سپورتشىلار بيۋجەتتەن قاراجات سۇراماي، گەننادي گولوۆكين مەن قانات يسلام سياقتى وزدەرى اقشا تابۋى كەرەك

«الەمنىڭ بارلىق ەلدەرىندەگى كاسىبي فۋتبول كلۋبتارى قاراجاتتى وزدەرى تابادى. ولار بىزدەگى سياقتى بالالار سپورتىنا ارنالعان اقشانى تارتىپ المايدى، كەرىسىنشە، مەكتەپتەر مەن ۇيىرمەلەرگە جاستار سپورتىن دامىتۋعا كومەكتەسەدى. ولار ناعىز كاسىپقويلار! بىزدە دە وندايلار بار. مىسالى، گەننادي گولوۆكين - ناعىز كاسىپقوي. ول بيۋجەتتەن قاراجات المايدى، ۇلتتىق كومپانيالاردان اقشا سۇرامايدى. دەگەنمەن بۇل ادامدى كۇللى الەم بىلەدى جانە ول ەلىمىزدىڭ كوك تۋىن بيىككە كوتەرىپ ءجۇر.

سول سياقتى قانات يسلام دا كاسىپقوي سپورتشى. ول دا ەشكىمنەن اقشا سۇراماي-اق ەلىمىزدىڭ جالاۋىن جەلبىرەتۋدە. ال فۋتبول كوماندالارى، سونىمەن قاتار ولاردىڭ قۇرامىنداعى شەتەلدىك لەگيونەرلەر ءۇشىن بالالار سپورتىن دامىتۋعا ارنالعان بيۋجەت قاراجاتى كوپتەپ جۇمسالۋدا. ولار كاسىپقوي ەمەس. ولاردى مۇعالىمدەر مەن دارىگەرلەر سياقتى بيۋجەت قىزمەتكەرلەرى دەۋگە بولادى، ءبىراق جالاقىلارى ولاردان 10 ەسە كوپ»، - دەدى ازات پەرۋاشەۆ.

ونىڭ ايتۋىنشا، بۇگىنگى كۇنى جاستاردىڭ قىزىعۋشىلىعىنا يە سپورت تۇرلەرىن دامىتۋ قاجەت. ولاردى دەنە شىنىقتىرۋ ساباقتارىنا ەنگىزۋ قاجەت. مۇنداي سپورت تۇرلەرىنە بوكس، كۇرەس، اۋىر اتلەتيكا جانە باسقا دا بىرنەشە ءتۇردى جاتقىزۋعا بولادى.

«دەگەنمەن، جەرگىلىكتى بيۋجەتتەردىڭ ساراپتاماسى ءبىرقاتار ديسپروپورتسيالاردى كورسەتىپ وتىر. ماسەلەن، ەلىمىزدەگى بارلىق اكىمدىكتەر 2015-جىلعا كۇرەستى دامىتۋعا 3,2 ميلليارد تەڭگە بولگەن، بوكسقا - 1,5 ميلليارد تەڭگە، اۋىر اتلەتيكاعا جارتى ميللياردقا جەتپەيتىن قاراجات بولگەن. ال بيۋجەتتى تۇزەتۋدەن كەيىن دە ەڭ كوپ قاراجات - 14 ميلليارد تەڭگە فۋتبول كلۋبتارىن قارجىلاندىرۋعا بولىنگەن. ياعني ەۋروپا چەمپيوناتىنا ىرىكتەۋ توبىندا ارتىنان ساناعاندا ەكىنشى ورىن العان فۋتبولعا ءبىزدىڭ سپورت باسقارمالارى بوكس، كۇرەس جانە اۋىر اتلەتيكا ۇشەۋىن قوسقانداعى بولگەن قاراجاتتان 3 ەسە كوپ اقشا جۇمساپ وتىر»، - دەپ اتاپ ءوتتى دەپۋتات.

اۆتور: ءابۋ-اسقار مەكەش ۇلى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى