ۇلتتىق راديو ۇلتتىق مەيرامدى اي بۇرىن باستادى
ۇلت رۋحانياتىنىڭ شىنايى جاناشىرى بولا بىلگەن ۇلتتىق راديو ۇجىمى حالقىمىزدىڭ ەڭ ۇلىق مەرەكەلەرىنىڭ ءبىرى - ناۋرىز مەيرامىن بيىل دا ءبىر اي بۇرىن، ياعني 23- اقپاننان باستاپ جىبەردى. ءار ساعاتتىڭ باسىندا مەرەكەلىك كوڭىل-كۇي سىيلايتىن يميدجدىك روليكتەردىڭ، تىكەلەي ەفير جۇرگىزۋشىلەرىنىڭ ادەمى حابارلاۋىمەن «ناۋرىز»، «كوكتەم» تاقىرىبىنداعى اندەردىڭ، مەيرام جايلى ارنايى حابارلار مەن ايدارلاردىڭ ءجيى-ءجيى بەرىلۋى تىڭدارماندارىنىڭ رۋحىنا قانات ءبىتىرىپ جۇرگەنىن جاقسى جاڭالىق ساناپ، ۇلتتىق راديوداعى ارىپتەستەرىمىزگە شىعارماشىلىق تابىس تىلەيمىز.
اسىلىندا، «جاڭا جىلدارىڭىزبەن» دەگەن قىزىلدى-جاسىلدى جازۋلارمەن قالالاردى بەزەندىرۋدى بىلاي قويىپ، كۇللى بۇقارالىق اقپارات قۇرالدارىنىڭ ءوزى سول جاڭا جىلعا ەكى-ءۇش اي بۇرىن دايىندالا باستايتىنى بەلگىلى. ونىڭ نىشاندارى كوشەلەردەن نەمەسە ەفيرلەردەن كورىنىس بەرە باستاعاندا ورە-تۇرەگەلىپ شۋلايتىنىمىز دا ۇيرەنشىكتى جاعدايعا اينالعانداي. ءتىپتى، سول جاڭا جىلدىڭ تاساسىندا تاۋەلسىزدىك كۇنى قالىپ قويدى دەپ ناليتىندار از ەمەس بۇل قوعامدا.
ەندەشە، ءبىز وكپە-رەنىش پەن قىزىل ءسوزدى بىلاي قويىپ، ۇلتتىق مەيرامدى ۇلىقتاۋدى اركىم وزىنەن باستاسا دەيمىز. ەل-جۇرتقا ۇيالماي كورسەتىپ، اۋىز تولتىرىپ ايتارلىقتاي وسىنداي دۇنيەلەردى مەيلىنشە كەڭىرەك ءارى كوبىرەك ناسيحاتتاي تۇسكەنىمىز ابزال. قايبىر جىلى وڭتۇسىك قازاقستاندىقتار ءاز-ناۋرىزدى ون كۇن بۇرىن ءتۇرلى اتاۋلارمەن تويلاي باستاعاندا رەسپۋبليكا جۇرتشىلىعى تامسانعان ەدى. ەندى مىنە، وسىنداي يگى ءىستى «شالقار» راديوسى ەرتەرەك ءىلىپ اكەتىپ جالعاستىرىپ وتىر. ۇلتتىق قۇندىلىقتاردى ۇلىقتاۋعا قاتىستى وسىنداي دۇنيەلەردى كۇن بۇرىن قولعا الىپ، ارەكەتتەنگەن ۇجىمداردىڭ ەڭبەكتەرىن كورە بىلەيىك ءھام كورسەتە جۇرەيىك.
جالپى، سوڭعى كەزدەرى بۇل ماسەلەگە قاتىستى سەڭ قوزعالا باستاعانىن ايتا كەتۋ كەرەك. مىسالى، جۋىردا عانا تۇركى حالىقتارىنىڭ ورتاق مەرەكەسى ءاز-ناۋرىزعا دايىندىق ماسەلەسىن پارلامەنت قابىرعاسىندا ءسوز ەتكەن ءماجىلىس دەپۋتاتى الدان سمايىلدىڭ مالىمدەمەسى اپتا بۇرىن «انا ءتىلى» گازەتىندە جارىق كوردى. ال ەندى ونى ءىس جۇزىندە «شالقار» ۇلتتىق راديوسى جۇزەگە اسىرا باستادى. ەندەشە، جاقسى ءىس جالعاسىن تاپسىن دەپ تىلەيىك.
BNews.kz
