اسىل تۇقىمدى مال ءوسىرىپ، ودان ساپالى ءونىم ءوندىرۋدىڭ ماڭىزى زور - فوتو
وسى رەتتە مەملەكەت قولداۋىنا سۇيەنە وتىرىپ، جاڭا باستاما- جوبالاردى جۇزەگە اسىرۋدىڭ ماڭىزى زور. ەڭ باستىسى، ەن دالانى ءتورت تۇلىك مالعا تولتىرىپ، ودان ەلگە قاجەتتى ءونىم الا ءبىلۋ كەرەك. بۇل تۋرالى جانىبەك اۋدانىنداعى «الەم» شارۋا قوجالىعىنىڭ جەتەكشىسى، وبلىستىق ءماسليحات دەپۋتاتى ەسكەندىر ەلەمەسوۆ ءمالىم ەتتى.
يندۋستريالاندىرۋ كارتاسى اياسىندا اتالمىش قوجالىق 2012 - جىلدىڭ جەلتوقسانىندا مىڭ باس ءىرى قارانى بورداقىلايتىن «جاڭا الەم» اتتى كەشەندى ىسكە قوسقان بولاتىن. بۇعان 150 ميلليون تەڭگە جۇمسالدى.
قازىرگى تاڭدا كەشەندە 500 گە تارتا ءىرى قارا سەمىرتىلۋدە. ونىڭ 160 تان استامى بۇقاشىق، وسىنشالىق شاماداعى بويداق قاشار قازاقتىڭ اسىل تۇقىمدى اقباس مالىنا جاتادى. قىسقى مال ازىعىنا جينالعان 325 مىڭ توننا ءشوپ قاجەتكە جاراۋدا. جەمدەپ باپتاۋعا 300 تونناداي ارپا، سونشالىق كولەمدە قارا بيداي، سونىمەن قاتار، اق بيداي، جوڭىشقا ارالاستىرىلىپ قولدانىلۋدا.
«الەم» شارۋا قوجالىعى قازاقتىڭ اقباس سيىرىن وسىرەتىن اسىل تۇقىمدى شارۋاشىلىق بولىپ 2007 - جىلى بەكىتىلگەن بولاتىن. بۇگىنگى تاڭدا شارۋاشىلىقتا 800 باس اسىل تۇقىمدى ءىرى قارا، 500 باس جىلقى، 70 تۇيە بار. شارۋاشىلىق وتاندىق جانە شەتەلدىك اتالىق بۇقالاردىڭ ۇرىعىن پايدالانۋ ارقىلى تابىننىڭ تەكتىك قۇندىلىعىن جاقسارتۋمەن اينالىسىپ كەلەدى. سەلەكسيالىق- اسىلداندىرۋ جۇمىستارى تابىننىڭ ناسىلدىك قۇندىلىعىن جاقسارتۋعا جانە جەتىلدىرۋگە باعىتتالعان، سونىمەن قاتار ءوسۋ قارقىندىلىعى جوعارى، ازىقتى جاقسى وتەيتىن قازاقتىڭ اقباس سيىرىنىڭ تۇقىم ىشىندەگى شاعاتاي توقال زاۋىتتىق ءتيپى مالىنىڭ تەكتىك قورىن ساقتاۋعا باعىتتالعان.
- باسقا اۋماقتارداعى مال قىستاقتارىن قوسپاعاندا، ءىرى كەشەندە 12 ادام جۇمىسقا تارتىلعان. كەشەن كوگىلدىر وتىن، اۋىز سۋ جانە ەلەكتر جارىعىمەن قامتىلعان. قول كۇشى جەتىمدى. جالاقىلارىن ۋاقتىلى تولەپ وتىرمىز. جاتىن ورنى دا بار، - دەدى ەسكەندىر كافار ۇلى.
- كۇنى بۇگىن مەملەكەتتەن نەسيە قاراجاتىن الىپ جاتقانىم جوق. كەرىسىنشە باسقا شارۋا قوجالىقتارىنا نەسيەگە اسىل تۇقىمدى مال ساتىپ وتىرمىن. بەلگىلى مەرزىم ىشىندە ءبولىپ تولەۋگە قولايلى جاعداي جاسايمىز. الۋشى مەملەكەتتەن العان دەمەۋقارجىمەن شىعىنىن جاۋىپ تاستايدى. ودان ەش ۇتىلمايدى. جانىبەك قانا ەمەس، قازتالوۆ، بوكەي ورداسى، سىرىم اۋداندارىنان سۇراۋ سالىپ، الىپ جاتقاندار بار. وڭتۇستىك قازاقستان، اقتوبە، اتىراۋ، قىزىلوردا وبلىستارىنان دا كەلدى. ازىرشە كاسىپ اينالىمىن ەل ىشىندە جۇرگىزىپ وتىرمىز. وتكەن جىلى كورشىلەس رەسەي ەلىنە 161 توننا ەت ەكسپورتقا شىعاردىق.. قازىر رۋبل باعامىنىڭ قۇنسىزدانۋىنا بايلانىستى سىرتقى باعىتقا تاۋەكەل ەتپەدىك. الداعى ۋاقىتتا اسىل تۇقىمدى مال باسىن كوبەيتىپ، ءوڭىر ەكونوميكاسىنىڭ دامي تۇسۋىنە ۇلەسىمىزدى قوسا تۇسەمىز.
كاسىپكەردىڭ سوزىنە قاراعاندا، «جاڭا الەم» اتتى ءىرى كەشەندە قۇس اتاۋلىدان قاز بەن كۇركەتاۋىقتىڭ دا باعىلىپ جاتقان جايى بار. 2012 - جىلدان بەرى اسىل تۇقىمدى كوشىم جىلقىسىن وسىرەتىن اسىل تۇقىمدى مال شارۋاشىلىعى مارتەبەسىن يەلەنگەن. التى اي جاز ۋاقىتىندا قىمىز جانە شۇبات ونىمدەرىن ساتۋعا شىعارىپ، ەل يگىلىگىنە جاراتۋدا. الدا ىسكەرلىك اياسىنىڭ كەڭي تۇسەتىنىنە سەنىم مول.
