استانادا ورالماندار مەن قازاقستاندا تۇرۋعا ىقتيارحاتى بار ادامداردىڭ مۇلىكتى جاريا ەتۋ ماسەلەسىنە قاتىستى جيىن وتەدى
دەپ حابارلادى استانا قالاسى اكىمدىگىنىڭ باسپا ءسوز قىزمەتىنەن.
بريفينگكە استانا قالاسى اۋداندىق اكىمدىكتەرىنىڭ ءارقايسىسىنىڭ جانىنان قۇرىلعان جاريا ەتۋ جونىندەگى كوميسسيالارىنىڭ ءتوراعالارى، استانا قالاسى قارجى باسقارماسىنىڭ باسشىسى جانە استانا قالاسىنىڭ مەملەكەتتىك كىرىستەر دەپارتامەنتى باسشىسىنىڭ ورىنباسارى قاتىسادى.
2015 - جىلدىڭ 18 - اقپانىنداعى جاعداي بويىنشا، استانا قالاسى بويىنشا جىلجىمايتىن مۇلىكتى جاريا ەتۋ ماسەلەسى جونىندەگى اۋداندىق كوميسسيالار جالپى سوماسى 15,8 ميلليارد تەڭگە بولاتىن وبەكتىلەر بويىنشا 1430 ءوتىنىشتى تىركەدى، كوميسسيا 523 ءوتىنىشتى قاراپ، وسى بويىنشا جالپى سوماسى 5,3 ميلليارد تەڭگە بولاتىن 1227 وبەكت جاريا ەتىلدى.
جالپى، مۇلىكتى جاريا ەتۋ اكسياسى الەم ەلدەرىندە بار تاجىريبە. فرانسيا، پورتۋگاليا، اۆستراليا، ا ق ش سىندى ەلدەر مۇنداي ناۋقاندى بىرنەشە رەت وتكىزگەن. سەبەبى، تاسادا جاتقان مۇلىكتى الىپ شىعۋ - قاي ەلدە دە وزەكتى ماسەلە. قازاقستان دا بۇل ناۋقاندى تياناقتى تۇردە قولعا الدى. وعان «كولەڭكەلى» اينالىمدا جۇرگەن قوماقتى قارجى سەبەپ بولىپ وتىر.
بۇل، ءبىر جاعىنان، ەل ەكونوميكاسىنا قارجى تارتۋدى دا كوزدەيدى. سونىمەن، مۇلىكتى جاريا ەتۋ دەگەنىمىز، زاڭ تىلىمەن ايتقاندا، تابىستاردى جاسىرۋ ماقساتىندا زاڭدى ەكونوميكالىق اينالىمنان شىعارىلعان جانە قازاقستان رەسپۋبليكاسىنىڭ زاڭناماسىنا سايكەس رەسىمدەلمەگەن نەمەسە ءتيىستى ەمەس تۇلعاعا رەسىمدەلگەن مۇلىككە قاتىستى قۇقىلاردى مەملەكەتتىڭ تانۋ ءراسىمى.
بيىلعى قىركۇيەكتەن باستاپ قولدانىسقا ەنگەن زاڭ بار مۇلىكتى جاريا ەتىپ، زاڭداستىرۋعا مۇمكىندىك بەرەدى. وعان قازاقستاندىق ازاماتتار، ورالماندار مەن ەلىمىزدە تۇرۋعا ىقتيارحاتى بار ادامدار قاتىسىپ، زاڭدا بەلگىلەنگەن تارتىپپەن مۇلكىن جاريا ەتە الادى. سونداي- اق، ازاماتتار ەلىمىزدىڭ اۋماعىنان تىس جەردەگى مۇلىكتى دە جاريا ەتە الادى.
بۇعان دەيىن ەلىمىزدە ەكى رەت مۇلىكتى زاڭداستىرۋ شاراسى وتكەنى بەلگىلى. ونىڭ العاشقىسى 2001 - جىلدىڭ شىلدە- تامىز ايىندا ءوتتى. وندا ەلىمىزدىڭ 3 مىڭعا جۋىق ازاماتى 480,0 ميلليوننان استام ا ق ش دوللارىن جاريا ەتكەن.
ال، ەكىنشىسى 2006-2007 - جىلدارى ارالىعىندا ۇيىمداستىرىلدى. وندا تەك كاپيتال عانا ەمەس، جىلجىمالى جانە جىلجىمايتىن مۇلىك تە زاڭداستىرىلدى. سونىڭ ناتيجەسىندە رەسپۋبليكالىق بيۋدجەتكە شامامەن 60 ميلليارد تەڭگەنىڭ جاريا ەتۋ الىمى تۇسكەن.
