قاجىلىققا تەگىن اپارامىز دەپ جيناپ الىنعان ءتولقۇجاتتار وزگە ماقساتتاردا پايدالانىلۋى مۇمكىن - ق ر ءدىن ىستەرى كوميتەتى
ق ر مادەنيەت جانە سپورت مينيسترلىگىنىڭ ءدىن ىستەرى كوميتەتى ينتەرنەت جەلىسى ارقىلى ساۋد ارابياسى كورولدىگىندەگى مەككە جانە ءمادينا قالالارىنا تەگىن قاجىلىق ۇيىمداستىرۋدى ۇسىناتىن بەلگىسىز توپتاردىڭ قىزمەتتەرىنە الدانىپ قالۋىڭىز مۇمكىن ەكەندىگىن ەسكەرتەدى.
بىرىنشىدەن، ەلىمىزدەگى قاجىلىق جۇمىستارى قازاقستان مۇسىلماندارى ءدىني باسقارماسى (ق م د ب) ارقىلى ساۋد ارابياسى تاراپىنان جىل سايىن ارنايى بولىنەتىن كۆوتا نەگىزىندە جۇزەگە اسىرىلادى.
قاجىلىقتى ۇيىمداستىرۋمەن تىكەلەي ق م د ب بەكىتكەن تۋريستىك كومپانيالار اينالىسادى. جالپى، ءبىزدىڭ ەلىمىزدە ق م د ب ارقىلى قاجىلىق ءراسىمدى وتكىزۋگە تەگىن كۆوتا بولىنەتىنى جانە ق م د ب بەكىتكەن فيرمالاردىڭ مۇنداي جارناما تاراتاتىنى تۋرالى اقپارات بولعان جوق.
ال قانداي دا ءبىر جەرگىلىكتى نەمەسە شەت ەلدىك كومپانيالار ارنايى بولىنەتىن كۆوتاسىز قاجىلىق ساپاردى ۇيىمداستىرۋى مۇمكىن ەمەس.
ەكىنشىدەن، ازاماتتاردى قاجىلىققا تەگىن اپارامىز دەپ الدىن الا جيناپ الىنعان ءتولقۇجاتتار وزگە ماقساتتاردا پايدالانىلۋى، قازاقستاندىقتار وسىنداي الاياقتىق ارەكەتتەردىڭ سالدارىنان زارداپ شەگۋى مۇمكىن.
وسىعان وراي، قاجىلىققا بارۋعا نيەت بىلدىرگەن ازاماتتار بەلگىسىز ادامداردىڭ نەمەسە ۇيىمداردىڭ الداۋىنا ءتۇسىپ قالماۋلارى ءۇشىن ق م د ب- نىڭ باسپا ءسوز قۇرالدارىندا تىزىمدەرى بەكىتىلگەن تۋريستىك كومپانيالارعا حابارلاسقاندارى ءجون. وسى رەتتە قاجىلىققا بارۋعا نيەتتەنگەن ءاربىر ازاماتتىڭ تىزىمدەرى بەكىتىلگەن كومپانيالارعا ءتولقۇجاتىن ءوز قولىمەن اكەلىپ وتكىزگەندەرى دۇرىس.
جالپى، ءارتۇرلى «تەگىن» شاقىرتۋلارعا ساقتىقپەن قاراپ، كيەلى جەرلەرگە قاجىلىققا بارۋدى ۇيىمداستىراتىن كومپانيالاردى تاڭداۋعا ۇلكەن جاۋاپكەرشىلىكپەن قاراعان ابزال.
