اۋە جانە قوعامدىق كولىك بيلەتتەرىنىڭ قۇنى ارزانداماق

 ءمينيستردىڭ ءبىرىنشى ورىنباسارى جەڭىس قاسىمبەكتىڭ ايتۋىنشا، مۇناي، سايكەسىنشە بەنزين باعاسىنىڭ تومەندەۋى بۇعان نەگىز بولىپ تۇر.

 AirAstana اۋە كومپانياسى ىشكى رەيستەردىڭ قۇنىن ارزانداتتى. ەندى استانادان الماتىعا دەيىنگى بيلەت 1500 تەڭگەگە، ال استانا- شىمكەنت نەمەسە الماتى- اتىراۋ رەيستەرى 3000 تەڭگەگە ارزان تۇرادى. ەندى مينيسترلىك Scat پەن BekAir كومپانيالارى جانە اۆتوپاركتەرمەن بيلەت قۇنىن ارزانداتۋ تۋرالى كەلىسسوزدەر جۇرگىزۋدە. ال تەمىرجول بيلەتتەرىنىڭ باعاسى وزگەرمەيدى. ويتكەنى ت م د ەلدەرى اراسىندا بۇل تاسىمال ءتۇرىنىڭ وتاندىق تاريفتەرى ەڭ تومەن بولىپ سانالادى.

جەڭىس قاسىمبەك، ق ر ينۆەستيتسيالار جانە دامۋ ءمينيسترىنىڭ ءبىرىنشى ورىنباسارى:

 - ءبىز قالالىق جانە وبلىس ارالىق قوعامدىق كولىكتە ءجۇرۋ بيلەتتەرىنىڭ باعاسىن تومەندەتۋ بويىنشا ۇسىنىس جاسايمىز. سەبەبى بەنزيننىڭ باعاسى ارزاندادى. اۋە بيلەتتەرىنىڭ قۇنى 10 پايىزعا تومەندەيدى دەپ كۇتىلۋدە.

اقپاننان باستاپ استانا اۋەجايى شەت ەلدىك تاسىمالداۋشى كومپانيالار ءۇشىن، جاعارماي باعاسىن تونناسىنا 1000 دوللارعا ءتۇسىردى. بۇل جايىندا استانا ارناسىنا اۆياتسيا سالاسىنداعى مامان حابارلادى. بۇل اقپاراتتى استانا اۋەجايىنىڭ وكىلدەرى راستادى.

«استانا حالىقارالىق اۋەجايى» ا ق قوعاممەن بايلانىس ءبولىمىنىڭ جەتەكشىسى:

 «استانا اۋەجايى قاڭتاردا شەتەلدىك تاسىمالداۋشىلارعا 10 پايىز جەڭىلدىك جاساعان. اقپاننان باستاپ تاعى 10 پايىز ۇسىندى. ال قازاقستاندىق تاسىمالداۋشىلارعا 3 پايىز جەڭىلدىك قاراستىرىلعان».

 ەسكە سالايىق، جانارماي ارزانداعان سوڭ «ەير استانا» باس قالاعا قاتىنايتىن رەيستەردەگى بيلەت قۇنىن 25 پايىزعا ءتۇسىردى. بۇعان دەيىن حابارلاعانىمىزداي، مۇناي باعاسىنىڭ تومەندەۋىنە بايلانىستى «تۇرىك اۋەجەلىسى» قازاقستانعا ۇشۋ قۇنىن 11 پايىزعا تومەندەتكەن.

www.24.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى