ن. نازاربايەۆ: ب ۇ ۇ- نىڭ بۇكىل الەم ءۇشىن قاجەتتى كەلىسىم-شارتتاردى ورىنداتۋعا ماجبۇرلەيتىن تەتىگى مەن كۇشى بولۋى ءتيىس
ءسوز اراسىندا ەلباسى الەمدەگى جاعداي ۆاليۋتالىق- قارجىلىق ارحيتەكتۋرانى قايتا قاراۋدى تالاپ ەتەتىنىن، بۇل ماسەلە قازاقستاندىق باستاما بولىپ تابىلاتىن «G-global» شەڭبەرىندە دە تالقىلانىپ جاتقانىن دا اتاپ ءوتتى. نۇرسۇلتان ءابىش ۇلى سونىمەن بىرگە، «G-global» شەڭبەرىندە بۇكىل الەمدىك داعدارىسقا قارسى جوسپاردى قابىلداۋ يدەياسى اۋقىمدى حالىقارالىق قولداۋعا يە بولعانىنا توقتالىپ، ونىڭ بىرىككەن ۇلتتار ۇيىمىنىڭ كوميتەتتەرىندە دە تالقىلانىپ جاتقانىن ايتتى.
«مىقتى الەم مەن جاھاندىق تۇراقتىلىق - حالىقارالىق قۇقىق نورمالارىن قاتاڭ ساقتاۋعا نەگىزدەلۋى ءتيىس. حالىقارالىق قاۋىمداستىقپەن قابىلدانعان نورمالار بۇزىلعان جاعدايدا، ءتيىمدى شارالار قابىلداۋ مەن ونى باقىلاۋ ماقساتىندا ب ۇ ۇ مەحانيزمىن نىعايتۋ اسا ماڭىزدى. يادرولىق قارۋدى تاراتپاۋ جانە قارۋسىزدانۋ تۋرالى حالىقارالىق كەلىسىم-شارت بار. الايدا، سولاي بولا تۇرا، بەلگىلى ءبىر مەملەكەتتەر بۇل كەدەرگىنى اتتاپ ءوتىپ، قارۋدى يەلەنۋشى بولىپ وتىر. بۇكىل الەم وسىنى قابىلداعانىمەن، قانداي دا ءبىر مەملەكەتتى حالىقارالىق كەلىسىمدى ورىنداۋعا ماجبۇرلەگەن ەشكىم بولعان جوق. ال يرانعا قاتىستى كەلسەك، بۇنداي قادام باسقاشا وربىگەن. ارينە، مۇنداي قادامدار بىزدەگى كەلىسىم-شارتتار ءۇشىن ەشقانداي ابىروي دا، سەنىم دە اپەرمەيدى»، - دەدى ن. نازاربايەۆ.
پرەزيدەنتتىڭ پايىمىنشا، ب ۇ ۇ- نىڭ مۇنداي بۇكىل الەم ءۇشىن قاجەتتى كەلىسىم-شارتتاردى ورىنداتۋعا ماجبۇرلەيتىن تەتىگى دە، كۇشى دە بولۋى ءتيىس. «ب ۇ ۇ- نىڭ 70 جىلدىق مەرەيتويى قارساڭىندا وسىنداي شەشىمدەر قابىلداۋ - ۋاقىت تالابى. تاپتاۋرىن ويلار، الەمدى اسەر ەتۋ نۇكتەسى ارقىلى ءبولۋ سەكىلدى كونەرگەن پىكىرلەر كەلمەسكە كەتۋى كەرەك دەپ ويلايمىز. قازاقستان ب ۇ ۇ قاۋىپسىزدىك كەڭەسىنىڭ 2017-2018-جىلدارداعى تۇراقتى ەمەس مۇشەلىگىنە ءوزىن ۇسىنعانىن بىلەسىزدەر. ءبىز ءوز تاراپىمىزدان بارشالارىڭىزدىڭ قولداۋلارىڭىزعا سەنەمىز. قازاقستان بۇكىل الەمگە ورتاق بەيبىتشىلىك ءۇشىن ءوز ۇلەسىن قوسۋعا ايانبايدى. ءبىز تەرروريزممەن كۇرەسكە، ەسىرتكى اعىنىنا قارسى كۇرەستە، ەنەرگەتيكالىق جانە ازىق-تۇلىكتىك قاۋىپسىزدىگىندە، سۋ-ەنەرگەتيكالىق ماسەلەلەردىڭ شەشىمىنە، سونداي-اق باسقا دا پروبلەمالارعا ءوز ۇلەسىمىزدى قوسۋعا نيەتتىمىز»، - دەدى ن. نازاربايەۆ.
اۆتور: قانات مامەتقازى ۇلى
