پەتر پوروشەنكو تۇتقىنداردىڭ ءبارىن دەرەۋ بوساتۋدى تالاپ ەتتى
پوروشەنكو ءۇش ەلدىڭ باسشىسىنا دەبالتسيەۆودا بولعان وقيعانىڭ مينسك كەلىسىمىنە سايكەس جاسالعانداي سىڭاي تانىتپاۋعا شاقىردى.
سونىمەن قاتار، ول كەلىسىمنىڭ الداعى ۋاقىتتا بۇزۋ ارەكەتتەرى بولسا، كەپىلدىكتەردى ناقتىلاپ جاساۋ كەرەكتىگىن مالىمدەدى.
مەملەكەت باسشىلارى ە ق ى ۇ ارنايى باقىلاۋ ميسسياسى وكىلدەرىنىڭ تولىقتاي قاتىسۋىنا، باقىلاپ، انىقتاۋ ىسىنە ولاردىڭ اتىس بولعان دونەتسك اۋەجايى، گورلوۆكا، پەرۆومايسك، شيروكينو جانە تاعى باسقا جەرلەرگە بارۋعا مۇمكىندىگى بولۋىنا كەلىستى.
باسپا ءسوز قىزمەتىنىڭ تاراتقان اقپاراتىندا وق اتۋ بارىنە ورتاق جاعدايدا توقتاتىلعاننان كەيىن تەحنيكانىڭ ەقىۇ باقىلاۋى ايماعىنا جەتكىزىلۋى ءتيىس ەكەندىگى جازىلعان. تەكسەرۋ جانە باقىلاۋ جونىندەگى ورتالىق اۋىر تەحنيكانىڭ، ارتيللەريانىڭ جانە زىمىران جۇيەسىن اكەتۋدىڭ جوسپارىن دايىنداۋدى باستاۋ كەرەك ەكەنى تۋرالى مالىمدەمە جاسالدى.
پەتر پوروشەنكو بارلىق تۇتقىندى، ونىڭ ىشىندە دەبالتسيەۆو اۋدانىندا تۇتقىنعا تۇسكەندەردى بوساتۋدى تالاپ ەتتى.
تاراپتار وسى اپتادا بۇل ماقساتتاردى ورىنداۋ جونىندەگى سىرتقى ىستەر مينيسترلەرى دەڭگەيىندەگى ءىس-ارەكەتتى ۇيلەستىرۋگە ۋاعدالاستى. ۋكراينا جاعى بۇل ديسكۋسسيالارعا بىتىمگەرلەردى تىكەلەي قاتىناس جەلىسىنەن دە، ۋكراينا مەن رەسەي شەكارالارىنىڭ مەملەكەتارالىق جەلىدەن دە تارتۋ ماسەلەسىنىڭ قوسىلۋىن تالاپ ەتتى. ەسكە سالا كەتەيىك، مينسك كەلىسسوزدەرى 12 - اقپان كۇنى اياقتالدى.
وعان پەتر پوروشەنكو، ۆلاديمير پۋتين، فرانسۋا وللاند، انگەلا مەركەل جانە د ح ر باسشىسى الەكساندر زاحارچەنكو مەن ل ح ر باسشىسى يگور پلوتنيتسكي قاتىستى. كەلىسسوزدەر قورىتىندى دەكلاراتسيامەن اياقتالدى، وندا 15 - اقپاننان باستاپ اتىستى توقتاتۋ، ارتيللەريا جۇيەسىن كەم دەگەندە 50 شاقىرىمنان الىسقا الىپ كەتۋ، ەنى 70 شاقىرىم بولاتىن بۋفەر ايماعىن قۇرۋ، كەپىلگە الىنعانداردى «ءبارىن ءبارى ءۇشىن» سحەماسى بويىنشا الماسىپ، بوساتۋ قاراستىرىلدى. 18 - اقپان كۇنى پەتر پوروشەنكو ۋكراينا قارۋلى كۇشتەرىنىڭ نەگىزگى بولىگى شىعارىلعانىن مالىمدەدى.
