الماتى اۋەجايىنا «جارىلعىش زات قويعان» ەر ادام ۇستالدى
الماتىنىڭ حالىقارالىق اۋەجايىنا جارىلعىش زات قويىلعانى تۋرالى حابار قالانىڭ شۇعىل قىزمەتىنە 17- اقپان كۇنى تۇندە تۇسكەن. اۋماق تەكسەرىلگەننەن كەيىن حاباردىڭ جالعان ەكەنى انىقتالدى. «اۋماقتىق پوليتسەي بولىمىندە شۇعىل-ىزدەستىرۋ توبى قۇرىلدى. قوڭىراۋ شالعان ادامدى ىزدەستىرۋگە الماتى پوليتسياسى شۇعىل قىزمەتىنىڭ وكىلدەرى بىردەن كىرىسىپ، ونىڭ كىم ەكەنى بىرنەشە ساعاتتا بەلگىلى بولدى. ونى قولعا تۇسىرۋگە ودان ۇزاعىراق ۋاقىت كەتتى. تەلەفون لاڭكەسىنىڭ 44 جاستاعى ازامات ەكەنى انىقتالدى، ول «العاباس» ىقشاماۋدانىندا ورنالاسقان باعباندىق شارۋاشىلىقتاردىڭ بىرىندە تۇرادى»، - دەيدى ءى ءى د باسپا ءسوز قىزمەتىندەگىلەر. ول تەلەفون لاڭكەستىگى ارەكەتىنە ماس كۇيىندە بارعانى بەلگىلى بولدى.
بۇعان دەيىن ورال اۆتوۆوكزالىن «جارىپ جىبەرمەك» بولعان ەر ادام تەلەفون تەرروريزمى ءۇشىن سوتتالعان بولاتىن. وعان ءۇش جىلعا باس بوستاندىعىنان ايىرۋ جازاسى بەرىلدى. سوت وتكەن جىلى جەلتوقسان ايىنىڭ ورتاسىندا جەرگىلىكتى تۇرعىن ءوز ۇيالى تەلەفونىمەن كەزەكشى ديسپەتچەردىڭ تەلەفونىنا حابارلاسىپ، ورال اۆتوۆوكزالىنىڭ عيماراتىن جارىپ جىبەرەمىن دەپ ايتقانىن انىقتادى. ءبىراق وقيعا ورنىنا كەلگەن شۇعىل ارەكەت ەتۋ قىزمەتىنىڭ قىزمەتكەرلەرى عيماراتتى تەكسەرىپ، جارىلعىش زاتتى تاپپادى.
