قازاقستاندا كينوعا بولىنەتىن بيۋدجەت قاراجاتى قىسقارتىلادى
«داعدارىس جاعدايىنا بايلانىستى قازىر سوما قىسقارتىلىپ جاتىر، قانشاعا قىسقاراتىنىن ايتا المايمىن، سەبەبى بۇل ماسەلە قاراستىرىلىپ جاتىر. ءتىپتى بۇگىن تاڭەرتەڭ ءبىزدىڭ مينيستر قارجى مينيسترىمەن كەزدەستى. ياعني جۇمىس تارتىبىندە قانداي جوبالاردىڭ قاجەت ەكەنىن، قاي جوبالاردى ۋاقىتشا توقتاتا تۇرۋ كەرەك ەكەنىن دايىنداپ جاتىرمىز»، - دەدى تىلشىلەرگە ق ر مادەنيەت جانە سپورت مينيسترلىگىنىڭ مادەنيەت جانە ونەر ىستەرى جونىندەگى دەپارتامەنتىنىڭ ديرەكتورى اقتوتى رايىمقۇلوۆا ۆەدومستۆونىڭ كەڭەيتىلگەن القا ماجىلىسىنەن كەيىن.
ول كينوعا بولىنەتىن مەملەكەتتىك شىعىستاردىڭ قىسقارۋىنا بايلانىستى قازاقستان يدەولوگياسى ماسەلەسىندەگى ماڭىزدى كارتينالارعا نازار اۋدارىلاتىنىن اتاپ ءوتتى.
«ءبىز قازىر تەماتيكالىق جوسپاردى قايتا قاراۋ ۇستىندە يدەولوگيالىق نەگىزى بار، يدەولەوگيالىق ناسيحاتتى جۇرگىزەتىن كينوفيلمدەرگە باستى نازار اۋدارىلادى. مەنىڭشە، بۇل رەسپۋبليكاداعى كينوونىمنىڭ تاقىرىپتىڭ اياسىن تار ەتپەيدى، سەبەبى، سىزدەر بىلەسىزدەر، فيلم تۇسىرەتىن جەكە كومپانيالار كوپ»، - دەپ حابارلادى رايىمقۇلوۆا.
وسىعان بايلانىستى قازاقستاندىق كەيبىر سەناريستەر مەملەكەتتىك قارجىنى ۋاقىتشا ۇنەمدەۋدىڭ مۇمكىندىگىن قولدانىپ، سەناريلەرىن اياقتاۋدى ۇسىندى. دەپارتامەنت ديرەكتورىنىڭ ايتۋىنشا، كينوجوبالاردىڭ ءبىر بولشەگىن كەلەسى جىلعا قالدىرۋعا بولادى.
«وتە قىزىقتى تاقىرىپتار، سەناريلەر بولادى، ءبىراق كاسىبي تۇرعىدان قاراعاندا ولار اياقتالماعان، ونى ءپىسىرىپ، تاقىرىبىن اشا تۇسۋگە، كەي تۇسىن ءتۇرلى جاقتاردان قىزىعىراق ەتۋگە ۋاقىت كەرەك. سوندىقتان ءبىز سەناريستەر مەن كينو ءتۇسىرۋشى توپتارعا بۇل ۋاقىتتى ماتەريالدى اياقتاۋعا ارناۋمەن اينالىسۋىن ۇسىنامىز. ال نەگىزىندە، قىزىقتى سەناريلەر ءبىزدىڭ ۇلكەن مەرەكەلەرىمىزدىڭ اياسىندا بولماسا دا قولداۋىمىزعا يە بولىپ جاتىر»، - دەدى ول. سونىمەن قاتار، ونىڭ ايتۋىنشا، بۇگىندە كينودا يدەيالىق توقىراۋ جوق.
«بىزدە سەناريلەر وتە كوپ! قىزىقتى تاقىرىپتار دا كوپ!»، - دەيدى ول، ءبىراق ونىڭ ايتۋىنشا، ولاردىڭ جارتىسى كاسىبي تۇرعىدان ءپىسىپ-جەتىلمەگەن، ال تاعى ءبىر بولىگى كاسىبي تۇرعىدان ساپالى جاسالعان، ءبىراق ولاردىڭ تەماتيكاسى مەملەكەتتىڭ ەسەبىنەن تۇسىرىلەتىن فيلمدەرگە سايكەس ەمەس.
وتكەن جىلى قازاقستاندا 51 فيلم ءتۇسىرىلدى. ولاردىڭ 13 ى - كوركەم فيلم، 16 سى - دەرەكتى فيلم جانە بىرەۋى - انيماتسيالىق فيلم. قازىرگى ۋاقىتتا ق ر مادەنيەت جانە سپورت مينيسترلىگى قازاق حاندىعىنىڭ 550 جىلدىعى اياسىنداعى جوبالاردى، ناقتىراق ايتساق، 10 سەرياسى بار كوركەم فيلمدى، دەرەكتى فيلمدەر سيكلى جانە كوپسەريالى انيماتسيالىق فيلمىن ءتۇسىرىپ جاتىر.
