ناۋرىز ايىندا استانادا كوز اۋرۋلارى قازاق عىلىمي- زەرتتەۋ ينستيتۋتى فيليالىنىڭ جاڭا عيماراتى اشىلادى

 كوز اۋرۋلارى قازاق عىلىمي- زەرتتەۋ ينستيتۋتى - 80 جىلدىق تاريحى بار ەلىمىزدىڭ باس وفتالمولوگيالىق ورتالىعى.

 ينستيتۋتتىڭ ەلورداداعى فيليالى 4 جىلدان بەرى سولتۇستىك قازاقستان، شىعىس قازاقستان، قاراعاندى، اقمولا، قوستاناي، اقتوبە، پاۆلودار وبلىستارى مەن استانا قالاسى تۇرعىندارىن تەگىن مەديتسينالىق كومەكتىڭ كەپىلدىك بەرىلگەن كولەمى شەڭبەرىندە جوعارى مامانداندىرىلعان وفتالمولوگيالىق كومەكپەن قامتاماسىز ەتۋدە. فيليال شالا تۋىلعان نارەستەلەردىڭ كوز اۋرۋلارىن ەمدەۋدە جانە سكرينينگ جۇرگىزۋدە قالالىق پەريناتالدىق ورتالىقپەن ىنتىماقتاسا جۇمىس ىستەيدى.

اۋدانى 3200 شارشى مەتر بولاتىن جاڭا عيماراتقا كوشۋ وفتالمولوگيالىق ەمدەۋ- دياگنوستيكالاۋ قىزمەتتەرىن كەڭەيتۋگە، سونداي- اق، شەل حيرۋرگياسى جانە كوز جانارىن تۇزەتۋ سياقتى سالالاردا ەڭ وزىق تەحنولوگيالاردى ەندىرۋگە مۇمكىندىك بەرەدى. استاناداعى فيليالعا 400 ميلليون تەڭگەنىڭ زاماناۋي قوندىرعىلارى ساتىپ الىندى.

كوز اۋرۋلارى قازاق عىلىمي- زەرتتەۋ ينستيتۋتى فيليالىنىڭ قۇرامىنا ەرەسەكتەر مەن بالالار ءبولىمى، كۇندىزگى ستاتسيونار، دياگنوستيكالىق- كونسۋلتاتيۆتىك ءبولىم، لازەرلىك ورتالىق، وفتالمولوگتاردى وقىتۋ زەرتحاناسى كىرەدى.

 دۇنيەجۇزىلىك دەنساۋلىق ساقتاۋ ۇيىمىنىڭ مالىمەتىنشە، الەمدە 285 ميلليون ادام كوز اۋرۋلارىنا شالدىققان، ولاردىڭ ىشىندە 39 ميلليون زاعيپ جان بار. قازاقستاندا كوز اۋرۋلارى بويىنشا 56 مىڭ مۇگەدەك تىركەلگەن.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى