قانات يسلامنىڭ كەلەسى جەكپە-جەگى قاشان بولادى؟
«قانات يسلام امەريكادا جاتتىعۋ جاساپ جاتىر. ونىڭ كەلەسى جەكپە-جەگى 23- ناۋرىزعا بەلگىلەنگەن. قارسىلاسى ازىرگە بەلگىسىز. قانات WBC بوكس قاۋىمداستىعىنىڭ رەيتينگىندە ۇزدىك بوكسشىلاردىڭ قاتارىندا، تاعى ءبىر كەزدەسۋ وتكىزسە، ۇزدىك بەستىككە ەنەدى. قانات تا، ونىڭ كومانداسى دا قارجىدان ەش قينالىپ وتىرعان جوق»، - دەيدى ب. وسپانوۆ.
جەكپە-جەك دومينيكان رەسپۋبليكاسى، كولۋمبيا نەمەسە ا ق ش- تا ءوتۋى مۇمكىن. ايتا كەتۋ كەرەك، قانات يسلام بۇگىنگە دەيىن بارلىق كەزدەسۋلەرىن شەتەلدەردە - ەكۆادور، كولۋمبيا جانە دومينيكان رەسپۋبليكاسىندا وتكىزدى. قازاقستاندىق بوكسشىنىڭ پروموۋتەرى نەلسون لوپەس بۇعان دەيىن بىرنەشە رەت قاناتتىڭ قازاقستاندا جەكپە-جەك وتكىزۋى ىقتيمال ەكەنىن ايتقان بولاتىن.
قانات يسلام كاسىبي بوكستا 18 جەكپە-جەك وتكىزىپ، بارلىعىندا جەڭىسكە جەتتى (15 نوكاۋت)، ول WBA Fedelatin بەلبەۋىن يەمدەنگەن. سونىمەن قاتار، وتانداسىمىز ماسكەۋدە ارگەنتينالىق گۋيدو نيكولاس پيتتومەن ورتا سالماقتاعى WBC International Silver اتاعىن ساراپقا سالۋى ءتيىس بولاتىن. الايدا، بۇل كەزدەسۋ بەلگىسىز سەبەپتەرمەن كەيىنگە شەگەرىلدى.
