قازاقستان حالقى اسسامبلەياسىنىڭ كەزەكتەن تىس پرەزيدەنتتىك سايلاۋ وتكىزۋ ۇسىنىسىنا كوپتەگەن ازاماتتاردان ءتۇسىپ جاتقان حاتتار نەگىز بولدى - ب. بايبەك

بۇل تۋرالى بۇگىن ق ر پرەزيدەنتى جانىنداعى ورتالىق كوممۋنيكاتسيالار قىزمەتىندەگى بريفينگتە «نۇر وتان» پارتياسى ءتوراعاسىنىڭ ءبىرىنشى ورىنباسارى باۋىرجان بايبەك ءمالىم ەتتى.

«كۇنى كەشە قازاقستان حالقى اسسامبلەياسىنىڭ كەڭەسى ەلىمىزدە بيىلعى جىلى كەزەكتەن تىس پرەزيدەنتتىك سايلاۋ وتكىزۋ جونىندە ۇسىنىس كوتەرىپ، حالىقتى، ساياسي پارتيالار مەن قوعامدىق ۇيىمداردى وسى باستامانى قولداۋعا شاقىردى. سودان بەرى قوعامدا قىزۋ تالقىلاۋ ءجۇرىپ جاتىر. وسى تاريحي ماسەلەگە بايلانىستى بۇگىن تاڭەرتەڭ پارتيا ساياسي كەڭەسى بيۋروسىنىڭ ارنايى وتىرىسى ءوتتى»، دەدى ول.

 ونىڭ اتاپ وتۋىنشە، «نۇر وتاننىڭ» جارعىسىنا سايكەس پارتيانىڭ باسشى ورگانى بولىپ تابىلاتىن ساياسي كەڭەس بيۋروسى قوعامدىق قاتىناستار بويىنشا پارتيا ۇستانىمىن ءبىلدىرىپ، قاجەتتى مالىمدەمەلەر جاسايدى.

 «قازاقستان حالقى اسسامبلەياسىنىڭ ۇسىنىسىنا كوپتەگەن ازاماتتاردان ءتۇسىپ جاتقان حاتتار نەگىز بولسا، «نۇر وتان» پارتياسىنا دا ازاماتتارىمىزدىڭ وي- پىكىرى، ەلىمىزدىڭ تۇپكىر- تۇپكىرىندە ورنالاسقان قوعامدىق قابىلداۋ بولمەلەرى ارقىلى جەتۋدە. سوندىقتان دا كوپشىلىكتى تولعاندىرىپ وتىرعان وسى ماسەلە بويىنشا قاتارىندا 850 مىڭنان استام مۇشە- ازاماتتارى بار بيلىكتەگى «نۇر وتان» پارتياسى ەل مۇددەسىمەن ۇيلەسەتىن شەشىم قابىلدادى دەپ ويلايمىن»، دەدى ب. بايبەك.

 اۆتور: مارلان جيەمباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى