بوكس تاريحىندا بۇرىن-سوڭدى بولماعان ەڭ قىمبات ايقاس وتەدى

ال پاكياو شامامەن 80 ميلليون دوللار الادى. بوكس تاريحىندا ءالى بىردە-ءبىر بوكسشى ءبىر كەزدەسۋدە مۇنداي كولەمدە سىياقى الىپ كورگەن ەمەس، - دەپ حابارلايدى allboxing.ru پورتالى.

ۇستىمىزدەگى جىلى 2- مامىردا لاس-ۆەگاس قالاسىنىڭ (ا ق ش، نيەۆادا شتاتى) MGM Grand (قوناق ءۇي-ويىن-ساۋىق كەشەنى، سيىمدىلىعى 16800 ادام) سپورت ارەناسىندا الەمنىڭ ەڭ ۇزدىك بوكسشىلارى رەيتينگىنىڭ كوشباسشىسى، WBC جانە (WBA (Super نۇسقالارى بويىنشا جارتىلاي ورتا سالماق (66,678 كەلى) جانە ءبىرىنشى ورتا سالماق (69,85 كەلى) دارەجەلەرىندەگى الەم چەمپيونى، 37 جاستاعى امەريكالىق بىلعارى قولعاپ شەبەرى كىشى فلويد مەيۆەزەر (47-0, 26 ك و) مەن WBO نۇسقاسى بويىنشا جارتىلاي ورتا سالماق دارەجەسىندەگى الەم چەمپيونى، 36 جاستاعى فيليپپيندىك بوكسشى مەنني پاكياو (57-5-2, 38 ك و) قولعاپ تۇيىستىرەدى.

بۇل كەزدەسۋدىڭ اسا وزگەشە بولاتىندىعى ازىردەن-اق بايقالۋدا. جەكپە-جەك تۋرالى رەسمي حابار تاراتىلا سالىسىمەن، 15 مينۋتتىڭ ىشىندە MGM Grand قوناق ءۇيىنىڭ بارلىق نومىرلەرى 2-3 - مامىر كۇندەرى بويىنشا ساتىلىپ كەتىپتى.

ال بيلەتتەردىڭ باعاسى ازىرگە بەلگىلەنبەگەن. ءبىراق، ونىڭ رەكوردتىق دەڭگەيدە بولاتىندىعى ايدان انىق. ەڭ قىمبات بيلەتتەر 5000 دوللارعا جەتەدى دەپ كۇتىلۋدە. بۇعان دەيىن بيلەتتەردىڭ باعاسى ەشقاشاندا 2500 دوللاردان اسپاعان ەكەن.

سونىمەن، الداعى جەكپە-جەك جارتىلاي ورتا سالماق (147 فۋنت؛ 66,7 كەلى) دارەجەسىندە وتەدى. بۇل جەردە قاتارىنان ءۇش الەم چەمپيونى اتاعى - مەيۆەزەرگە تيەسىلى (WBA (Super جانە WBC جانە پاكياوعا تيەسىلى WBO نۇسقالارى ساراپقا سالىنادى.

سىياقى مولشەرى مەيۆەزەردىڭ پايداسىنا قاراي 60 تا 40 ۇيلەسىمىمەن بولىنەتىن بولدى. الدىن الا ەسەپ بويىنشا بيلەتتەردى ساتۋدان تۇسەتىن تابىس شامامەن 40 ميلليون دوللاردى قۇراسا، اقىلى PPV- ترانسلياتسيادان تۇسەتىن تابىس 250 ميلليون دوللاردان اسۋى مۇمكىن. الايدا، بۇل سومانىڭ جارتىسىن PPV وپەراتورلار الاتىنى بەلگىلى. ترانسلياتسيالاۋ قۇقىعىن باسقا ەلدەرگە ساتۋدان تۇسەتىن تابىس 30 ميلليون دوللاردان اسۋى ىقتيمال. سونداي-اق، كەزدەسۋگە قاتىستى اتريبۋتتاردى ساتۋدان دا قوماقتى تابىس تۇسەتىنى انىق. ودان باسقا، بىرنەشە ءىرى كومپانيا الداعى كەزدەسۋگە دەمەۋشى بولۋعا نيەت ءبىلدىرىپ وتىر.

بوكس سۇيەر قاۋىم كوپتەن كۇتكەن بۇل جەكپە-جەكتىڭ بولاتىندىعىن ەڭ الدىمەن الەمنىڭ ەڭ ۇزدىك بوكسشىلارى رەيتينگىنىڭ كوشباسشىسى 37 جاستاعى فلويد مەيۆەزەردىڭ ءوزى الەۋمەتتىڭ جەلىلەردىڭ بىرىندە ۇستىمىزدەگى جىلدىڭ 21- اقپانىنا قاراعان ءتۇنى جاريالادى.

«بۇكىل الەم تاعاتسىزدانا كۇتكەن جەكپە-جەككە جول اشىلدى. مەيۆەزەر پاكياوعا قارسى، 2- مامىردا، مامىلە جاسالىندى. مەن جانكۇيەرلەرگە بۇعان قول جەتكىزىلەدى دەپ ۋادە بەرىپ ەدىم عوي. مىنە، سولاي بولدى دا. 2- مامىردا ءبىز تاريحي جەكپە-جەكتى نازارلارىڭىزعا ۇسىنامىز. جىبەرىپ الماڭىزدار»، - دەپ جازدى مەيۆەزەر.

كوپ ۇزاماي 36 جاستاعى مەنني پاكياو الەۋمەتتىك جەلىلەردىڭ بىرىندەگى ءوز پاراقشاسىندا بۇل جاعدايعا قۋانىشتى ەكەندىگىن ءبىلدىردى.

«ءبىز فلويد ەكەۋمىز جانكۇيەرلەر نازارىنا، ولار تالاي جىلدان بەرى سارعايا كۇتكەن جەكپە-جەكتى ۇسىنا الاتىندىعىمىزعا وتە قۋانىشتىمىن. مەن بۇل كەزدەسۋدى، ونى كۇتكەن جانكۇيەرلەرگە جانە فيليپپين حالقىنا ارنايمىن» - دەدى پاكياو.

ايتا كەتەلىك، ەكى بوكسشىنىڭ كەزدەسۋ جايىندا كەلىسسوزدەرى سوناۋ 2010-جىلدان بەرى جۇرگىزىلىپ كەلە جاتقان ەدى. ول كەزدە باستى ماسەلە كەڭەيتىلگەن دوپينگ-تەست بولدى. پاكياو مەيۆەزەردىڭ بارلىق شارتىنا كونگەن سوڭ، بۇل ماسەلە شەشىلدى. ەندى دوپينگ-تەستى نيەۆادا شتاتىنىڭ اتلەتيكالىق كوميسسياسىنىڭ (NSAC) قاتىسۋىمەن USADA (بۇكىل الەمدىك دوپينگكە قارسى اگەنتتىكتىڭ امەريكالىق بولىمشەسى) ۇيىمى جۇرگىزەتىن بولدى.

جەكپە-جەكتى بوكس تاريحىندا وسىمەن ەكىنشى رەت HBO جانە Showtime تەلەارنالارى بىرلەسە ترانسلياتسيالايتىن بولادى. مەيۆەزەر Showtime, ال پاكياو HBO تەلەارناسىمەن كەلىسىم-شارتقا وتىرعانى بەلگىلى. ەستەرىڭىزدە بولسا، ءبىرىنشى رەت مۇنداي بىرلەسكەن ترانسلياتسيا 2002-جىلى مايك تايسون مەن لەننوكس ليۋيس اراسىنداعى كەزدەسۋدە جۇرگىزىلگەن بولاتىن.

كەزدەسۋ اقىلى ترانسلياتسيا جۇيەسى بويىنشا كورسەتىلەدى.

رينگ انونسەرلەر مايكل باففەر مەن دجيممي كىشى-لەننون بولادى. ياعني، باففەر HBO وكىلى رەتىندە پاكياونىڭ شىعۋىن، سايكەسىنشە لەننون مەيۆەزەردىڭ شىعۋىن جاريالايدى.

ءاربىر بوكسشى ءوزى قالاعان قولعاپتى تاڭدايدى. ايتا كەتەلىك، مەيۆەزەر Grant فيرماسىنىڭ، ال پاكياو Cleto Reyes- ءتىڭ قولعابىن كيەتىنى بەلگىلى.

اۆتور: جاپپاربەرگەن ايبوتا

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى