ق. توقايەۆ ماجارستاننىڭ سىرتقى ەكونوميكا جانە سىرتقى ىستەر ءمينيسترىن قابىلدادى
ق. توقايەۆ قازاقستاننىڭ ماجارستانمەن قارقىندى جانە جان-جاقتى ىنتىماقتاستىقتى دامىتۋعا مۇددەلى ەكەنىن اتاپ ءوتتى.
جوعارعى پالاتانىڭ باسشىسى مەيماندى پارلامەنتتىڭ زاڭ شىعارۋ قىزمەتىمەن تانىستىرا كەلىپ، قازاقستان رەسپۋبليكاسىنىڭ پرەزيدەنتى ن. ءا. نازاربايەۆقا كەزەكتەن تىس پرەزيدەنت سايلاۋىن تاعايىنداۋ تۋرالى ماسەلەنى قاراۋدى وتىنگەن بۇگىن سەناتتا قابىلدانعان ۇندەۋ تۋرالى حاباردار ەتتى.
ق. توقايەۆ قازاقستان حالقى اسسامبلەياسىنىڭ باستاماسى بارشا حالىقتىڭ قىزۋ قولداۋىنا يە بولىپ، قازاقستاندىق قوعامدا وڭ پىكىرلەر تۋعىزعانىن اتاپ ءوتتى: «حالىقارالىق احۋال شيەلەنىسە تۇسكەندە جانە جاھاندىق ەكونوميكاداعى داعدارىستار كۇشەيگەن قازىرگى جاعدايدا ءبىزدىڭ پرەزيدەنت كەپىلى بولىپ تابىلاتىن ىشكى ساياسي تۇراقتىلىقتى قامتاماسىز ەتۋ اسا ماڭىزدى» .
حالىقارالىق ماسەلەلەردى، اتاپ ايتقاندا ۋكرايناداعى احۋالدى تالقىلاي كەلىپ، جۇزدەسۋشىلەر ۇلتتىق ەكونوميكانىڭ ءوزارا بايلانىستارى جاعدايىندا سانكتسيالاردى ەنگىزۋ - ۋشىقتىرۋعا اپاراتىنىن ايتتى.
تاراپتاردىڭ پىكىرىنشە، قايشىلىقتاردى ەڭسەرۋ، ءوزارا ءتيىمدى شەشىمدەر ىزدەستىرۋ مەن ىمىراعا كەلۋ ماقساتىندا ەۋروپا وداعى مەن رەسەي اراسىنداعى سىندارلى ءۇنقاتىسۋدى جاڭعىرتۋ جانە نىعايتۋ قاجەت. ق. توقايەۆ ۋكراين شيەلەنىسىن رەتتەۋ جونىندەگى قازاقستان پرەزيدەنتىنىڭ بەلسەندى قىزمەتى تۋرالى حاباردار ەتتى.
الەمدىك جانە ءداستۇرلى دىندەر ليدەرلەرى سەزى حاتشىلىعىنىڭ باسشىسى ق. توقايەۆ 2015 -جىلعى 10-11 - ماۋسىمدا وتەتىن بەسىنشى سەزگە ازىرلىك تۋرالى پ. سييارتونى حاباردار ەتتى. «سەزد بەيبىتشىلىك پەن دامۋ جولىندا ءدىني كوشباسشىلار مەن ساياسي قايراتكەرلەردىڭ ءۇنقاتىسۋىنا ارنالادى»، - دەدى سەنات ءتوراعاسى. پ. سييارتو قازىرگى الەمدەگى تۇراقسىزدىق جاعدايىندا اسا ماڭىزدى بولىپ وتىرعان ۇلتارالىق جانە كونفەسسياارالىق بەيبىتشىلىك پەن كەلىسىمنىڭ قازاقستاندىق ۇلگىسىن جوعارى باعالادى.
اۆتور: سەرىك قاراجان
