سىرداريا وزەنىندە ۇرلەمەلى سۋ توسپاسىنىڭ قۇرىلىسى باستالدى - فوتو
بۇگىن اۋىل شارۋاشىلىعى مينيسترلىگى سۋ رەسۋرستارى كوميتەتىنىڭ ءتوراعاسى يسلام ابىشيەۆ پەن ايماق باسشىسى قىرىمبەك كوشەربايەۆ شيەلى اۋدانىنداعى ۇرلەمەلى سۋ توسپاسىنىڭ قۇرىلىس جۇمىستارىمەن تانىستى. بۇل تۋرالى وبلىستىق اكىمدىكتىڭ باسپا ءسوز قىزمەتى حابارلادى.
«جوبانىڭ جالپى قۇنى 1 ميلليارد 400 ميلليون تەڭگەنى قۇرايدى. جاڭادان سالىنىپ جاتقان ۇرلەمەلى سۋ توسپاسى ارقىلى اۋداندا 27 مىڭ گەكتار جەر سۋلاندىرىلادى، ديقاندار قاجەتتى داقىلدارىن ورنالاستىرىپ، مەجەلەگەن ءونىمىن الا الادى. بۇل جوبانى تەز ارادا ىسكە اسىرۋداعى باستى ماقسات توقتاعۇل سۋ قويماسىنداعى سۋ كولەمى از. ياعني، تامىز ايىنىڭ ىشىندە كوپتەگەن ەگىستىككە سۋ اياعى جەتپەي ديقاندار قيىندىققا تاپ بولادى. ەلباسىنىڭ تاپسىرماسىنا سايكەس قازىرگى قيىن- قىستاۋ كەزدە ەگىستىكتى سۋسىز قالدىرماۋ ماقساتىندا بەرىلگەن جۇمىستاردى اتقارىپ جاتىرمىز»، - دەدى ي. ابىشيەۆ.
توقتاعۇل سۋ قويماسىنداعى سۋدىڭ كولەمى وتكەن جىلمەن سالىستىرعاندا 2,5 ەسەگە ازايعانىن ەسكەرسەك، بۇل جوبا اۋداننىڭ ەگىس القاپتارىن سۋ تاپشىلىعىنان الىپ شىعاتىن بىردەن ءبىر جول. سۋارۋ ماۋسىمى باستالعانعا دەيىن نىسان قۇرىلىسى اياقتالادى دەپ جوسپارلانۋدا. ول ءۇشىن 100 دەن استام تەحنيكا جۇمىلدىرىلىپ، ەلىمىزدىڭ تۇكپىر- تۇكپىرىنەن بىلىكتى ماماندار تارتىلعان.
شيەلى اۋدانىندا 27 مىڭ گەكتار ەگىس القابى بار. ەگىستىك جەرلەردىڭ بيىككە ورنالاسۋىنان جاز ايلارىندا كوپتەگەن ەگىستىككە سۋ اياعى جەتپەي ديقاندار قيىندىققا تاپ بولادى. اۋىل تۇرعىندارى اۋدانداعى ەگىندىك سۋدىڭ تاپشىلىعى شەشىلەتىندىگىنە ءدان ريزا. ەگەر سۋ توسپاسى ىسكە قوسىلسا، تاعى دا ەگىس كولەمىن ۇلعايتۋ جوسپارلارىندا بار. ي. ابىشيەۆ جاڭا تەحنولوگيا قۇرىلىستى 3 اي مەرزىمدە بىتىرۋگە مۇمكىندىك بەرەدى دەيدى.
ايتا كەتەيىك، ءدال وسىنداي ۇرلەمەلى سۋ توسپاسى وتكەن جىلى جاڭاقورعان اۋدانىندا دا ىسكە قوسىلعان بولاتىن. سۋ توسپاسى تولىق قۋاتتىلىعىندا جۇمىس ىستەگەن كەزدە 1,5 ميلليارد تەكشە مەتر سۋ ۇنەمدەۋگە بولادى. ەكى سۋ توسپاسى جاڭاقورعان مەن شيەلىدەگى 60 مىڭ گەكتارعا جۋىق ەگىس القابىن تولىق سۋمەن قامتاماسىز ەتۋگە مۇمكىندىك بەرەدى.
اۆتور: ەلۋباي اۋەزوۆ 
