تانىمال جۋرناليستەر نۇردىلدا وراز بەن گۇلناز الىمگەرەي امەريكادا قازاق ونەرى مەن مادەنيەتىن پاش ەتتى
شاراعا «بولاشاق» باعدارلاماسى ارقىلى ءبىلىم الىپ جاتقان تانىمال جۋرناليستەر نۇردىلدا وراز بەن گۇلناز الىمگەرەي دە قاتىسىپ، حالىق اندەرىن ورىنداپ قانا قويماي، قازاقتىڭ كەڭ داستارحانىنان دا كەلگەن قوناقتارعا ءدام تاتىردى.
«باۋىرساق پەن كۇلشەگە تاڭىرقاعان جۇرتقا قۇرت پەن تارىنىڭ ءدامى جەتىسپەي تۇرعانداي سەزىلدى. دەگەنمەن، قازاقتىڭ قارا دومبىراسىنىڭ كۇمبىرى ەلدى ەلەڭ ەتكىزىپ، ەرەكشە ءىلتيپاتقا بولەندى دەسەك ارتىق ايتقاندىق ەمەس. ايشىلىق الىس امەريكاداعى ءدۇيىم جۇرتقا قازاق حالقىنىڭ مادەنيەتىن دارىپتەپ، دومبىرامىزدىڭ كۇمبىرىمەن دەلەبەسىن قوزدىرىپ، ءوز سالت- داستۇرىمىزدە از دا بولسا تانىستىردىق دەگەن ويدامىز» - دەيدى ولار ءوز سوزىندە.
بۇدان بولەك ولار اعىلشىن تىلىندە قازاقستاننىڭ كورىكتى جەرلەرى مەن جەتىستىگى تۋرالى دەرەكتى فيلم كورسەتىپ، ەلىمىزدى جينالعان جۇرتقا جان- جاقتى تانىستىردى.
ن. ورازدىڭ ايتۋىنشا، ۋنيۆەرسيتەتتىڭ بۇل باستاماسى ءاربىر ەلدەن كەلىپ ءبىلىم الىپ جاتقان ستۋدەنتتەردىڭ ادەت- عۇرپى مەن سالت- ءداستۇرىن جەرگىلىكتى جۇرتقا پاش ەتۋ، سول ارقىلى ءارالۋان مادەنيەتتى ءوزارا جاقىنداستىرۋ نيەتىنەن تۋىنداعان. شاراعا 12 ەلدىڭ ستۋدەنتتەرى قاتىسىپ، ءوز جۇرتىنىڭ تۇرمىس- تىرشىلىگىن تانىستىرعان.
