ءالي وقاپوۆ «قازاقستان داۋىسى» جوباسىنىڭ فيناليسى ينديرا ەدىلبايەۆاعا پروديۋسەر بولدى

ءانشى مەن ديرەكتورى ارنايى تىلشىلەرمەن كەزدەسۋ وتكىزىپ، رەسمي تۇردە جوبالارىنىڭ اتىن جاريالاپ، بىرگە سۇحبات بەردى.

كەزەكتى جاڭا جوباسى بىرنەشە كۇن بۇرىن عانا اياقتالعان «قازاقستان داۋىسى» مەگاجوباسىنىڭ فيناليسى ينديرا ەدىلبايەۆا ەسىمدى جاس ارۋ. ەندى ينديرانىڭ مۋزىكالىق پروديۋسەرى - ءالي وقاپوۆ، ال پروديۋسەرى - ەرلان اليموۆ.

«جالپى ينديرامەن تانىس بولعانىمىزعا 2 جىلداي ۋاقىت بولدى. ءبىر-ءبىرىمىزدى ورتاق تانىستارىمىز ارقىلى بىلەتىنبىز. وسىدان بىرنەشە اي بۇرىن ديرەكتورىم ەرلان ماعان «جاڭا جوبا الايىق» دەپ ۇسىنىس جاساعان بولاتىن.

سودان ءبىز عالامتور ارقىلى كاستينگ جاريالادىق. ناتيجەسىندە 400 گە جۋىق حاتتار مەن ۇسىنىستار كەلىپ ءتۇستى. وكىنىشكە وراي كوبىسى دۇرىس شارت بويىنشا جىبەرمەگەن. دۇرىس حات جىبەرگەندەردىڭ ىشىنەن ينديرانىڭ حاتىن قابىلدادىق.

العاشىندا تاڭ قالدىم. سەبەبى، مەن وسىعان دەيىن ينديرانىڭ جەكە ءانشى رەتىندە بىزبەن جۇمىس ىستەگىسى كەلگەندىگىن بىلگەن جوقپىن. ەرلانعا «ينديرانى تاڭدايمىن» دەپ ايتتىم. كەيىننەن كەزدەسىپ، سويلەسىپ، قانداي ادام ەكەنىن، مىنەزىن، جوسپارلارىن بىلگەن سوڭ وسىنداي ورتاق شەشىمگە كەلدىك.

ينديرا وسىدان ەكى جىل بۇرىن عانا الماتىعا كەلدى. نەگىزى - اقتوبەلىك. وسىعان دەيىن دە كوپتەگەن ءان بايقاۋلارعا قاتىسىپ جۇرگەن قىز. ءبىزدىڭ كاستينگتەن وتكەنىن ەستىگەندە وتە قۋانىشتى بولدى. سەبەبى، بۇنداي جاۋاپ كۇتپەگەن ەكەن. مەنىڭ ويىمشا، ينديرا جارتىلاي بولسا دا دايىن ءانشى.

داۋىسىنىڭ قۋاتتىلىعى، ءان ايتۋ شەبەرلىگى، مۋزىكالىق قابىلەتى وتە بيىك دەڭگەيدە. بالا كەزىنەن مۋزىكانى ءسۇيىپ وسكەن جانە قاراپايىمدىلىعى ماعان ۇنايدى. ادام رەتىندە ادامگەرشىلىگى مول، مىنەزى ءالى كىشكەنتاي بالاداي، وتە سۇلۋ. وسىنداي قاسيەتتىڭ ءبارى ءبىر ادامدا جينالعانى وتە قۋانتادى. سەبەبى، وزدەرىڭىزدە بىلەسىزدەر كوبىسىندە ءتۇرى بولسا ءان ايتا المايدى، ال ءان ايتا السا ءتۇرى كەلمەي جاتادى.

وسىدان بىرنەشە كۇن بۇرىن عانا بىلەسىزدەر «قازاقستان داۋىسى» جوباسى اياقتالىپ، ينديرا فينالعا دەيىن جەتىپ، 3-ورىن يەگەرى اتاندى. بۇل ءبىز ءۇشىن ۇلكەن كورسەتكىش بولدى. وسى جوبا ارقىلى حالىقتىڭ ينديراعا دەگەن كوزقاراسىن بىلدىك، تەكسەرىپ الدىق. بىرىنشىدەن، مادينا ءسادۋاقاسوۆاعا العىسىمدى ايتقىم كەلەدى. ماديناسىز ول فينالعا جەتپەس ەدى. ال جەڭىمپازعا كەلەتىن بولسام، باۋىرجاندى مەن مويىندايمىن. ول - «قازاقستان داۋىسى» اتاعىنا لايىقتى ءانشى.

جوبادان كەيىن كوپ انشىلەر جوق بولىپ كەتىپ جاتادى. ونىڭ ارى قاراي ءوسۋى تىكەلەي دارىنىنا بايلانىستى. وسى ورايدا ءبىز ينديرانىڭ ساحنادان كەتپەۋىنە، جوعالماۋىنا كۇش سالامىز. ينديرانىڭ ءوزىنىڭ قايتالانباس داۋىسى بار. ءان ايتۋ شەبەرلىگى جوعارى. ءبىراق باعىت جاعىنان ءالى ەشتەڭە ايتا المايمىز. ينديرا جوبادا ءتۇرلى جانردا ءوز- ءوزىن سىنادى. ءبىراق ءالى ءبىر ناقتى باعىتتى تاڭداعان جوقپىز.

الدا بىزدە ينديرامەن بىرگە ۇلكەن جوسپارلار بار. قازىر 6-7 اۆتورلىق اندەرى بار. ونىڭ ەكەۋىن مەن ءوزىم جازدىم. 2-3 فوتوسەسسياسى بار. ەندى بۇگىننەن باستاپ رەسمي تۇردە سۇحبات بەرە الامىز»، - دەدى ءالي وقاپوۆ.

ال ەرلان اليموۆ: «ينديرانىڭ ەرەكشەلىكتەرى كوپ. وتە ادەمى، تالانتتى، تاربيەلى قىز. سونىمەن قاتار، جۇمىسقا دەگەن جاۋاپكەرشىلىگى جوعارى، ەشقاشان كەشىكپەيدى.

مەن بۇرىن ءانشى بولعانمىن. سول كەزدەن باستاپ پروديۋسەر بولۋ ويىمدا ءجۇردى. قازىر سول ويدى جۇزەگە اسىرىپ جاتىرمىن. ءبىرىنشى جوبام دينارا سۇلتان بولدى. دينارامەن كوپتەگەن جۇمىستار اتقاردىق.

الدا ينديرامەن ەڭ ءبىرىنشى جوسپار ول بەينەبايان ءتۇسىرۋ. ءان دايىن تۇر، تەك ينديرانىڭ داۋىسىن جازۋ كەرەك. وسى 1-2 اپتادان كەيىن بەينەباياننىڭ ءتۇسىرىلىم جۇمىستارى باستالادى. بۇگىن ينديرانى تانىستىرىپ، العاشقى قادامىمىزدى باستادىق. الدا ءالى جوسپارلار كوپ. ينديرانىڭ داۋىسىنا قاراساق، بولاشاقتا ءان بايقاۋلارعا بارۋعا بولادى»، - دەيدى.

 

 

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى