قىتاي قازاقستانمەن ۆيزاسىز رەجيمگە مەيلىنشە مۇددەلى- ق ر سىرتقى ىستەر ءمينيسترى ەرلان ىدىرىسوۆ

 بۇگىن پارلامەنت ماجىلىسىندەگى ۇكىمەت ساعاتىندا ق ر سىرتقى ىستەر ءمينيسترى ەرلان ىدىرىسوۆ وسىلاي مالىمدەدى.

«ءبىز ۆيزاسىز رەجيم بويىنشا 10 مەملەكەتكە دەيىن پيلوتتى جوبانى جۇزەگە اسىرامىز. قازىر بۇنى كەڭەيتۋگە بولا ما، بولماي ما سونى تالقىلاپ جاتىرمىز. ال 10 مەملەكەتتىڭ قۇرامىندا ا ق ش، ۇلى بريتانيا، گەرمانيا، فرانسيا، بىرىككەن اراب امىرلىكتەرى، مالايزيا، جاپونيا مەن وڭتۇستىك كورەيا سەكىلدى ەلدەر بار»، - دەدى ە. ىدىرىسوۆ.

جالپى قازاقستان  الەمنىڭ 60 تان استام مەملەكەتىمەن ارادا ۆيزاسىز قارىم- قاتىناس ورناتقان.

ءمينيستردىڭ سوزىنە قاراعاندا، كوپتەگەن ەلدەر قازاقستانمەن ارادا ۆيزاسىز قارىم- قاتىناس ورناتۋعا بارىنشا قىزىعۋشىلىق تانىتقان. ءتىپتى، بۇل اڭگىمە بارىسىندا ەلدەردىڭ ۇزىن- سونار كەزەگى دە قالىپتاسىپ قالعان كورىنەدى.

ال سولاردىڭ اراسىندا ەڭ ءبىرىنشى كەزەكتە قىتاي قازاقستانمەن ۆيزاسىز رەجيمگە مەيلىنشە مۇددەلى ەكەنىن تانىتقان.

«قىتاي «ءبىز قازاقستاندا ەڭ ۇلكەن ينۆەستورمىز، بىزگە ۆيزاسىز رەجيم ورناتىڭىزدار» دەگەندى العا تارتادى. البەتتە، بۇعان ءبىز بارعىمىز كەلمەيدى، ونى ءتۇسىندىرىپ جاتۋدىڭ قاجەتى دە جوق شىعار. دەگەنمەن، قىتاي حالقىنىڭ 1.5 ميللياردقا جۋىق ەكەنىن دە ەسكە سالايىق»، - دەيدى ە. ىدىرىسوۆ.

سونىمەن قاتار، سىرتقى ساياسات ۆەدومستۆوسىنىڭ باسشىسى كەلەشەكتە ۆيزا بەرۋ رەجيمى ەلەكتروندى تۇرگە الماستىرىلۋى مۇمكىن ەكەنىن جەتكىزدى.

اۆتور: قانات مامەتقازى ۇلى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى