سپورتتىق وسكار كىمگە بۇيىرادى؟

ءار جىلدىڭ قورىتىندىسى بويىنشا وسى سالاداعى ۇزدىكتەر انىقتالىپ، ولار ارنايى سىيلىققا يە بولادى. بۇل سىيلىق «سپورتتىق وسكار» دەپ اتالادى.

ونداي قۇرمەتكە بولەنۋ ءۇشىن «جۇزدەن جۇيرىك» شىعۋ از. بۇل سىيلىق تەك «مىڭنان تۇلپار» شىققاندارعا عانا بەرىلەدى. ءار جىلى «سپورتتىق وسكار» اتى اڭىزعا اينالعان ماماندار مەن كەرەمەت كورسەتكىشكە قول جەتكىزگەن سپورتشىلارعا تابىس ەتىلۋدە.

ايتۋلى شارا بيىل 15 - ساۋىردە قىتايدا وتەدى. قازىرگى كەزدە بارلىق ۇمىتكەردىڭ ەسىمى بەلگىلى. ماسەلەن، «جىلدىڭ ەڭ ۇزدىك سپورتشىسى» دەگەن اتاقتان فۋتبولشى كريشتيانۋ رونالدۋ، تەننيسشى نوۆاك دجوكوۆيچ، اۆتوجۇرگىزۋشى ليۋيس حەميلتون، سىرىقپەن سەكىرۋشى رەنو لاۆيللەني جانە موتوجۇرگىزۋشى مارك ماركەز سىندى ساڭلاقتار دامەلى. ولاردى جەكە- جەكە تانىستىرىپ جاتۋدىڭ ءوزى ارتىق. ويتكەنى بۇگىنگى تاڭدا بۇل ورەندەردىڭ ەسىمدەرىن ەڭبەكتەگەن بالادان باستاپ، ەڭكەيگەن قارتقا دەيىن بىلەدى.

ايەلدەر اراسىندا جەلاياق گەنزەبە ديبابا، يادرو لاقتىرۋشى ۆالەري ادامس، شاڭعىشى ماريت بورگەن، تاۋ شاڭعىشىسى تينا مازە جانە تەننيسشىلەر لي نا مەن سەرەنا ۋيليامستىڭ ءبىرى بيىل «سپورتتىق وسكاردى» يەلەنەدى.

«جىلدىڭ ەڭ ۇزدىك كومانداسى» اتانۋدان «رايدەر كاپ تيم» (گولف)، فۋتبولدان گەرمانيا قۇراماسى مەن مادريدتىڭ «رەالى»، «سان- انتونيو سپەرس» (باسكەتبول)، «مەرسەدەس» (فورمۋلا-1) جانە تەننيستەن شۆەيتساريا قۇراماسىنىڭ ءۇمىتى بار.

ال جاسىنداي جارق ەتكەن جاستار اراسىنان ماريو گەتتسە مەن حامەس رودريگەس (فۋتبول)، مارين چيليچ (تەننيس)، دانيەل ريككاردو (فورمۋلا-1)، ميكاەلا شيففرين (تاۋ شاڭعىسى) سىندى سايىپقىرانداردىڭ ەسىمدەرى ءجيى اتالۋدا.

سولاردىڭ اراسىنان تاڭداۋ كىمگە تۇسەتىنىن ءساۋىر ايىنىڭ بەل ورتاسىندا بىلەتىن بولامىز.

عالىم سۇلەيمەن

«ايقىن»

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى