ءىلياس ەسەنبەرليننىڭ «كوشپەندىلەر» تريلوگياسى جىل كىتابى اتاندى

اتالعان شاراعا قاتىسقان ق ر ۇ ع ا اكادەميگى عاريفوللا ەسىم، جازۋشى، ق ر پارلامەنتى سەناتىنىڭ دەپۋتاتى جابال ەرعاليەۆ، مادەنيەت جانە سپورت مينيسترلىگى مادەنيەت جانە ونەر ىستەرى دەپارتامەنتىنىڭ باسقارما باسشىسى بازارباي التايەۆ، اقىن، ق ر جازۋشىلار وداعى استانا قالالىق فيليالىنىڭ ءتوراعاسى نەسىپبەك ايت ۇلى، فيلولوگيا عىلىمدارىنىڭ دوكتورى، پروفەسسور تۇرسىن جۇرتباي، «استانا اقشامى» گازەتى باس رەداكتورىنىڭ ءبىرىنشى ورىنباسارى تالعات باتىرحان جانە باسقا دا قوعام قايراتكەرلەرى مەن ەلىمىزدىڭ ءار وبلىسىنان كەلگەن كىتاپحانا ديرەكتورلارى ءبىراۋىزدان «كوشپەندىلەردى» تاڭداپ، داۋىس بەردى.

ايتا كەتەيىك، اكسيا اياسىندا ق ر ۇلتتىق اكادەميالىق كىتاپحاناسىنداعى، ق ر ۇلتتىق كىتاپحاناسىنداعى، وبلىستىق، اۋداندىق جانە اۋىلدىق كىتاپحانالارداعى، استانا قالاسىنداعى ورتالىقتاندىرىلعان كىتاپحانالار جۇيەسىندەگى، سونداي-اق، ەلورداداعى ءبىلىم بەرۋ مەكەمەلەرىندەگى داۋىس بەرۋ قورىتىندىسى بويىنشا 2015 - جىلعى تاڭداۋعا مىناداي كىتاپتار ۇسىنىلعان بولاتىن:

ءى. ەسەنبەرليننىڭ «كوشپەندىلەر» رومانى؛ ب. مومىش ۇلىنىڭ «ۇشقان ۇيا»، «موسكۆا ءۇشىن شايقاس» شىعارمالارى؛ قادىر مىرزا-ءاليدىڭ شىعارمالارى؛ مۇحتار ماعاۋيننىڭ «قازاق تاريحىنىڭ الىپپەسى»، «ءبىر اتانىڭ بالالارى»، «الاساپىران» تاريحي رومانى؛ جۇمەكەن ناجىمەدەنوۆتىڭ «اق شاعىل»، «داڭق پەن داقپىرت»، «كىشكەنتاي» شىعارمالارى؛ عابيت مۇسىرەپوۆتىڭ «قازاق سولداتى» رومانى؛ تۇمانباي مولداعاليەۆتىڭ «جۇرەكتەگى جازۋلار» ولەڭدەر جيناعى؛ ابايدىڭ ولەڭدەرى؛ قاسىم قايسەنوۆتىڭ «جاۋ تىلىنداعى بالا»، اڭگىمەسى؛ تولەن ابدىكتىڭ «تۇعىر مەن عۇمىر» حيكاياتى، «پاراسات مايدانى» پوۆەسى.

«بۇل تىزىمگە ابايدىڭ ولەڭدەرى بەلگىلى سەبەپتەرمەن كەيىنىرەك قوسىلدى. دەگەنمەن، ابايدى بىلمەيتىن قازاق جوق. سوندىقتان كوپشىلىكتىڭ تاڭداۋى ءى. ەسەنبەرليننىڭ «كوشپەندىلەرىنە» اۋىپ وتىر»، - دەپ ءتۇسىندىردى كوميسسيا ءتوراعاسى ع. ەسىم.

ەندى ءبىر جىل بويى اتالعان رومان ەلىمىزدىڭ بارلىق كىتاپحانالارى مەن مەكتەپتەرىندە دارىپتەلىپ، وقىرمان قاۋىمعا كەڭىنەن ناسيحاتتالاتىن بولادى.

اۆتور: ءابۋ-اسقار مەكەش ۇلى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى