مەملەكەتتىك ەلتاڭبا جاڭا ستاندارتقا ساي بولۋى ءتيىس

سوندىقتان ەلتاڭبا وسى تالاپتارعا ساي بولۋى ءتيىس. بۇل تۋرالى ورال قالاسىندا ق ر س ت 989-2008 «قازاقستان رەسپۋبليكاسىنىڭ مەملەكەتتىك ەلتاڭباسى. نىسانى، ولشەمدەرى جانە تەحنيكالىق تالاپتار» ۇلتتىق ستاندارتىن ناسيحاتتاۋ مەن قولدانۋ جونىندەگى دوڭگەلەك ۇستەل وتىرىسىنا قاتىسقان ق ر مەملەكەتتىك ەلتاڭباسىنىڭ اۆتورى جانداربەك مالىبەكوۆ ءمالىم ەتتى.

ونىڭ اتاپ وتكەنىندەي، تاۋەلسىزدىككە قولىمىز ەندى جەتكەن كەزەڭدە قازاق دەگەن ۇلت، قازاقستان دەگەن ەل بار ەكەندىگىن وزگە مەملەكەتتەردىڭ ءبىرى بىلسە، ءبىرى بىلمەيتىن ەدى. ەلباسىمىزدىڭ باستاۋىمەن قازاق ەلى قارقىندى دامىپ، جيىرما جىلداي ۋاقىت ىشىندە جالپاق الەمگە تانىلىپ، وراسان زور تابىستارعا قول جەتكىزدى.

سوندىقتان ەلتاڭبانىڭ دا وسكەلەڭ زامان تالاپتارىنا ساي بولعانى ابزال. «قازىرگى قولدانىلىپ جۇرگەن ەلتاڭبانىڭ، بىرىنشىدەن، 14 تۇستىك سيپاتى، مازمۇن سيپاتتاۋى ءار جەردە ءار ءتۇرلى. ال قازىرگى ستاندارت بويىنشا ونىڭ ءمانى، ساياسي مازمۇنى تولىق جازىلادى.

ەكىنشىدەن، دەتالداردىڭ اتاۋلارى جوق-تۇعىن. مەن 40 تان اسا اتاۋلار بەردىم. ءۇشىنشى ەرەكشەلىگى - 3D مودەلدەۋ دەگەن جاڭا كومپيۋتەرلىك باعدارلاما ارقىلى جاسالىنىپ شىعادى، ياعني بارلىق پارامەترلەرىن، جان- جاقتى ولشەمدەرىن ءدال شىعارىپ بەرەدى. ەلتاڭبا سول ستاندارتتارعا ساي بولۋ كەرەك»، - دەدى ج. مالىبەكوۆ.

وتىرىسقا قاتىسقان ءماجىلىس دەپۋتاتى باقىتبەك سماعۇل تاۋەلسىز ەلىمىزدە پرەزيدەنتتىڭ ساليقالى ساياساتى ارقاسىندا تىنىشتىق پەن تۇراقتىلىق ساقتالىپ وتىرعانىن، سونىڭ ايشىقتى بەلگىلەرىنىڭ ءبىرى ەلتاڭبانى قاستەرلەي وتىرىپ، جاستارعا پاتريوتتىق تاربيە بەرۋگە ۇلەس قوسۋ - ەلىم دەگەن ازاماتتاردىڭ ابىرويلى بورىشى ەكەندىگىن اتاپ ءوتتى.

وڭىرگە كەلگەن ساپارلارى بارىسىندا ج. مالىبەكوۆ پەن ب. سماعۇلدى وبلىس اكىمى نۇرلان نوعايەۆ قابىلدادى.

- اتا- بابامىز اڭساعان تاۋەلسىزدىگىمىزگە قول جەتكەن جىلدارى قابىلدانعان مەملەكەتتىك رامىزدەر قازىرگى تاڭدا وسكەلەڭ ۇرپاقتىڭ جالپى قازاقستاندىقتاردىڭ بولاشاققا سەنىمىن نىعايتىپ، تاۋەلسىزدىك رۋحىن اسقاقتاتۋعا ۇلكەن قىزمەت اتقارۋدا. ەلىمىزدىڭ ەلتاڭباسىن بەكىتۋگە تانىمال ساۋلەتشىلەر شوتا ءۋاليحانوۆ پەن جانداربەك مالىبەكوۆ زور ەڭبەك ءسىڭىردى. بۇگىنگى ەلتاڭبامىزدا حالقىمىزدىڭ تاريحى، بولمىسى مەن بولاشاعى شەبەر سۋرەتتەلگەن. سولاردىڭ ءبارىن قامتۋعا ۇشقىر قيال، وتكىر وي، ۇلكەن تاجىريبە قاجەت ەكەنى بەلگىلى. مەملەكەتتىك رامىزدەر ءار ەلدىڭ ءتولقۇجاتى ىسپەتتەس.

شەت مەملەكەتتەردە وتەتىن حالىقارالىق جيىنداردا نەمەسە سپورتشىلارىمىز جەڭىس تۇعىرىنا كوتەرىلىپ، كوك تۋىمىز جەلبىرەپ، ءانۇران شىرقالعاندا، جۇرەگى تەبىرەنبەيتىن جان جوق شىعار. تاۋەلسىز قازاقستان حالقىنىڭ ورتاق مۇرات- ماقساتىن، ارمان- تىلەگىن وتانىمىزدىڭ ەلتاڭباسى ارقىلى پاش ەتكەن ساۋلەتشىلەرگە ەل- جۇرتتىڭ العىسى شەكسىز، - دەدى اڭگىمە ۇستىندە وبلىس باسشىسى.

اۆتور: ەلجان ەرالى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى