ەلىمىزدە اراعى جوق اۋىل بار
ءيا، تۇسىنەمىن، سەنبەۋىڭىز مۇمكىن.
ويتكەنى، قانىمىزعا «اراقسىز قوناق كۇتۋ، توي وتكىزۋ مۇمكىن ەمەس» دەگەن قاعيدا ابدەن ءسىڭىپ قالعان.
دەگەنمەن، نانۋىڭىزعا تۋرا كەلەدى، ىشىمدىك ىشىلمەيتىن اۋىل بار.
ءبىر ەمەس، ەكەۋ. ەڭ قىزىعى - ولار قازاقى قايماعى بۇزىلماعان دەگەن ايماقتاردا ەمەس، سولتۇستىك وڭىردە بولىپ شىقتى. تۇرعىندارى تۇگەل مولدا دا ەمەس، قاراپايىم مۇعالىم، مالشى، ەگىنشى، تراكتورشى...
سونىمەن، سايتان سۋعا «جوق» دەگەن بۇل اۋىل قايدا ەكەن؟ سولتۇستىك قازاقستان وبلىسى تايىنشا اۋدانى تەڭدىك اۋىلىندا اراق ىشىلمەيدى. ارنايى ساپارمەن ات باسىن بۇردىق. 115 تەي ءتۇتىنى بار ەكەن. اقساقالدارىمەن سويلەستىك.
ورىنباي اتامەن تىلدەسكەنىمىزدە: «اۋىلىمىزعا ىشىمدىك كىرمەگەلى 10 جىلدان استى» دەدى. تاڭعالىستىق. قۋاندىق. اللاعا شۇكىر ايتتىق. كوز جەتكىزۋ ءۇشىن دۇكەندەرىنە بارىپ كورىپ ەدىك، راسىمەن دە جوق ەكەن. ورىنباي اقساقال «مۇنداي جەتىستىككە جەتۋ جولىن» بىلاي ءتۇسىندىردى: «قاتەلەسپەسەم، 2003 - جىل بولۋى كەرەك، باس ءمۇفتي «ورازادا ىشىمدىك ساتۋدى توقتاتايىق» دەپ ۇندەۋ تاستاعان بولاتىن. ءبىز وعان ىسپەن جاۋاپ بەرۋدى ماقسات تۇتتىق. رامازاننان كەيىن اۋىل بولىپ اقىلداسىپ، ىشىمدىكتى ءبىرجولاتا دوعاراتىن بولىپ شەشتىك. سودان بەرى قانشاما توي ءوتتى!؟ ەشبىر ۇيدە ىشىمدىك ىشىلگەن جوق. ءوزىم دە ەكى بىردەي بالامدى ۇيلەندىردىم.
ورىنباي اقساقال ءبىر جاعادان باس، ءبىر قولدان جەڭ شىعارىپ، ءبىر اۋىز سوزگە توقتاي بىلگەن اۋىلداستارىنا ءدان ريزا.
بىلە ءجۇرىڭىز، كوكشەتاۋدان 100 شاقىرىمداي ارىدەگى مادەنيەت اۋىلىندا دا ىشىمدىك اۋىزعا الىنبايدى ەكەن. ولاردىڭ مۇنداي «مادەنيەتتىلىككە» قول جەتكىزۋى ەرىكسىز سۇيسىندىرەدى ءارى تاڭعالدىرادى. مادەنيەت اۋىلىندا تۋىپ-وسكەن ازامات وبلىسقا باس يمام بولادى.
ناقتىراق ايتساق، اقمولا وبلىسىنىڭ قازىرگى باس يمامى - قانات قىدىرمين. سودان مادەنيەتتىڭ حالقى اقىلداسا كەلىپ، «ءاي، ەرتەڭ جۇرت وبلىستىڭ باس يمامىنىڭ اۋىلى اراق ىشەدى ەكەن دەسە، نە دەيمىز؟ ۇيات بولادى عوي» دەپ ىشىمدىكتى توقتاتقان ەكەن. ويلاپ قاراساق، وبلىستاعى ءدىن سالاسىنىڭ تىزگىنىن ۇستاعان بالاسىنىڭ ابىرويىن ويلاپ، نامىسقا تىرىسىپ، اۋىلداستارى كۇنالى ىستەن باس تارتىپتى.
جىل سايىن الكوگولدى سۋسىنداردىڭ كەسىرىنەن قانشاما وتانداسىمىز و دۇنيەلىك بولادى. جان تۇرشىگەرلىك كۇنا جاسالادى، وتباسى شايقالىپ، جازىقسىز سابيلەردىڭ تاعدىرى بۇلىنەدى. قىسقاسى، قازاقتىڭ اراقتان تارتقان ازابى از ەمەس.
ءسوز سوڭىندا، اللا تاعالا اراعى جوق ەكى اۋىلدىڭ دا بەرەكەسىن ارتتىرسىن دەپ تىلەك ايتقىمىز كەلەدى. ولاردىڭ ەرلىك ءىسى ەلىمىزدىڭ باسقا اۋىلدارىنا ۇلگى، ونەگە بولعاي!
بەكارىس نۇريمان
«اسىل ارنا»
