تەلەفونعا ارنالعان توعىزقۇمالاق ويىنى مەن دومبىرا سيمۋلياتورى جاسالدى

نۇرجان تولەگەنوۆ ويىن مەن قوسىمشا جاساۋدى حوببي دەپ ەسەپتەيدى. ونىڭ ۇيالى تەلەفونعا ارناپ جاساعان العاشقى ويىندارىنىڭ ءبىرى - Walk the dog اركاداسى، بۇل ويىندا شاردىڭ ۇستىندە ۇشىپ كەلە جاتقان ءيتتى باسقارۋ كەرەك.

ونى بەس مىڭنان استام ادام جۇكتەپ الدى. جۇكتەگەندەردىڭ باسىم بولىگى - شەتەلدىكتەر. ۇلتتىق كولوريتى بار قوسىمشانى جاساۋدى وعان قارىنداسى وتىنگەن. قارىنداسى مەكتەپ وقۋشىلارىنا ارنالعان توعىزقۇمالاق ويىنىن جاساۋ تۋرالى وي ايتقان.

تولەگەنوۆ بۇل ويىندى ەكى ايدا جاساپ شىقتى. ءوزىنىڭ ايتۋىنشا، بۇل ىسپەن ول جۇمىستان بوس ۋاقىتىندا اينالىسىپتى. ويىندى Android جانە iOS پلاتفورماسىندا جۇمىس ىستەيتىن سمارتفوندارعا جۇكتەۋگە بولادى.

ايتا كەتەيىك، Google Play-دە قوسىمشا 20 مىڭ رەت ورناتىلعان. ويىندى Google سەرۆەرىن قولدانا وتىرىپ، جەلى ارقىلى ويناۋعا بولادى.

ونىڭ سوڭعى جوبالارىنىڭ ءبىرى - تابيعي داۋىس شىعارا الاتىن دومبىرا شەرتىپ ۇيرەنۋ سيمۋلياتورى. تولەگەنوۆ بارلىق مۋزىكالىق دىبىستاردى ءوزى جازىپ العان. قوسىمشانى اشقاننان كەيىن ۇيالى تەلەفون ەكرانىندا دومبىرانىڭ ەكى ىشەگىن كورۋگە بولادى.

ىشەكتى تارتىپ، ويناۋعا بولادى. ەكراننىڭ شەتكى بولىگىندە دومبىرانىڭ مويىنى ورنالاسقان. قولدانۋشى ولاردى باسىپ، اككوردتاردى تەرە الادى. Android قولدانۋشىلارى بۇل باعدارلامانى 21 مىڭ رەت جۇكتەگەن.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى