دۇنيەجۇزىلىك ساۋدا ۇيىمىنا كىرۋ قازاقستان سىرتقى ەكونوميكالىق قاتىناستارىنىڭ تەڭگەرىمدىلىگىنە اسەر ەتەدى - س ءى م

«ەۋرازيالىق وداق اياسىندا ارەكەت ەتە وتىرىپ، قازاقستان ءبىر عانا جوبا اياسىندا شەكتەلىپ، جابىلىپ قالمايدى. ءبىز ءتۇرلى باعىتتار بويىنشا جۇمىس ىستەۋدەمىز، بۇعان بىلتىرعى جىلى جەمىستى اياقتالعان ەۋروپالىق وداقپەن اراداعى ارىپتەستىك پەن ىنتىماقتاستىقتى كەڭەيتۋ تۋرالى جاڭا كەلىسىم جونىندەگى كەلىسسوزدەردى، سونداي- اق دۇنيەجۇزىلىك ساۋدا ۇيىمىنا قازاقستاننىڭ ەنۋى تۇرعىسىنداعى كەلىسسوزدەردىڭ تابىستى بولۋىن ايتساق تا جەتكىلىكتى. ءبىز وسى ەكى ۇدەرىستىڭ دە اعىمداعى جىلى تولىق اياقتالاتىنىنا سەنەمىز»، دەدى سىرتقى ىستەر ءمينيسترى.

ە. ىدىرىسوۆتىڭ سوزىنە قاراعاندا، اعىمداعى جىلدىڭ 20 - قاڭتارىندا ەۋروپالىق وداق پەن ىنتىماقتاستىق جانە ارىپتەستىك تۋرالى كەلىسىم ءماتىنى پارافيرلەنگەن. وسىعان وراي، سىرتقى ساياسات باسشىسى كۇردەلى بيۋروكراتتىق ۇدەرىستەرگە قاراماستان ەۋروپالىق وداقتىڭ 28 مۇشە- مەملەكەتىمەن كەلىسسوزدەر اياقتالعانىن، ەندى وسى كەلىسىمگە قول قويىلىپ، ونىمەن ناقتى جۇمىستار اتقارۋ ماسەلەلەرى عانا قالعانىن العا تارتتى.

 «د س ۇ ۇلكەن ساياسي مانگە يە، ويتكەنى مۇندا ەكونوميكالىق قانا ەمەس، ساياسي ماسەلەلەر دە بارشىلىق. سوندىقتان دا بۇل ۇيىم قازاقستاننىڭ عالامدىق ەكونوميكالىق قاتىناستارىنىڭ تەڭگەرىمدىگىن قامتاماسىز ەتەدى. د س ۇ ارقىلى ءبىزدىڭ ەلىمىز جاھاندىق ساۋدانىڭ بىرلەسكەن جۇيەسىنە، تەحنيكالىق ستاندارتتارعا قول جەتكىزەدى. الەمدىك، حالىقارالىق مويىندالعان ساۋدا نورمالارى مەن ەرەجەلەرى قازاقستاننىڭ باسقا ەلدەرمەن ساۋدا- ساتتىعى بارىسىندا دا قولدانىلاتىن بولادى»، دەدى سىرتقى ساياسات ۆەدومستۆوسىنىڭ باسشىسى.

اۆتور: قانات مامەتقازى ۇلى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى