قىتايداعى «قىتاي- شىڭگىل حالىقارالىق سالبۋرىن» مەرەكەسى قالاي ءوتتى؟
ادامزات تاريحىنداعى ەلەۋلى جاڭالىقتاردىڭ ءبىرى دە ءدال وسى قۇسبەگىلىك ونەر.
ۇلى ابايدىڭ مىنانداي ولەڭى بار: قۇستى جيساڭ - بۇركىت جي، قىس تونىڭدى تۇلكى ەتەر.
بۇلعىن، سۋسىن كيىنتىپ، ازباس، توزباس مۇلكى ەتەر. ونەردىڭ بۇل ءتۇرى قازاققا ەتەنە جاقىن بولعاندىقتان، قۇسبەگىلىك ءبىزدىڭ ۇلتىمىزدىڭ ەرەكشەلىگىن ايقىنداپ، بولمىسىن ايشىقتايتىنداي. وعان دالەل رەتىندە الەمدەگى بىردە-ءبىر ەلدىڭ مەملەكەتتىك رامىزدەرىندە كەزدەسپەيتىن قىران بۇركىتتىڭ تەك قازاقستاننىڭ عانا تۋىندا كورىنىس تاپقاندىعىن ايتۋعا بولادى.
سونىمەن بىرگە قۇسبەگىلىكتى ۇلتتىق سپورت ءتۇرىنىڭ ءبىرى رەتىندە كىرگىزگەن دە قازاق ەلى. بۇگىندەرى ءتىپتى شەت جۇرتتاعى قانداستارىمىز اتا ءداستۇرىمىزدى جالعاستىرىپ، ۇرپاققا امانات ەتىپ كەلە جاتقانى قۋانتادى.
جۋىقتا قىتايدىڭ التاي ايماعى، شىڭگىل اۋدانىندا حالىقارالىق «قىتاي- شىڭگىل حالىقارالىق سالبۋرىن» مەرەكەسى ءوتتى. بۇل شاراعا موڭعوليادان، قىتايدان، قازاقستاننان شاقىرىلعان ارنايى قوناقتار قاتىستى. وسى ورايدا اتاۋلى شاراعا قازاقستاننان قاتىسقان «جالايىر شورا» قۇسبەگىلەر مەكتەبىنىڭ ديرەكتورى، «قىران» فەدەراتسياسىنىڭ اتقارۋشى ديرەكتورى، جۋرناليست- ەتنوگراف باعدات مۇپتەكە قىزى، «فوتوونەر» قوعامدىق بىرلەستىگىنىڭ ءتوراعاسى، «جاس الاش» گازەتىنىڭ فوتوءتىلشىسى اسىلحان ءابدىرايىم ۇلى جانە «الماتى اقشامى» گازەتىنىڭ فوتو ءتىلشىسى سارسەنبەك قىزايبەك ۇلىمەن كەزدەسىپ، ساپاردان كەيىنگى اسەرلەرىن سۇراپ، اڭگىمە ءوربىتۋدىڭ ءساتى ءتۇستى.
اسىلحان ءابدىرايىم ۇلى:
- حالىقارالىق قىتاي- شىڭگىل سالبۋرىن سالتاناتىن تاماشالاۋعا جەرگىلىكتى جانە شەتەلدەردەن ارنايى كەلگەن كورەرمەندەر سانى وتىز مىڭعا جۋىقتادى. سالتاناتتى ءىس- شارانىڭ شىمىلدىعى ساپ تۇزەلگەن شەرۋمەن اشىلدى.
بۇل سالتاناتقا شاقىرتۋ العانىمىزدىڭ ءوزى ءبىز ءۇشىن ۇلكەن مارتەبە. وتكەن جىلى كوپتەگەن تاريحي جەرلەرىمىزدى ءتۇسىرىپ، فوتوساياحاتتار وتكىزدىك. قىتاي ايماعىنداعى فوتوسۋرەتشىلەرمەن سارسەنبەك جاقسى بايلانىس ورناتقان. وسى ورايدا ۇلىتاۋدا وتكىزگەن فوتوساياحاتىمىزعا التاي وڭىرىندەگى فوتوسۋرەتشىلەر قوعامى ءتوراعاسىنىڭ ورىنباسارى سەرىك مۇقىش پەن «شينجاڭ» سۋرەتتى جۋرنالىنىڭ باس رەداكتورى سەرىك نۇرلىبايدى شاقىردىق. ولار ۇلىتاۋ ءوڭىرىنىڭ تابيعاتىنا تامسانىپ قايتتى.
كەيىننەن بىزگە حابارلاسىپ سالبۋرىن سالتاناتىنا شاقىردى. بۇل شارا بارىسىندا قۇسبەگىلىك جايلى عىلىمي كونفەرەنسيا بولاتىنىن، ءبىزدىڭ ەلدەن دە مامان قاتىسسا ءجون بولار ەدى دەگەن ويىن جەتكىزدى. سارسەنبەك بۇرىننان قۇسبەگىلىك پەن ساياتشىلىق ونەردى ءتۇسىرىپ كەلەدى. سودان اقىلداسىپ، بىزبەن بىرگە باعدات مۇپتەكە قىزىنىڭ بولعانىن قالادىق.
ءىس- شارا سالتاناتتى تۇردە اشىلعان سوڭ، ساياتشىلىققا قومدانعان بۇركىتتەردىڭ توپتارى ارنايى تانىستىرىلدى. بۇل كۇنگى ساياتشىلىق ونەرىمەن جۇرتشىلىقتى ءتانتى ەتەر قۇسبەگىلەرگە ساتتىلىك تىلەپ، قوناقتار ىزگى نيەتتەرىن ءبىلدىرىپ جاتتى. اۋداندىق كوركەمونەرپازدار ۇيىرمەسى اتىنان قويىلعان شاعىن كونسەرتتىك باعدارلاما جينالعانداردى ءبىر جەلپىنتتى. «دالا كوكپارىنا» قاتىسقان 50 كوكپارشىنىڭ قيمىل- قارەكەتتەرى كوپشىلىكتى ەرەكشە قىزىقتىردى. ال «ساياتشىلىق» بولىمىندە قاناتىن قومداعان سەكسەننەن اسا بۇركىتتىڭ وتىزى قويانعا، قارساققا، تۇلكىگە جانە قاسقىرعا ءتۇستى.
«قازاق توبەتى» بويىنشا ارنايى كورمە وتكىزىلدى. كورمەگە قاتىسقان قىرىق توبەتتى سان قىرىنان تاماشالاعاندار ولاردى ساتىپ الۋعا ءوتىنىش ءبىلدىردى.
ءبىز بارلىق كورىنىستەردى سۋرەتكە ءتۇسىرىپ الدىق. «شينجاڭ» سۋرەتتى جۋرنالىنىڭ باس رەداكتورى سەرىك نۇرلىباي ءۇرىمجى قالاسىندا جەرگىلىكتى جۋرناليستەرمەن كەزدەسۋ ۇيىمداستىردى. بۇدان سوڭ قۇبىنىڭ قۇمىن ارالادىق.
جالپى، ءبىزدىڭ ساپارىمىزدىڭ نەگىزگى ماقساتى ەكى ارادا ىنتىماقتاستىق، بايلانىس ورناتۋ ەدى. فوتوسۋرەت ارقىلى تالاي تاريح پەن سىردى جەتكىزۋگە بولادى. بۇل - ۇرپاققا امانات بولىپ قالاتىن ۇلكەن ونەر. ءتىپتى ۇلتتىق ءداستۇر مەن عۇرىپتى كەلەر ۇرپاققا جەتكىزۋدە فوتوسۋرەتتىڭ الار ورنى ەرەكشە. سوندىقتان ءبىزدىڭ مىندەتىمىز - ۇلتتىق قۇندىلىقتارىمىزدى دارىپتەۋ، ناسيحاتتاۋ. وسى ورايدا ءوزىمنىڭ جارىققا شىعارعان «فوتوجۋرناليستيكا» وقۋلىعىن دا ءسوز ەتكىم كەلىپ وتىر. فوتوجۋرناليستيكا حاقىندا 1962 - جىلدان بەرى قازاق تىلىندە بىردە-ءبىر وقۋلىق شىقپاعان. ال جاس فوتوگرافتار ءداستۇردى، ونەردى سۋرەتكە تۇسىرۋدەگى وزىندىك ەرەكشەلىكتەردى بىلە بەرمەيدى. وسى وقۋلىقتى قىتايداعى قازاقتارعا تانىستىردىق. ولار ۇلكەن قىزىعۋشىلىق تانىتتى.
قىتايدا ءبىزدىڭ ساپارىمىزعا وراي بىرنەشە شارالار ۇيىمداستىرىلدى. بەلگىلى فوتوسۋرەتشى قاپەز شاعىبان ۇلىنىڭ «اتامەكەن» اتتى فوتوكورمەسى ءوتتى. سونىڭ لەنتاسىن قيۋ بىزگە بۇيىردى. بۇل دا ءبىز ءۇشىن ۇلكەن مارتەبە. سونىمەن بىرگە التاي ايماقتىق فوتوسۋرەتشىلەر قوعامىنىڭ مۇشەلەرىمەن، قىتاي اقپارات قۇرالدارىنىڭ فوتوتىلشىلەرىمەن، تاۋەلسىز فوتوتىلشىلەرمەن كەزدەسۋ ەرەكشە اسەر قالدىردى.
30 عا جۋىق فوتوسۋرەتشى قاتىستى. ءبىز مۇندا «فوتوونەر» قوعامدىق بىرلەستىگىنىڭ جۇمىسىن تانىستىردىق، الداعى جوسپارلارىمىزبەن بولىستىك. كەزدەسۋ بارىسىندا قويىلعان سۇراقتارعا جاۋاپ بەردىك. سوندا ءبىر قىتاي ازاماتىنىڭ ءسوزى جادىمىزدا قالدى. ول «قىتايدا 56 ۇلت بار. ءبىراق سولاردىڭ ىشىندە سىزدەردەن باسقا بىردە- بىرەۋىندە فوتوگرافياعا وسىلاي جاناشىرلىق تانىتىپ وتىرعانىن كورمەپپىن» دەپ ءوز ويىن ءبىلدىردى.
باعدات مۇپتەكە قىزى:
- قىتايداعى قانداستارىمىزدىڭ وسى ءبىر كيەلى ونەردىڭ ءتۇرىن ساقتاپ، ونى وسىنداي ۇلكەن دەڭگەيدە سالتاناتپەن وتكىزگەلى جاتقانى ءبىزدى قۋانتتى. بارىنەن دە قىتاي جەرىندەگى قانداستارىمىزبەن قاۋىشقان ساتتەر اسەرلى بولدى. ولاردىڭ ءالى كۇنگە دەيىن داستۇرگە بەرىكتىگى ءتانتى قىلدى. نەگىزىنەن بۇل شارا ۇكىمەتتىك دەڭگەيدە، شىڭگىل اۋدانىنىڭ ۇيىمداستىرۋىمەن ءۇشىنشى رەت ءوتىپ وتىر ەكەن. قاراقيا ەلدى مەكەنىندە وتكەن «حالىقارالىق قىتاي- شىڭگىل سالبۋرىن» سالتاناتىنا قاتىسىپ، قۇتتىقتاۋ ءسوز سويلەدىك. «قىران» فەدەراتسياسىنىڭ ديرەكتورى نۇرلان ونەربايدىڭ اتىنان العىس حاتىمىزدى تاپسىردىق. بۇدان كەيىن ەلدىڭ نازارى ءبىزدىڭ ەلدە 2013 - جىلى وتكەن I حالىقارالىق بۇركىتشىلەر فەستيۆالىنە ارنايى شىعارىلعان «قىران بۇركىت» دەگەن فوتوالبومىمىزدا بولدى.
تاڭعالارلىعى، بىزدە رەسپۋبليكالىق دارەجەدە وسىنداي شارالار ۇيىمداستىرىلعاننىڭ وزىندە كورەرمەندەر سانى كوپ دەگەندە 10 مىڭنان اسپايدى. ال مۇندا 30 مىڭنان اسا كورەرمەن قاتىستى. قىتايداعى قانداستارىمىز بىزدە وتكىزىلەتىن شارالاردى ينتەرنەت جەلىسى ارقىلى تاماشالاپ، ۇنەمى باقىلاپ وتىراتىنىن، بىزدەگىدەي ەرەجەلەردى ساقتاپ وتكىزۋدى مۇرات تۇتقان ەكەن.
32 گرادۋس ايازدا التاي تورىندە ەكى جۇزدەي ءۇي تىگىلدى. سارشۇناق ايازعا قاراماستان، كۇن شايداي اشىق بولدى. راسىندا، ءبىز دە قانشاما جارىس وتكىزىپ جاتىرمىز، سول كۇنى ءاردايىم اشىق بولادى. قىران ءبىر سىلكىنسە مىڭ بالە قاشادى دەگەن بار. سول سياقتى بۇل دا ءبىر قىران قۇستىڭ كيەلىلىگىن كورسەتسە كەرەك. ەڭ اۋەلى، قۇسبەگىلىككە بايلانىستى عىلىمي- پراكتيكالىق كونفەرەنسيا ءوتتى. موڭعوليانىڭ بايان- ولگەي ايماعىنان كەلگەندەر بايانداما جاسادى.
ءبىر ايتا كەتەرلىگى، موڭعوليادا دا، قىتايدا دا سالت-ءداستۇرىمىز بەن قۇسبەگىلىك ونەردى زەرتتەپ جۇرگەن عالىمدار كوپ. ال بىزدە قۇسبەگىلىك حاقىندا ەڭبەكتەر جوقتىڭ قاسى.
كوپشىلىكتى قازاقستاندا قۇسبەگىلىك ءداستۇردىڭ قالاي دامىپ كەلە جاتقانى قىزىقتىردى. مەنىڭ باياندامامنىڭ تاقىرىبى «قازاقستانداعى بۇركىتشىلىكتىڭ دامۋى: بۇگىنى مەن كەلەشەگى» دەپ اتالدى. ۇلتتىق سپورتقا قۇسبەگىلىكتىڭ كىرگەنىنە تالاي ۋاقىت وتسە دە، بۇل سالانى زەرتتەۋشىلەر قاتارى از.
الكەي مارعۇلاننىڭ ءوزى «قازاقتىڭ قۇسبەگىلىك ونەرى ءالى دە زەرتتەلمەي تۇرعان تاريحىمىزدىڭ ۇلكەن تاراۋى» دەپ جازعان بولاتىن. شىنتۋايتىندا، ءا. مارعۇلاننان كەيىن بۇركىتشىلىك تۋرالى زەرتتەگەن ءسابيت مۇقانوۆ 1950 - جىلدارى ءوزىنىڭ زەرتتەۋ ەڭبەكتەرىندە «بۇركىتشىلىك - قازاقتىڭ ۇلتتىق سپورتىنىڭ ەڭ بيىك شىڭى» دەپ جازىپتى.
س. مۇقانوۆتىڭ سول ءبىر عانا ءسوزى الماتى وبلىسىندا العاشقى بۇركىتشىلەر مەكتەبىن اشۋعا تۇرتكى بولدى.
مەنىڭ قۇسبەگىلىككە كەلۋىمە اتامنىڭ اسەرى زور بولدى. توقتاسىن دەگەن اتام 1961 - جىلى قىتايدان اتامەكەنگە كەلگەندە بۇركىتىن وزىمەن بىرگە الىپ كەلگەن ەدى. تاڭەرتەڭ بۇركىتتىڭ شاڭقىلىنان وياناتىنبىز. بالا كۇنىمنەن بۇركىتشىلىككە دەگەن قىزىعۋشىلىعىمنىڭ اسەرى مول بولدى. ءسويتىپ، 1988 - جىلى قۇسبەگىلىك مەكتەپتىڭ شاڭىراعى كوتەرىلدى.
قازىر رەسپۋبليكا بويىنشا جۇزگە جۋىق قۇسبەگى بولسا، ءبىزدىڭ الماتى وبلىسى نۇرا اۋىلىنداعى «جالايىر شورا» مەكتەبىندە عانا 20 دان اسا بۇركىتشى بار. ەلىمىزدىڭ تۇكپىر- تۇكپىرىنەن ادامدار كەلىپ جاتادى. ەڭبەكشى قازاق اۋدانىندا ۇلتتىق سپورت مەكتەبىنىڭ جانىنان «سايات» ءبولىمى اشىلدى. 20 عا جۋىق بالا قازىر سوندا ءبىلىم الادى. ولار بۇل مەكتەپتە ون ءۇش جاستان باستاپ وقيدى. 5-6 جىل وسىندا ءبىلىم العان وقۋشى وقۋ بىتىرگەندە «سپورت شەبەرى» اتانسا، سپورت جانە تۋريزم اكادەمياسىنا جەڭىلدىكپەن وقۋعا قابىلدانادى.
وسى ماسەلەنى دەر كەزىندە كوتەرىپ، ونى وسىنداي دەڭگەيگە جەتكىزدىك. قازىر كوكشەتاۋ، قاراعاندى، اتىراۋ قالالارى مەن وڭتۇستىك قازاقستاندا، مەركى ەلدى مەكەنىندە سايات مەكتەبى اشىلىپ جاتىر.
جىل سايىن رەسپۋبليكالىق قۇسبەگىلەردىڭ «سونار» ۇلتتىق سپورت جارىسىن وتكىزەمىز.
بيىل دا جيىرما جەتىنشى رەت «سونار - 2015» اتتى قۇسبەگىلەر بايقاۋىن وتكىزدىك. جارىسقا اقمولا، اتىراۋ، شىعىس قازاقستان، قىزىلوردا، قاراعاندى، وڭتۇستىك قازاقستان، جامبىل، الماتى وبلىستارى مەن استانا قالاسىنان بارلىعى 44 بۇركىتشى مەن 5 قارشىعاسى بار قۇسبەگىلەر قاتىستى. قۇستىڭ سىنى، قۇسبەگىنىڭ كيىم ۇلگىسى، قۇستىڭ اڭعا ءتۇسۋ شەبەرلىگى، قۇسبەگىمەن اراقاتىناسى، شىرعا تارتۋ سىندى ءبىرىنشى كەزەڭنەن ىرىكتەلگەن 17 بۇركىت ەكىنشى كەزەڭدە قويانعا، تۇلكىگە سالۋ اقتىق اينالىمىنا ءوتتى.
قاتىسۋشىلاردىڭ باسىم بولىگى مەكتەپ وقۋشىلارى بولعانى قۋانتتى. ءسويتىپ، باس جۇلدەنى الماتى وبلىسى، ەڭبەكشى قازاق اۋدانى، نۇرا اۋىلىنىڭ تۇرعىنى ايبەك وتەگەن قانجىعاسىنا بايلاپ، 100000 تەڭگە اقشالاي سىيلىققا يە بولدى. Ⅱ ورىن وڭتۇستىك قازاقستاندىق باۋىرجان ءتاجىبايعا، Ⅲ ورىن الماتى وبلىسىنان كەلگەن ايان سەيىتجانعا بۇيىردى.
قارشىعا ۇشىرۋدا سەرىكبولسىن جالعاس ۇلى 1-ورىنعا، باعداۋلەت باباجانوۆ Ⅱ ورىنعا يە بولىپ، بەرىكبولسىن باباجانوۆ Ⅲ ورىندى ەنشىلەدى. قارشىعا ۇشىرۋدا جەڭىمپاز اتانعان جاس جەتكىنشەكتەردىڭ بارلىعى دەرلىك جامبىل وبلىسىنىڭ تۋمالارى.
وتكەن جىلى العاش حالىقارالىق بۇركىتشىلەر فەستيۆالىن وتكىزدىك. مىنە، سوندا ۇيىمداستىرۋ جاعىندا كەمشىلىكتەر بولدى. قاسقىردى ىرىكتەۋ دۇرىس بولمادى. قىراننىڭ كيەلىلىگى ول مىقتى قارسىلاستى تاڭداۋىندا. قىراندى جىبەرگەندە ول شاماسى جەتەتىن قاسقىرعا بارادى. ال قازىر بىزدە بۇركىتتى قاسقىر تۇرماق، تۇلكى، قويانعا سالۋدى شەكتەپ جاتىر. «ياف» دەگەن ەۋروپادان بەلگىسىز قوعامدىق ۇيىم بۇعان شەكتەۋ قويىپ وتىر. ولاردىڭ جارعىسىن ءبىز كورگەن جوقپىز. وندا قان شىعارۋعا، كوپكە قاندى كورسەتۋگە تىيىم سالىنعان ەكەن. جانسىز نە ويىنشىق تۇلكىنى سالعاننان ءبىز قۇسبەگىلىكتىڭ قاسيەتىن جوعالتىپ الاتىنىمىزدى ۇعىنعانىمىز ابزال. ءتۇزدىڭ قىرانى ەشقاشان جاساندى قويان مەن تۇلكىگە بارمايدى.
تاعى ءبىر ايتا كەتەتىن جايت، بولاشاقتا قىتاي مەن موڭعولياداعى باۋىرلارىمىزدى بىزدەگى ساياتشىلىق مەكتەبىمەن تانىستىرۋعا، تاجىريبە الماسۋعا شاقىرۋدى ۇيىمداستىرساق، نۇر ۇستىنە نۇر بولار ەدى. ولار قازاق جەرىنە كەلىپ، ۇيرەنگىسى كەلەدى. مەملەكەت تاراپىنان وسى ماسەلە قولعا الىنىپ، ۇيىمداستىرىلسا. ويتكەنى، قۇسبەگىلىكتى بۇگىن جانداندىرىپ، وسىنداي بايلانىستار ورناتپاساق ەرتەڭگى ۇرپاق بۇنى ۇمىتادى.
سونداي-اق قىراندى نە قويانعا، نە تۇلكىگە سالا الماي، جاساندى ءبىر تۇلكىگە سالساق بۇل دا ءداستۇردى ساقتاي الماۋىمىز.
ەندى كوكەيدەگى جۇرگەن مىنا ءبىر ماسەلەنى ايتۋ كەرەك. الماتى وبلىسىنداعى تاۋلى وڭىردە بۇركىتشىلەرگە ارنايى 2000 گەكتار جەر العان ەدىك. ال قازىر وسى جەردەن ايىرىلىپ قالامىز با دەگەن قاۋىپ بار. ءبىزدىڭ جارعىدا بۇل جەردە ەكولوگيانى ساقتاۋ، قۇسبەگىلىكتى دامىتۋعا ارنالعان دەلىنگەنمەن، سان ءتۇرلى سىلتاۋمەن، اۋدان اكىمشىلىگىنىڭ ارالاسۋىمەن جەرىمىزگە باسقا كومپانيانىڭ كوزى ءتۇسىپ وتىرعانىنا 3-4 جىل بولدى. ءۇش رەت قىلمىستىق ءىس قوزعالىپ، كومپانيانىڭ قازۋ جۇمىستارىن توقتاعانىمەن، تۇبەگەيلى شەشىلمەي تۇر. زاڭ جۇزىندە بۇل بۇركىتشىلەردىڭ جەرى. سوندىقتان ۇلتتىق دۇنيەگە جەرگىلىكتى جەردەگى شەنەۋنىكتەردىڭ كوزقاراستارى وزگەرسە دۇرىس بولار ەدى.
سارسەنبەك قىزايبەك ۇلى:
- بۇل ساپار جاڭا ويلار، تىڭ باستامالارعا سەرپىن بەردى. بارىنەن دە، كوك تۋىمىزدى ەل الدىنا شىعارىپ، كوتەرگەنىمىز اسەرلى بولدى. جارىس اياقتالعان سوڭ سول جاقتاعى قانداستارىمىزدىڭ تۋدى كورىپ، كوزدەرىنە جاس العاندارىن بايقادىق. تۋدى يىسكەپ، ءسۇيىپ، وسىلايشا اتامەكەنگە دەگەن ساعىنىشىن باسقانداي بولدى. ءتىپتى ءبىزدىڭ باياندامامىز وقىلعاندا جينالعان ءدۇيىم جۇرتتىڭ كوز جانارىنان ەلگە، جەرگە دەگەن ماحابباتىن، قۇرمەتىن اڭعاردىق.
قىتايداعى قازاقتاردىڭ تۇرمىس- تىرشىلىگىن كوپتەن بەرى تۇسىرەتىن قىتاي فوتوگرافىمەن بىرگە ءبىراز جەردى ارالادىق. قىتاي قازاقتىڭ سالت- داستۇرلەرىن كورسەتۋ ارقىلى شەتەلدەن تۋريستەردى كوبىرەك تارتاتىن كورىنەدى. تۋريزمدى ناسيحاتتايتىن باستى قۇرال دا وسى قۇسبەگىلىك ەكەن. ال ءبىز بولساق، قولىمىزدا بار التىندى باعالاماي وتىرمىز.
قىتايدا فوتوجۋرناليستيكا اقپاراتتىق، سالت-سانا، تابيعات، سپورت سىندى سالالارعا بولىنگەن. حالىقتىڭ داستۇرگە، وسىناۋ جارىسقا دەگەن قىزىعۋشىلىعى تاڭداندىردى. تاعى ءبىر ايتا كەتەتىن جايت، بۇل ەلدەگى ارىپتەستەرىمىزدىڭ فوتواپپاراتتارىنىڭ ءوزى زامانعا ساي، سوڭعى ۇلگىدە. ءبىر بايقاعانىمىز، ەلدە فوتوتىلشىلەر نە جۋرناليستەر بولسىن، ولاردىڭ ەڭبەگى جوعارى باعالانادى.
سالت- سانا مادەنيەتى سالاسىنىڭ پروفەسسورى، بەلگىلى فوتوسۋرەتشى تۇسىپبەك سلامقۇل ۇلىمەن كەزدەسۋ بولدى. قىتايدا «سالت- سانا» دەگەن فوتوسۋرەتشىلەر قوعامى بار. ولار ءتورت جىلدا ءبىر رەت حالىقارالىق دارەجەدە فوتوبايقاۋ وتكىزەدى. قازاقتىڭ كوشپەلى تۇرمىسىنان فوتورەپورتاج دايىنداعان سەرىك مۇقىش اعامىز سول بايقاۋدا جۇلدەگەر بولىپتى. ال بىزدە بۇنداي بايقاۋ جوق. جالپى ول جاقتا قۇسبەگىلىك ەڭ اۋەلى فوتو ارقىلى ناسيحاتتالادى. مۇنىڭ اسەرى ەرەكشە كورىنەدى.
اقبوتا يسلامبەك
kazgazeta.kz
