رەسەي باسىلىمدارى گولوۆكيندى «رەسەيلىك» دەپ اتادى
رەسەيدىڭ گازەتا. رۋ دەگەن پورتالىنىڭ ءتىلشىسى الەكساندر سەدوۆ ەسىمدى ءتىلشىسى گەننادي گولوۆكين مەن مارتين ميۋررەي اراسىنداعى جەكپە-جەكە شولۋ جاساپتى. اۆتور ماقالانىڭ تاقىرىبىن: «رەسەيلىك نوكاۋتشىنىڭ 32-مۇمكىندىگى» دەگەن.
بۇل جايت قازىر عالامتورعا قىزۋ تالقىلانۋدا. ءبىراق، ماقالا جاريالانعان سوڭ بىرنەشە مينۋتتان كەيىن ونىڭ تاقىرىبىن «قازاقستاندىق نوكاۋتشىنىڭ 32-مۇمكىندىگى»، - دەپ اۋىستىرىپ ۇلگەرگەن.
دەگەنمەن دە، ماقالانىڭ ءتۇپ نۇسقاسىن سۋرەتكە ءتۇسىرىپ العاندار دا بار. ونى جوعارىدا سۋرەتتەن كورۋگە بولادى. نەگىزى، رەسەيلىك باسىلىمدار گولوۆكيندى ورىستىڭ باتىرى دەپ ءبىرىنشى رەت ايتىپ وتىرعان جوق.
بۇعان دەيىن سولتۇستىكتەگى كورشىلەرىمىزدىڭ بەلدى دەگەن باسىلىمدارى ءبىزدىڭ داڭقتى بىلعارى قولعاپ شەبەرىمىزدى «وزىمىزدىكى» دەگەن ەدى. ال گولوۆكيننىڭ جەكپە-جەكتەرىن جۇرگىزگەن رەسەيلىك كوممەنتاتورلار: «گولوۆكين ورىس حالقىنىڭ باتىرى» دەگەنگە ساياتىن اڭگىمە ايتقان.
ءتىپتى، ول جاقتا گولوۆكين رەسەيدىڭ نامىسىن قورعايدى دەگەن دە اڭگىمە بولعان. ءبىراق، بۇل الىپ-قاشپا اڭگىمەگە گەنناديدىڭ ءوزى نۇكتە قويدى.
ول سۇحباتتارىنىڭ بىرىندە: «مەن قازاقستاندا دۇنيەگە كەلدىم. مەنىڭ وتباسىم وسىندا. بوكستىڭ الىپپەسىن قازاقستاندا ۇيرەندىم. وسىدان كەيىن مەن رەسەيدىڭ نامىسىن قالاي قورعايمىن؟ بۇعان سەنبەڭىزدەر. مۇنىڭ ءبارى وتىرىك اڭگىمە»، - دەگەن ەدى.
