جاپپاي كوشىرىلىپ جاتقان جۇرت كالاچيمەن جىلاپ قوشتاسۋدا

اقمولا وبلىسىنداعى وسى اتىشۋلى اۋىلدان سوڭعى ءبىر ايدا 83 ادام قونىس اۋدارسا، تاعى بىرنەشە وتباسى كورشى قوستانايعا قاراي كەتەيىن دەپ بۋىنىپ-ءتۇيىنىپ وتىر.

ال ماماندار «اتى جوق اۋرۋدىڭ» اقىرى سەبەبىن انىقتاي العان جوق.

ءبىر انىعى ەستەن تاندىراتىن دەرت كوكتەم مەن كۇزدە دەندەيدى، دەپ حابارلايدى ك ت ك.

بۋىنىپ-ءتۇيىنىپ وتىرعان جۇرت قونىس اۋداراتىن جەرلەرىن الدىن الا كورىپ كەلگەن.

بارلىعى دا تۋعان كالاچيىن قيمايدى. بەلگىسىز دەرت قايتا قوزىپ كەتە مە دەگەن قورقىنىش قانا ولاردى وسى قادامعا يتەرمەلەگەن.

«كالاچيدا ءبىز 25-26 جىلدان بەرى تۇرامىز. بالالاردىڭ ءبارى وسىندا ءوستى. قيمايمىز. كوبى جىلاپ قوشتاسىپ كەتىپ جاتىر»، - دەيدى كالاچي اۋىلىنىڭ تۇرعىنى گۇلجان احمەتوۆا.

كالاچيدەن كوشپەيمىز دەپ تابانداپ وتىرعاندار دا بار. ولار شەنەۋنىكتەردىڭ وسى جۇمىستى ۇيىمداستىرۋداعى نەمقۇرايلىعىنا وكپەلى.

باسشىلارعا سەنبەگەندىكتەن، ءۇي-جايلارىن تاستاپ، ورە كوشۋگە جۇرەكسىنەدى.

«ەكى اۋدانعا بارىپ، ۇسىنعان ۇيلەردى قاراپ كەلدىم. جەكە مەنشىككە ەمەس، ۋاقىتشا تۇرۋعا دەيدى. مىناۋ كوشىرۋ ناۋقانى اياقتالعان سوڭ، ول ۇيدەن شىق دەسە قايتەم. بالا شاعاممەن دالادا قالام عوي. سوندىقتان كوشپەيمىن ازىرگە»، - دەيدى الەكسەي اندرەيەۆ.

ال ءدال قازىر 6 وتباسى دۇنيە-مۇلكىن ارتۋ ءۇشىن قوستانايدان جۇك كولىكتەرىن كۇتىپ وتىر. ولارعا كورشى وبلىستىڭ شارۋا قوجالىقتارى كومەك قولىن سوزىپتى.

«ەرتەڭ قوستاناي وبلىسىنىڭ قاراباتىر اۋىلىنا كوشۋگە ازىرلەنىپ جاتىرمىز. جۇمىس، پاتەر بەرەمىز دەدى. ول جاقتا ءتىپتى تۇيەقۇس وسىرەدى ەكەن. بارىنەن بۇرىن ورمانى بار. ءبىز ءۇشىن تازا اۋا قىمبات قازىر»، - دەدى تاعى ءبىر اۋىل تۇرعىنى دينا بۋسلوۆا.

سوڭعى كۇندەرى شىڭىلتىر ايازدان با ۇيقى اۋرۋى ءسال سايابىرسىعان. ال شەنەۋنىكتەر نە باسپانا، نە جۇمىسپەن قامتي الماسا دا، تۇرعىنداردى كالاچيدان كەتۋگە ۇگىتتەپ باعۋدا.

«وتكەن جىلى ناۋرىز تۋىسىمەن ادامدار جاپپاي ۇيقىعا كەتكەن. كۇن جىلىنسا، تاعى قايتالانۋى ابدەن مۇمكىن عوي. قازىر 80 وتباسى كوشۋدەن باس تارتىپ وتىر. ولارمەن جۇمىس جۇرگىزىپ جاتىرمىز»، - دەپ ءتۇسىندىردى ەسىل اۋدانى اكىمىنىڭ ورىنباسارى ساۋلە اعىنبايەۆا.

كوپتەگەن وتباسىلار باسقا جاققا قونىس اۋدارىپ جاتقاندىقتان، كالاچيدە وقۋشىلار سانى دا ازايعان. ءبىراق جەرگىلىكتى شەنەۋنىكتەر سوڭعى شاكىرت قالعانعا دەيىن مەكتەپتى جاپپايمىز دەپ سەندىردى.

BNews.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى