سيرياداعى سۇلەيمان شاح كەسەنەسى قاۋىپسىز جەرگە كوشىرىلدى
كەشە ساعات 21:00 دە تۇركيانىڭ قارۋلى كۇشتەرى 39 تانك پەن 100 دەن استام اسكەري كولىك جانە 750 جاۋىنگەرمەن ەكى كەڭ اۋقىمدى وپەراتسيا جۇرگىزدى. ونىڭ بارىسىندا سۇلەيمان شاح كەسەنەسىن 8 ايدان بەرى كۇزەتىپ كەلگەن 44 كۇرەڭ بەرەتتى سارباز ەلگە امان-ساۋ قايتارىلدى. سونداي-اق كەسەنەدەن مەملەكەتتىك تۋلار مەن بەلگىلەر، ءدىني راسىمدەردىڭ ساقتالۋىمەن زيراتتان ءۇش تابىت قازىلىپ الىندى. قازىر كەسەنە سيريانىڭ ەشمەسي اۋىلىنا ۋاقىتشا كوشىرىلگەنىن حابارلايدى haberler.com سايتى.
1921-جىلى 20- قازاندا تۇركيا مەن فرانسيا ۇكىمەتتەرىنىڭ كەلىسىمىمەن وسمان يمپەرياسىنىڭ نەگىزىن قالاۋشى وسمان گازيدىڭ اتاسى سۇلەيمان شاح كەسەنەسى جانە وعان تيەسىلى جەر اۋماعى تۇگەلىمەن تۇركيا رەسپۋبليكاسىنىڭ يەلىگى دەپ تانىلعان. سول سەبەپتى ەل اۋماعىنان تىس جاتقان ماڭىزدى نىساندى تۇركيانىڭ قارۋلى كۇشتەرى وسى ۋاقىتقا دەيىن سالتاناتتى قاراۋىل قويىپ، كۇزەتىپ كەلگەن ەدى. الايدا سيرياداعى لاڭكەستىك ۇيىمداردان قارۋلى شابۋىل بولۋى مۇمكىن ەكەندىگىن ەسكەرگەن تۇرىك بيلىگى كەسەنەنى قاۋىپسىز جەرگە كوشىرۋ جونىندە شەشىم قابىلدادى، دەپ جازادى 24.kz.
