ب. ساپاربايەۆ: مادەنيەتىمىزدى شەتەلدە ناسيحاتتاۋدى دەمەۋشىلەر ارقىلى ىسكە اسىرۋ قاجەت

مينيسترلىكتىڭ جينالىسىندا وتكەن جىلدىڭ جۇمىس قورىتىندىلارى مەن سالانىڭ 2015 - جىلعا ارنالعان دامۋ پەرسپەكتيۆالارى قارالدى. القا ماجىلىسىندە پرەمەر-ءمينيستردىڭ ورىنباسارى ب. ساپاربايەۆ مادەنيەت جانە سپورت سالاسىنىڭ وزەكتى ماسەلەلەرىن كوتەردى، دەپ حابارلايدى BNews.kz ءتىلشىسى.

«قازىرگى تاڭدا اۋىلداردىڭ بارلىعىندا دەرلىك كىتاپحانالار مەن كلۋبتار بار. الايدا، ولاردىڭ كوبى ويداعىداي جۇمىس اتقارمايدى. كوپتەگەن كلۋبتار وزدەرىنىڭ ەسىكتەرىن جەرگىلىكتى اكىمنىڭ تۇرعىندارمەن ەسەپتىك كەزدەسۋى وتكەندە عانا اشادى. بۇل بەلگىلى جاعداي.

قازاقستان بويىنشا كىتاپحانالاردىڭ سانى 4131 دى قۇرايدى، ولاردىڭ 24 پايىزى عانا كومپيۋتەرمەن قامتاماسىز ەتىلگەن. كوپتەگەن كىتاپحانالاردىڭ قورلارى ەسكىرگەن. استانادا ەلباسىنىڭ جەكە كىتاپحاناسى اشىلدى. مىرزاتاي جولداسبەكوۆ تە ءوزىنىڭ جەكە كىتاپحاناسىن اشتى. وسىنداي يگىلىكتى ىستەردى بارلىق ايماقتاردا جالعاستىرۋ قاجەت.

ەلىمىزدە 200 دەن استام مۇراجاي بار. ولاردىڭ قورىندا 2 ميلليون ەكسپونات. كوپتەگەن مۇراجايلار «كەشەگى كۇنمەن» ءومىر ءسۇرىپ كەلە جاتىر. استانا قالاسىنداعى ۇلتتىق اكادەميالىق كىتاپحانانىڭ جانە شىعىس قازاقستان وبلىسى مۇراجايىنىڭ جۇمىس تاجىريبەسىن ۇلگى تۇرىندە ناسيحاتتاۋ كەرەك» - دەدى ۆيتسە-پرەمەر.

رەپەرتۋارلىق ساياسات تۋرالى ايتا كەلە، ب. ساپاربايەۆ رەسپۋبليكالىق بيۋدجەتتەن وتاندىق فيلمدى ءوندىرۋ ءۇشىن 2014 -جىلى 4 ميللياردتان استام قارجى بولىنگەن، الايدا وتاندىق فيلمدەر باسەكەگە قابىلەتتى بولماي وتىر. انيماتسيالىق فيلمدەردى شىعارۋدا دا پروبلەمالار بار. جاڭا شىعارمالار جازۋ ءۇشىن «تاۋەلسىزدىك تولعاۋى» كونكۋرسى اياسىندا بيۋدجەتتەن 45-50 ميلليون تەڭگە بولىنەدى. الايدا، سول كونكۋرستان جەڭىپ شىققان شىعارمالاردى ساحنالاردان كورمەيمىز، نە ەستىمەيمىز.

ەركەعالي راحماديەۆتىڭ جازىلعان «ابىلاي حان» وپەراسىنا 11 جىل بولعان. ال، بازارباي جۇمانيازوۆتىڭ «ماحامبەت» وپەراسى 1987 - جىلى قويىلعان. سودان بەرى ونەر وشاقتارىنىڭ رەپەرتۋارلارىندا وتاندىق جاڭا وپەرا قويىلعان ەمەس»، - دەپ اتاپ ءوتتى.

ۆيتسە- پرەمەر دەمەۋشىلەرمەن جۇمىس ىستەۋ قاجەتتىلىگىن تىلگە تيەك قىلدى، ول «قازاقستاننىڭ مادەنيەتىن شەت ەلدەردە ناسيحاتتاۋدى دەمەۋشىلەردىڭ ەسەبىنەن ىسكە اسىرۋ قاجەت. مىسالعا، مەسەنات مەدعات قۇلجانوۆتىڭ قاراجاتىنا ونىڭ جەكە تاپسىرۋى بويىنشا اعىلشىن كومپوزيتورىمەن «شاكارىم» سيمفونياسى جازىلىپ، تۇساۋكەسەرى لوندوندا ءوتتى. وسىنداي فاكتىلەر بارشىلىق» ەكەنىن اتاپ ءوتتى.

ءماجىلىس بارىسىندا ب. ساپاربايەۆ مەملەكەتتىك ورگاندار مەن ۇكىمەتتىك ەمەس ۇيىمداردىڭ بىرلەسىپ اتقارىپ جاتقان جۇمىستارىن ايتىپ، وتاندىق سپورتتىڭ دامۋ ماسەلەسىن كوتەردى.

ءسوز سوڭىندا ۇكىمەت باسشىسىنىڭ ورىنباسارى: «ەلباسىنىڭ باستى تاپسىرمالارىنىڭ ءبىرى -  ەلىمىزدەگى ۇلتارالىق تاتۋلىق پەن حالىق اراسىنداعى ساياسي تۇراقتىلىقتى ساقتاۋ، ول بىردەن- ءبىر مىنا سىزدەر مەن بىزدەرگە بايلانىستى»، - دەپ اتاپ ءوتتى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى