ن. نازاربايەۆ: سايلاۋ ەلىمىزدى ۇلى ىستەرگە ۇيىستىرىپ، باياندى بولاشاق جولىنا بىرىكتىرە تۇسەرىنە سەنەمىن
«قايتا قاھارىنا مىنگەن داعدارىس جاعدايىندا بىرلىك بىزگە بۇرىنعىسىنان بەتەر قۇندى. مەملەكەتتىڭ تىنىشتىعى مەن ەلدىڭ بىرلىگىن ساقتاپ، دامىتۋ پرەزيدەنتى باستاپ ەلى قوستاعان كەزدە عانا باياندى بولماق. جاۋاپكەرشىلىك بۇكىل حالىققا دا جۇكتەلەدى. وسىنى ۇمىتپايىق. الداعى بيىك بەلەستەرمەنەن اسقاق اسۋلار ءۇشىن ءبىز بارلىق كەدەرگىلەردى باعىندىرىپ، العا باسۋعا ءتيىستىمىز. قۇزىرلى ورگاندار قازاقستان حالقى اسسامبلەياسىنىڭ باستاماسى ەلىمىزدىڭ كونستيتۋتسياسىنا جانە سايلاۋ تۋرالى زاڭعا ساي دەگەن قورىتىندى شىعاردى. مەن سايلاۋعا قاتىستى «ءيا» مەن «جوقتى» مۇقيات وي تارازىسىنا سالدىم. ءسويتىپ، كەزەكتەن تىس پرەزيدەنتتىك سايلاۋىن وتكىزگەن ءجون دەگەن پايىمعا كەلدىم.
سايلاۋ ەلىمىزدى ۇلى ىستەرگە ۇيىستىرىپ، باياندى بولاشاق جولىنا بىرىكتىرە تۇسەرىنە سەنەمىن. قازاقستاندىقتاردى ەل تاريحىنداعى تاعى ءبىر تاعدىرلى وقيعاعا جاۋاپكەرشىلىكپەن قاراپ، بەلسەنە قاتىسۋعا شاقىرامىن. بارشاڭىزعا بىرلىك پەن بەرەكە، شاڭىراقتارىڭعا شاتتىق تىلەيمىن»، - دەدى ەلباسى حالىققا ارنالعان ۇندەۋىندە.
اۆتور: مارلان جيەمباي
