اقتوبەدە پيما كيىپ جۇگىرۋدەن جارىس ءوتتى
جەرگىلىكتى گازەت رەداكسياسىنىڭ ۇجىمى جىل سايىن اقتوبەلىكتەر اراسىندا وسىنداي سايىس وتكىزۋدى داستۇرگە اينالدىرعان. بۇرىن تەك وبلىس ورتالىعىنىڭ تۇرعىندارى عانا قاتىساتىن شاراعا، ەندى الىس اۋىلداردان دا ات ارتىپ كەلۋشىلەر كوپ بولدى.
«وزىم قوسەستەك اۋىلىنان كەلىپ تۇرمىن. كۇيەۋ بالام مەن قىزىم، جيەنىمدى ەرتىپ كەلدىم. قىس ءبىز جاقتا قاتتى بولعاسىن پيمانى تاستامايمىز عوي. ەندى مىنە، جارىسقا دا اياق كيىمىم جاراپ تۇر. ەڭ باستىسى جەڭىس ەمەس، كوڭىلدىڭ ءبىر سەرگىپ قالعانى كەرەمەت قوي»، - دەيدى زەينەتكەر اناتولي كرۋتس.
جارىسقا قاتىسۋشىلاردىڭ ءبىرى ۇيىنەن سىرنايىن قوسا الىپ كەلىپتى. سول ماڭعا جينالعاندار اسپاپتىڭ سۇيمەلدەۋىمەن ءان شىرقاپ، ءبي دە بيلەدى. سايىس الدىندا دەنەلەرىن قىزدىرۋعا مۇنىڭ دا سەپتىگى ءتيدى. ال بىلتىر عانا زەينەتكەرلەر اراسىندا پيما كيىپ جۇگىرۋدەن وبلىس چەمپيونى اتانعان تولەۋ قارت جۇننەن باستىرىلعان اياق كيىمنىڭ دەنساۋلىققا پايدالى ەكەنىن ايتادى.
«بىزدەر جاقتا بۇل اياق كيىمدى «بايپاق» دەيدى عوي. وسى بايپاقتىڭ ارقاسىندا تىڭمىن. جاستايىمنان تراكتور ايدادىم. قىستى كۇنى كولىك وتالماي دالادا قالعان كەزدەر بولدى. بۇل اياق كيىم سۋىق وتكىزبەيدى. جاستار قازىر بايپاق كيۋدەن ۇيالادى. دەنساۋلىعىن ويلاعان ادام اياققا قىستا بايپاق كيىپ، قولىنان قولعاپ تاستاماۋ كەرەك»، - دەيدى 75 جاستاعى اقساقال تولەۋ ورىنبايەۆ.
جارىسقا قاتىسقانداردىڭ ەڭ كىشكەنتايى مانسۇر بيسەنعاليەۆ ءتورت جاستا. تومپاڭداعان ءبۇلدىرشىن ءوز توبىندا جالعىز بولعان سوڭ مارەگە دە ءبىرىنشى كەلدى.
«مەن قاتتى جۇگىرەم عوي. سوندىقتان ءبىرىنشى كەلدىم»، - دەيدى مانسۇر. جەڭىمپازداردى ۇيىمداستىرۋشىلار ارنايى العىس حاتپەن قۇتتىقتاپ، ەستەلىك سىيلىقتارىن تابىستادى.
اقسۇڭقار ازات، سۋرەتتى اۆتور تۇسىرگەن
