پرەزيدەنتتىك سايلاۋعا كوممۋنيستەر ءوز وكىلىن مىندەتتى تۇردە ۇسىناتىن بولادى - ۆ. كوساريەۆ
«بۇگىن پارتيا بيۋروسى سەزدىڭ وتەتىن كۇنىن بەلگىلەيدى. سەز بارىسىندا پرەزيدەنتتىككە ۇمىتكەر كىم بولاتىنىن جانە ونى قاشان تاعايىندايتىنىمىز تالقىلانادى. ونى وسى اپتادا جينالاتىن دەلەگاتتار شەشەدى. سەز كەلەسى اپتادا ءوتۋى ىقتيمال. ارينە، بىزدەن كانديدات بولادى. ءبىراق ونىڭ كىم بولاتىنىن ءالى انىقتاعان جوقپىز. بىزدىڭ ارامىزدا ۇمىتكەرلەر كوپ، سوندىقتان ىشىمىزدە ءالى ىرىكتەۋ بولاتىنى انىق»، - دەدى ول تىلشىلەردىڭ ساۋالىنا جاۋاپ قايىرۋ كەزىندە.
«ءبىز وسىناۋ ساياسي شاراعا قاتىسپاساق، ساياسي پارتيا بولماس ەدىك. ەلدىڭ ساياسي ومىرىندەگى ەلەۋلى وقيعادان تىس قالعىمىز كەلمەيدى. سەبەبى، پارتيا ءوز قاتارىنىڭ باسەكەگە قابىلەتتىلىگىن انىقتاپ، حالىقتىڭ الەۋمەتتىك ماسەلەلەرىن شەشۋگە اتسالىسۋى ءتيىس. ويتكەنى سايلاۋدا مۇنداي ماسەلەلەر وتە ءتيىمدى شەشىلىپ جاتادى. ءبىزدىڭ پارتيا بيلىككە كەلۋگە تالپىناتىن پارتيا. سايلاۋ - پارتيامىزدىڭ باعدارلامالىق ماقساتتارىن ورىنداۋعا مۇمكىندىك بەرەدى. جوعارى ورىنعا ءۇمىتىمىز بار. بىزدە بىرنەشە كانديدات بار. سايلاۋدا كانديدات بولاتىنى انىق. قازىر ۇمىتكەرلەردىڭ اتىن ايتا المايمىن. ازىرگە 4 ۇمىتكەر بار»، - دەپ اتاپ ءوتتى ول.
اۆتور: جاسۇلان جولدىبايەۆ
