اۋعان سوعىسىنىڭ ارداگەرى، اقىن، ءماجىلىس دەپۋتاتى ب. سماعۇل ورالدا وقىرماندارىمەن كەزدەستى - فوتو

شارا بارىسىندا ب. سماعۇلدىڭ «قازاقتىڭ «قارا مايورى»، «وق پەن وتان» اتتى كىتاپتارىنىڭ تانىستىرىلىمى بولدى. اۆتور ءوز ولەڭدەرىن وقىپ، وقىرماندارىمەن سىرلاستى، ساۋالدارىنا جاۋاپ بەردى.

جيىندا ءسوز العان وبلىس اكىمىنىڭ ورىنباسارى باقتيار ماكەن اۋعان سوعىسىنىڭ ەل جادىنان ماڭگى وشپەيتىنىنە، ارداگەرلەرگە قامقورلىق كورسەتىلە بەرەتىنىنە توقتالدى.

باتىس قازاقستاندىق عالىم، تاريح عىلىمدارىنىڭ كانديداتى جاڭابەك جاقسىعاليەۆتىڭ اتاپ وتكەنىندەي، سول كەزدەگى ك س ر و باسشىلارىنىڭ اسىعىس شەشىمىمەن 1979 - جىلعى 25 - جەلتوقساندا كەڭەس اسكەرلەرى اۋعانستانعا كىرگىزىلدى. سودان ناتو مەن ۆارشاۆا اسكەري بلوكتارىنىڭ زاماناۋي قارۋ-جاراقتارى سىنالىپ، تالايدىڭ باسىن جۇتقان سوعىس تۋرا ون جىلعا سوزىلىپ، 1989 - جىلى 15 - اقپاندا كەڭەس جاۋىنگەرلەرى ەلگە قايتتى.

وعان 620 مىڭداي سارباز قاتىسسا، سونىڭ ىشىندە 22269 ى قازاقستاننان باردى. سونىڭ 924 ى مايدان دالاسىندا قازا تاۋىپ، 1015 ى مۇگەدەك بولىپ ورالدى. 21 ى ءىز-ءتۇسسىز كەتتى. 2205 جاۋىنگەر وردەن، مەدالدارمەن ماراپاتتالدى. قازىرگى تاڭدا ەلىمىزدە 18300 دەي اۋعان سوعىسىنىڭ ارداگەرى بولسا، سونىڭ 3 مىڭدايى - مۇگەدەك. تالاي شاڭىراققا سوعىس سالعان اۋىر جاراقات جازىلماق ەمەس.

كەزدەسۋگە ستۋدەنتتەر مەن جاس جاۋىنگەرلەر كوپتەپ قاتىسىپ، اقىن جىرلارىن، عيبراتتى اڭگىمە تىڭداپ، كوكىرەكتەرىنە وي ءتۇيدى.

اۆتور: ەلجان ەرالى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى