ق ر سىرتقى ىستەر مينيسترلىگى ا ق ش- تا ۇستالعان قازاقستان ازاماتى ا. سەيداحمەتوۆكە قاتىستى تۇسىنىكتەمە بەردى
«ق ر سىرتقى ىستەر مينيسترلىگى امەريكا قۇراما شتاتتارىندا «يسلام مەملەكەتى» لاڭكەستىك ۇيىمىمەن بايلانىسى بار دەگەن كۇدىكپەن قازاقستان ازاماتى احرور سەيداحمەتوۆتىڭ ۇستالعانى تۋرالى حاباردار»، دەلىنگەن حابارلامادا.
مينيسترلىككە كەلىپ تۇسكەن اقپاراتقا سايكەس، قازاقستان رەسپۋبليكاسىنىڭ ازاماتتىق تۇلعالار بازاسىندا شىن مانىندە 1995 - جىلى 26 - ماۋسىمدا وڭتۇستىك قازاقستان وبلىسى، تۇركىستان قالاسىندا دۇنيەگە كەلگەن، ۇلتى وزبەك سەيداحمەتوۆ احرور ابرار ۇلى دەگەن ازامات تىركەلگەن. 2011 - جىلدىڭ قازان ايىندا 16 جاسىندا ول وزبەكستانعا كەتىپ، سودان بەرى قازاقستانعا قايتىپ ورالماعان.
«ق ر نيۋ- يوركتەگى باس كونسۋلدىقتا كونسۋلدىق ەسەپتە تۇرماعان. قازىرگى تاڭدا ا. سەيداحمەتوۆتىڭ ءوزى دە، ونىڭ تۋىستارى دا قانداي دا ءبىر كومەك كورسەتۋ تۋرالى ءوتىنىش بىلدىرمەگەن. مۇنداي ءوتىنىش بولعان جاعدايدا، وعان ءتيىستى كونسۋلدىق- قۇقىقتىق قولداۋ كورسەتىلەتىن بولادى.
جالپى، قازاقستان حالىقارالىق قاۋىمداستىقتىڭ، ونىڭ ىشىندە قۇراما شتاتتارىنىڭ، ەكسترەميزم مەن «يسلام مەملەكەتى» اتتى ۇيىمىمەن كۇرەسىنە باعىتتالعان كۇش- جىگەرىن قولدايدى. ءبىز اتالعان ءىستى تەرگەۋدە ا ق ش بيلىگىنە جان- جاقتى كومەك كورسەتۋگە دايىنبىز»، دەپ اتاپ وتىلگەن ق ر س ءى م حابارلاماسىندا.
