الماتىداعى پەريناتالوگيا ورتالىعىنا شالا تۋىلعان بالالاردىڭ ءومىرىن ساقتاپ قالۋعا كومەك بەرەتىن قۇرال- جابدىق تابىستالدى- فوتو
قۇنى 18100000 تۇراتىن جاڭا جابدىقتار بولات وتەمۇراتوۆتىڭ «اسىل ميراس» جەكە قايىرىمدىلىق قورىنىڭ قارجىسىنا ساتىپ الىندى. سوڭعى تەحنولوگيامەن شىعارىلعان جاساندى تىنىس الۋ اپپاراتى، وتا ۇستەلى، رەانيموبيل بالا ءولىمى كورسەتكىشىن ازايتۋعا سەپتىگىن تيگىزەدى دەپ سانايدى ماماندار.
ورتالىق ديرەكتورىنىڭ كلينيكالىق جۇمىستار بويىنشا ورىنباسارى سۇلتانوۆا جاناتتىڭ ايتۋىنشا، مەكەمە جىل سايىن 7000 عا جۋىق ادامعا قىزمەت كورسەتەدى. ونىڭ ىشىندە جوعارى دەڭگەيدەگى قاۋىپ توبىنا جاتاتىن 3000 عا جۋىق ءسابي بار.
وسىدان 3-4 جىل بۇرىن اتالعان ورتالىقتاعى پەريناتالدى ءولىم كورسەتكىشى 22 پروميللە بولاتىن. قازىر ول كورسەتكىش 10-11 پروميللەگە جەتتى. بولاشاقتا جاڭا قۇرال- جابدىقتاردىڭ كومەگىمەن 6 پروميللەگە جەتكىزۋ جوسپاردا بار.
«جىلىنا قازاقستاندا 300 مىڭ ايەل بوسانسا، ولاردىڭ 10-12 پايىزى، ياعني 30 مىڭ بالا شالا تۋىلادى. كوپ جاعدايدا انالاردىڭ دەنساۋلىعىنا بايلانىستى ولاردىڭ جۇكتىلىگىن مەرزىمىنەن بۇرىن توقتاتۋعا تۋرا كەلەدى. سونىڭ سالدارىنان سالماعى 500, 700 گرام، 1 كەلى بولىپ تۋىلاتىن شاقالاقتاردى امان الىپ قالۋ ءۇشىن وسىنداي جابدىقتار كەرەك»، - دەدى جانات سۇلتانوۆا.
ونىڭ ايتۋىنشا، جاساندى تىنىس الۋ اپپاراتىنا جىلىنا 300 بالا قوسىلاتىن بولسا، جاڭا اپپارات جاساندى تىنىس الۋعا مۇقتاج بالالاردىڭ سانىن بىرنەشە ەسەگە ازايتۋعا كومەكتەسەدى. ورتالىقتا بۇعان دەيىن 4 وتا ۇستەلى بولعان، كۇنىنە ءارقايسىسىندا 5 وتا جاسالادى. جاڭادان اكەلىنگەن ۇستەل وتكىزىلەتىن وتالاردىڭ سانىن 2 مىڭعا جەتكىزۋگە سەپتىگىن تيگىزەدى.
رەانيموبيل قاجەتتى زاماناۋي العاشقى كومەك كورسەتۋ تەحنولوگياسىمەن جابدىقتالعان.
«اكۋشەرلىك، گينەكولوگيا جانە پەريناتولوگيا عىلىمي ورتالىعى - رەسپۋبليكامىزداعى جەتەكشى مەكەمە. ونىڭ ماماندارى بوساناتىن ايەلدەرگە كومەك كورسەتۋمەن، شالا تۋىلعان سابيلەردى كۇتۋمەن اينالىسادى. وسى جابدىقتى تاپسىرا وتىرىپ، جاڭا تەحنيكا ورتالىق قىزمەتكەرلەرىنىڭ اۋىر ەڭبەگىنە كومەك كورسەتىپ، سابيلەردىڭ ءومىرىن امان الىپ قالادى دەپ ۇمىتتەنەمىز»، - دەدى «اسىل ميراس» قايىرىمدىلىق قورىنىڭ ديرەكتورى مارات ايتماعامبەتوۆ.
اۆتور: گۇلميرا عوسمانالي
