ەلوردادا وڭىرلەردەن كەلگەن وزگە ۇلت وكىلدەرى اراسىندا قازاق ءتىلىن بىلۋدەن بايقاۋ ءوتىپ جاتىر

بۇل تۋرالى بۇگىن استانادا ق ر مادەنيەت جانە سپورت مينيسترلىگى تىلدەردى دامىتۋ جانە قوعامدىق-ساياسي جۇمىس كوميتەتى باسقارماسىنىڭ باسشىسى تولقىن يساكوۆا ءمالىم ەتتى.

«ءتىل - تاتۋلىق تىرەگى» رەسپۋبليكالىق بايقاۋى قازاقستان حالقى اسسامبلەياسىنىڭ جىلى اياسىندا ۇيىمداستىرىلىپ وتىر.

اتاپ ايتقاندا، بۇگىن استاناداعى اقتىق سايىسقا وڭىرلەردە جەڭىمپاز بولىپ تانىلعان 16 ادام كەلىپ وتىر. سونىمەن قاتار ولارعا جانكۇيەر رەتىندە وڭىرلەردەن 150 گە جۋىق ارنايى دەلەگات كەلدى. ەلورداداعى قورىتىندى كەزەڭ ەكى كۇنگە جالعاسادى، ياعني بۇگىن «مەملەكەتتىك ءتىلدى ءبىلۋ - بۇل...» دەگەن تاقىرىپتا ۇمىتكەرلەر ەسسە جازدى.

ال ەرتەڭ بايقاۋدىڭ ەكىنشى كەزەڭى اياسىندا بارلىق ۇمىتكەرلەر ءوز وڭىرلەرىن تانىستىرۋ مەن «وي جارىس» سايىسى بويىنشا سۇراقتارعا جاۋاپ بەرەدى»، - دەدى ول.

سونداي-اق ەرتەڭ قازىلار القاسى قاتىسۋشىلاردىڭ بىلىكتىلىگىن ساراپتاپ، ماراپاتتاۋ شاراسى وتەتىن بولادى. جەڭىمپازدار مەن قاتىسۋشىلارعا اقشالاي جانە ىنتالاندىرۋ سىيلىقتارى تابىستالادى.

«بۇل جولى مەملەكەتتىك ءتىلدى جەتىك مەڭگەرگەن مەملەكەتتىك قىزمەتتەگى، بيۋدجەتتىك مەكەمەدەگى 18-30 جاس ارالىعىنداعى جاستاردى قامتۋعا تىرىستىق. بايقاۋعا ءتۇرلى سالانىڭ قىزمەتكەرلەرى قاتىستى»، - دەدى ت. يساكوۆا.

ايتا كەتەيىك، بايقاۋعا قازاقستاندا تۇراتىن ەتنوس وكىلدەرى قاتىستى. شارانىڭ ماقساتى - وزگە ەتنوس وكىلدەرىنىڭ اراسىندا مەملەكەتتىك ءتىلدىڭ قولدانىس اياسىن ارتتىرۋ. بايقاۋ بيىلعى 12 - قاڭتاردا ايماقتاردا باستالدى. وسى ورايدا ۇمىتكەرلەر وڭىرلىك كەزەڭدە «ءتىل - تاتۋلىق تىرەگى» تاقىرىبىندا بەينەروليك سايىسىنا قاتىسقان بولاتىن.

اۆتور: رۋسلان عابباسوۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى