وڭتۇستىك قازاقستان حالقىنىڭ ۇشتەن ءبىرى جاستاردان تۇرادى

بۇل تۋرالى وبلىس اكىمى اسقار مىرزاحمەتوۆ ايتتى، دەپ حابارلايدى Bnews.kz ءتىلشىسى.

«وبلىستا 773 مىڭنان استام جاس ازامات تۇرادى. بۇل جالپى حالىقتىڭ ۇشتەن ءبىر بولىگى. ماسەلەن، اۋىلداردا 473 مىڭ جاس ازامات ءومىر سۇرسە، قالالاردا 300 مىڭ جاس كۇنەلتەدى»، - دەيدى وبلىس اكىمى.

سونىمەن بىرگە، اسقار مىرزاحمەتوۆ وڭىردە 31 جاستار قوعامدىق بىرلەستىگى جۇمىس ىستەپ، وبلىستاعى 11 جوعارى وقۋ ورنىندا 71 مىڭعا جۋىق جاس ءبىلىم الىپ جاتقانىن جەتكىزدى.

«ديپلوممەن - اۋىلعا» باعدارلاماسى ارقىلى 801 جاس اۋىلدىق جەرلەردە جۇمىسقا ورنالاسىپ، ولارعا بيۋدجەتتەن 103,7 ميلليون تەڭگە ءبىر جولعى كوتەرمە جاردەماقى، تۇرعىن ءۇي الۋ ءۇشىن 298 جاسقا 807,5 ميلليون تەڭگە نەسيە بەرىلدى»، - دەيدى ول.

اسقار مىرزاحمەتوۆ ايماقتارداعى «جاسىل ەل» جانە «ستۋدەنتتىك قۇرىلىس وتريادتارىندا» 847 جاس كوگالداندىرۋ، كورىكتەندىرۋ جۇمىستارىنا، 458 جاس ستۋدەنتتىك قۇرىلىس وتريادتارىنا تارتىلعانىن دا اتاپ ءوتتى. «ماڭگىلىك ەل جاستارى - يندۋسترياعا» الەۋمەتتىك جوباسى اياسىندا پەداگوگيكالىق ماماندىقتار بويىنشا 7 جوعارى وقۋ ورنى ءۇشىن ارنايى 1050 گرانت، 23 كوللەدجدە ءبىلىم الۋشىلار ءۇشىن 35 ماماندىق بويىنشا 1000 گرانت ءبولىنىپ، وبلىستىڭ جوعارى وقۋ ورىندارىنا - 540، ارناۋلى ورتا وقۋ ورىندارىنا - 326 ادام وقۋعا تۇسكەنىن دە تىلگە تيەك ەتتى.

«وزگە وبلىستارعا وقۋعا قابىلدانعان ستۋدەنتتەرمەن قارىم-قاتىناس ورناتىلىپ، ولاردىڭ الەۋمەتتىك جاعدايىنا باقىلاۋ جاسالادى»، - دەيدى وبلىس باسشىسى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى