قازاق قىزى پولشا پرەزيدەنتى بولۋدان ءۇمىتتى
باللي ماجەتس قازاقستاندا تۋعان، ماسكەۋدە ءبىلىم العاننان كەيىن كۇيەۋگە شىعىپ، پولشاعا كەتىپ قالعان. ول 25 جىلدان بەرى - پولشانىڭ ازاماتشاسى، ەكى ۇلى بار.
naTemat باسىلىمىنىڭ مالىمەتىنشە، ماجەتستىڭ سايلاۋعا ءوز كانديداتۋراسىن ۇسىنۋى ءۇشىن 100 مىڭ قول جيناۋ مۇمكىندىگى از، دەگەنمەن ول پولشا پرەزيدەنتى سايلاۋى دوداسىنا قاتىسۋ ابدەن مۇمكىن دەپ ەسەپتەيدى.
«مەن پولشا پرەزيدەنتى رولىنە وزگە ۇمىتكەرلەرمەن تەڭ دارەجەدە ساي كەلەمىن. كوپ جىلدان بەرى پوستكەڭەستىك مەملەكەتتەردە قۇقىعى بۇزىلعان جۇرتشىلىقپەن بىرگە ادام قۇقىقتارى مەن دەموكراتيالىق وزگەرىستەردى ساقتاۋ ماسەلەلەرىمەن اينالىسامىن. مەنىڭ تاجىريبەم پولشادا كادەگە جارايدى دەپ ويلايمىن»، - دەيدى ايەل.
- مەنىڭ ەكىنشى كوزدەيتىنىم - كەڭەس وداعى قۇرامىندا بولعان ەلدەر ماسەلەلەرى. مەن سىرتقى ساياسات ماسەلەلەرىن وتە جاقسى مەڭگەرە الامىن، سەبەبى شىعىس ەۋروپا مەن ورتالىق ازيا ەلدەرىنىڭ پروبلەمالارى ماعان ەتەنە تانىس».
ماجەتس ءوزى پولشا پرەزيدەنتى بولسا، ۋكراين داعدارىسىن شەشۋگە ۇلەس قوسا الاتىنىن ايتتى. «مەن بۇل ادامداردىڭ ءتىلى مەن ءدىلىن بىلەمىن، قازاقستان ك س ر و قۇرامىندا بولعان ەدى. پولشا پرەزيدەنتى رەتىندە مەن پولشانىڭ باتىس پەن بۇرىنعى كەڭەس وداعى مەملەكەتتەرى اراسىندا دەلدال بولۋىنا ىقپال ەتەر ەدىم. سەبەبى پولياكتارعا گوللاندتار مەن فرانسۋزدارعا قاراعاندا، شىعىستاعى كورشى حالىقتار جاقىن. ءبىز سول سوتسياليستىك لاگەردەن ءوتىپ، سول پروبلەمالاردى باستان كەشتىك. سوندىقتان پولشا ۋكراينا جونىندەگى كەلىسسوزدەرگە ارالاسۋى كەرەك. ول ارا اعايىن بولۋعا مىندەتتى. قازىر جاعداي ولاي ەمەس. ءبىز ۋكرايندەردى نەمىستەر مەن فرانسۋزداردان گورى جاقسى تۇسىنسەك تە، كەلىسسوزدەر پروتسەسىنەن تىس قالدىق»، - دەيدى ماجەتس.
قازاقستاندا تۋىپ وسكەن ايەل ءوزىنىڭ ساياساتكەر رەتىندەگى تاجىريبەسىنىڭ جوقتىعىن مويىندايدى. ءبىراق ونى كەمشىلىك دەپ استە ەسەپتەمەيدى. «مەن ادام قۇقىقتارى مەن ازاماتتىق بوستاندىق ءۇشىن كۇرەسەتىن قاراپايىم ازاماتپىن»، - دەيدى ول. ونىڭ پرەزيدەنت بولعاندا ۇستاناتىن قاعيداسى «حالىقپەن بىرگە بولىپ، ولاردىڭ مۇڭىن مۇڭداۋ».
ايتا كەتۋ كەرەك، ازىرشە پولشانىڭ قازىرگى پرەزيدەنتى برونيسلاۆ كوماروۆسكيدىڭ كەلەسى مەرزىمگە قاتىسۋ- قاتىسپاۋى بەلگىسىز. ونىڭ وكىلەتتىگى 2015 - جىلدىڭ تامىزىندا اياقتالادى. بۇعان دەيىن پولشا پرەزيدەنتى بولۋدان 60 جاستاعى ترانسسەكسۋال اننا گرودسكانىڭ دا ءۇمىتى بار ەكەنى حابارلانعان ەدى. ونىڭ كانديداتۋراسىن «جاسىلدار پارتياسى» قولداپ وتىر.
tengrinews.kz
