ب. ساپاربايەۆ: اۋىلداردا كىتاپحانالار مەن كلۋبتار دۇرىس جۇمىس ىستەمەيدى
بۇل تۋرالى ق ر مادەنيەت جانە سپورت مينيسترلىگىنىڭ كەڭەيتىلگەن القا ماجىلىسىندە ق ر پرەمەر- ءمينيسترىنىڭ ورىنباسارى بەردىبەك ساپاربايەۆ ءمالىم ەتتى.
«حالقىمىزدىڭ جارتىسى اۋىلدا تۇرادى، ال بۇل ەلدى مەكەندەردە مادەنيەتتىڭ وشاعى - كىتاپحانا. ەلباسىنىڭ قولداۋىمەن، «جۇمىسپەن قامتۋ -2020» باعدارلاماسىنىڭ ارقاسىندا كوپتەگەن كىتاپحانالارىمىز، كلۋبتارىمىز جوندەلدى، قازىرگى كەزدە جۇمىس ىستەۋگە بارلىق مۇمكىنشىلىك بار. وكىنىشكە قاراي، شىنىن ايتۋ كەرەك، اسىرەسە اۋىلداردا سول كىتاپحانالار مەن كلۋبتار دۇرىس جۇمىس ىستەمەيدى»، - دەدى ب. ساپاربايەۆ.
وسى ورايدا ۆيسە- پرەمەر ەلدى مەكەندەردە مادەني ورىندار كوبىنەسە جابۋلى تۇراتىنىن سىنعا الدى.
«اكىمنىڭ ەسەبى جانە وسى تەكتەس جيىندار قارساڭىندا اشىلادى دا، ال قالعان كەزدە ەسىكتەرى قۇلىپتاۋلى. ەگەر اۋىلداردا كلۋب پەن كىتاپحانا جۇمىس ىستەمەسە، مادەنيەت قالاي داميدى؟ سوندىقتان مينيسترلىك جەرگىلىكتى بيلىك وكىلدەرىمەن بىرىگىپ، وسى كىتاپحانالار مەن كلۋبتاردىڭ تالاپقا ساي جۇمىس ىستەۋىنە نازار اۋدارۋى كەرەك»، - دەدى ۇكىمەت باسشىسىنىڭ ورىنباسارى.
