارتەن ليۋتەر كينگ جايىنداعى «گلوريا» ءانى التىن مۇسىنشەگە يە بولسا، ۇزدىك شەتەلدىك فيلم اتالىمىندا پولياك رەجيسسەرى پاۆل پاۆليكوۆسكيدىڭ «يدا» تۋىندىسى «وسكار» سىيلىعىنا لايىق دەپ تانىلدى.
«يسلام مەملەكەتى» سودىرلارى كونە جادىگەرلەردىڭ تالقانىن شىعاردى
بەيسەنبى كۇنى «يسلام مەملەكەتى» توبى سودىرلارىنىڭ يراكتىڭ سولتۇستىگىندەگى موسۋل قالاسىنداعى مۋزەيدە كونە جادىگەرلەردى تالقانداۋى بەينەلەگەن بەينەجازبا عالامتوردى شارلاپ كەتتى.
بەينەجازبادا جيھادشىلار كونە ءمۇسىندى جەرگە قۇلاتىپ، ونى بالعا مەن درەلدىڭ كومەگىمەن كۇل- تالقانىن شىعاردى. اتالعان جادىگەر ءبىزدىڭ عاسىرىمىزعا دەيىنگى IX- VII عاسىرعا تيەسىلى اسسيريا ءداۋىرىنىڭ قۇندى ەسكەرتكىشى بولاتىن ءارى يۋنەسكو-نىڭ دۇنيەجۇزىلىك مادەني مۇرالار تىزىمىنە دە الىنعان ەدى.
تالقاندانعان جادىگەرلەر قاتارىندا ادام بەيىندى قاناتتى بۇقا - شەدۋ بەينەلەنگەن ءبىزدىڭ داۋىرىمىزگە دەيىنگى IX عاسىرداعى باعا جەتپەس شۋمەرلىك داۋىرگە تيەسىلى ءمۇسىن دە بار. اتالعان مۋزەيدەگى كوللەكسيالارمەن جەتە تانىس مامانداردىڭ ايتۋىنشا، بۇدان بولەك وسىدان 3 مىڭ بۇرىن جاسالعان مۇسىندەر دە تالقاندالعان.
تاراتىلعان بەينە ماتەريالدا تالقاندالعان جادىگەرلەر «جالعان پۇتتار» ەكەندىگى ايتىلىپ، سول ءۇشىن راديكالدار ولاردىڭ كوزدەرىن قۇرتقاندىعى جان- جاقتى باياندالعان. ال ماماندار ولاردىڭ تۇپنۇسقا جادىگەرلەر ەكەندىگىن ءارى الەمدىك مادەنيەت ورنى تولماس شىعىنعا ۇشىراعاندىعىن ايتىپ، قىنجىلىس بىلدىرۋدە.
ايتا كەتەرلىگى، «يسلام مەملەكەتى» باقىلاۋىنا كوشكەن ايماقتا شامامەن 2 مىڭ ارحەولوگيالىق ەسكەرتكىش بار. ولاردىڭ قاتارىنداعى بىرەگەي قۇندى كىتاپتاردى جيھادشىلار يلام ىلىمىنە قايشى كەلەدى دەگەن سىلتاۋمەن جويىپ تا جىبەرگەن.
ماسەلەن، ولار موسۋل قالاسىنىڭ ورتالىق كىتاپحاناسىن جانە موسۋل ۋنيۆەرسيتەتىنىڭ كىتاپحاناسىن توناپ، ورتەپ جىبەرگەن. 10 مىڭعا جۋىق توم كىتاپ جويىلعان. ولاردىڭ قاتارىندا مادەنيەتكە، فيلوسوفياعا، اراب تاريحىنا قاتىستى وتە سيرەك كەزدەسەتىن كىتاپتار مەن جۇزدەگەن مانۋسكريپتتەر بار.
دەگەنمەن دە، ءبىرقاتار باتىس بۇقارالىق اقپارات قۇرالدارىنىڭ اقپاراتىنا قاراعاندا سيريا مەن يراكتان زاڭسىز شىعارىلعان جادىگەرلەر ەۋروپالىق جانە ازيالىق ەلدەردە وتەتىن اۋكتسيونداردا ساۋداعا ءتۇسىپ وتىرادى. ال ساتىلىمنان تۇسكەن قارجى لاڭكەستىك ءىس- قيمىلداردى قارجىلاندىرۋعا جۇمسالۋدا.
اۆتور: مارلان جيەمباي
