جوعارى سىنىپقا ارنالعان وقۋ ماتەريالدارىنىڭ مازمۇنى جاڭارتىلادى - ا. ءسارىنجىپوۆ
بۇل تۋرالى بۇگىن ق ر پرەزيدەنتى جانىنداعى ورتالىق كوممۋنيكاتسيالار قىزمەتىندەگى بريفينگتە ق ر ءبىلىم جانە عىلىم ءمينيسترى اسلان ءسارىنجىپوۆ ايتتى.
«سىرتقى فاكتورلاردى ەسكەرە وتىرىپ، بىزگە 12 جىلدىق ءبىلىم بەرۋگە كوشۋدى كەشەۋىلدەتۋدى ۇسىنعان ەدى. دەگەنمەن، وزدەرىڭىز بىلەتىندەي، ۇكىمەتتىڭ كەڭەيتىلگەن وتىرىسىندا مەملەكەت باسشىسى ناقتى ءارى ايقىن مىندەت جۇكتەدى: سىرتقى فاكتورلار اسەرى مەن بيۋدجەتتىڭ وڭتايلاندىرىلۋىنا قاراماستان ءبىلىم بەرۋدى جاڭعىرتۋ باعدارلاماسىن جالعاستىرۋ قاجەت. ءبىز ءوزىمىزدىڭ ورتا ءبىلىم بەرۋ جۇيەمىزدىڭ الەمدىك ستاندارتتارعا ساي بولۋىنا ۇمتىلۋىمىز كەرەك»، - دەدى مينيستر.
ونىڭ ايتۋىنشا، مينيسترلىك دايىندىق سىنىپتارىن ەسكەرە وتىرىپ، 12 جىلدىق ءبىلىم بەرۋ جۇيەسىن ۇسىنىپ وتىر. ويتكەنى، بۇگىنگى تاڭدا 6 جاسقا تولعان بالالاردىڭ شامامەن 95 پايىزى دايىندىق سىنىپتارىنا بارۋدا. سوندىقتان دا ءبىلىم بەرۋ باعدارلاماسىنىڭ مازمۇنى اتالعان جايتتى ەسكەرە وتىرىپ جاڭعىرتىلاتىن بولادى.
«وسىلايشا ءبىز قازىرگى ۋاقىتتا جاڭا ستاندارتتارمەن، جاڭا وقۋ باعدارلامالارىمەن جۇمىس ىستەۋدەمىز. جىل سوڭىنا دەيىن ول جۇمىستار جالعاساتىن بولادى. وقۋشىلارعا قاجەتتى داعدىنى ءبىز باستاۋىش جانە نەگىزگى مەكتەپ اياسىندا بەرەتىن بولامىز. ال ەكى جوعارى سىنىپ ءۇشىن وقۋ ماتەريالدارىنىڭ مازمۇنى جاڭارتىلادى جانە اكادەميالىق داعدى ۇسىنۋ ارقىلى بەيىندى وقىتۋعا باعىتتالادى»، - دەدى ول.
اۆتور: مارلان جيەمباي
