قىزىلوردادا نۇرجان تولەنديەۆتەن اۋمايتىن جاس ءارتىس تۇرادى
بۇل تۋرالى tengrinews.kz ءتىلشىسى «اقمەشىت اپتالىعى» گازەتىنە سىلتەمە جاساپ حابارلايدى.
ەلىمىزگە بەلگىلى ونەر ادامىنا سىرت كەلبەتى اۋمايتىن ازاماتتىڭ اتى- ءجونى - قايرات ابجاليەۆ. ول 1993 - جىلى قىزىلورداعا قاراستى تاسبوگەت كەنتىندە تۋعان.
باسىلىمعا بەرگەن سۇحباتىندا جاس ونەرپاز مانشۇك مامەتوۆا اتىنداعى قىزىلوردا گۋمانيتارلىق كوللەدجىنەن اكتەر ماماندىعى بويىنشا ءبىلىم العانىن ايتتى. قازىرگى ۋاقىتتا ول نارتاي بەكەجانوۆ اتىنداعى قازاق مۋزىكالىق دراما تەاترىنىڭ ءارتىسى بولىپ جۇمىس ىستەيدى.
قايرات نۇرجان تولەنديەۆكە جەتىنشى سىنىپتا وقىپ جۇرگەن كەزىنەن بەرى ەلىكتەگەن. «العاشىندا ونىڭ ازىلدەرىن كورىپ، كەيىن قايتالاپ، بەرتىن كەلە ۇقساي باستادىم. ۇقساستىق دەپ وتىرسىز، مەنىڭ سويلەۋ مانەرىم، ءتۇر- سيپاتىم ۇقسايدى. ءتىپتى، ونى نۇرجان اعامىز دا ايتتى»، - دەدى ول. سونىمەن قاتار، ونەردەگى اعاسى قايراتتىڭ ونەرىن تاماشالاپ، جاقسى دەپ باعالاعاننان كەيىن اعالىق اقىل- كەڭەسىن دە بەرىپتى.
«پاروديا جاساعان وزىمە ۇنايدى، - دەيدى ابجاليەۆ، - الدىمەن ەلباسىمىزعا، ءابساتتار قاجى دەربىسالىگە، يمانعالي تاسماعامبەتوۆكە، ونەر يەلەرى ۋاليبەك ابدىرايىموۆكە، نۇرجان تولەنديەۆكە، انشىلەردەن مەدەۋ ارىنبايەۆقا، مەيرامبەك بەسبايەۆقا، نۇرلان ەسپانوۆقا، زاتتىبەك كوپبوسىنوۆقا، قايرات نۇرتاس پەن قايرات تۇنتەكوۆكە، سىرىم يسابايەۆقا جانە «مەنىڭ اتىم قوجا» اتتى فيلمدەگى قوجاعا پاروديا جاسايمىن. ال نازىك جاندىلاردان جانار ايجانوۆاعا پاروديا جاساپ ءجۇرمىن».
ەسكە سالا كەتەيىك، بۇعان دەيىن قىتايدان بەلگىلى ءانشى مەيرامبەك بەسبايەۆتىڭ «سىڭارى» تابىلعانى حابارلانعان ەدى. داۋىسى دا، ءتۇر- سيپاتى دا مەيرامبەك بەسبايەۆتان اۋمايتىن ءانشىنىڭ اتى- ءجونى - باقىتكەلدى مۇقاش ۇلى. ول دا ونەر جولىن تاڭداپ، ونەردەگى اعاسىنىڭ اندەرىن اينىتپاي سالادى.
