الماتىدا موتوجارىستان ءوتىپ جاتقان الەم چەمپيوناتىنىڭ العاشقى كۇنگى جۇلدەگەرلەرى انىقتالدى

ونىڭ الدىندا چەمپيوناتتىڭ سالتاناتتى اشىلۋ ءراسىمى ءوتتى. وندا الماتى قالاسى اكىمىنىڭ ورىنباسارى يۋريي يلين قالا تۇرعىندارى مەن قوناقتارىن جارىستى تاماشالاۋعا جينالعاندارىنا ريزاشىلىعىن ءبىلدىرىپ، سپورتشىلارعا ساتتىلىك تىلەدى.

«الماتى قالاسىندا بۇل سپورت ءتۇرى بويىنشا جارىس سوڭعى رەت بۇدان 23 جىل بۇرىن وتكىزىلگەن ەكەن. ەندى وسى مەرەيتويلىق الەم بىرىنشىلىگىنىڭ تاعى دا وسى «مەدەۋ» مۇز ايدىنىندا ۇيىمداستىرىلۋى جانە وعان قازاقستاندىق سپورتشىلاردىڭ قاتىسۋى بۇدان كەيىن قالامىزدا جانە بۇكىل رەسپۋبليكامىزدا سپيدۆەيدىڭ دامۋىنا ىقپال ەتەدى دەگەن ۇمىتتەمىن.

ءبىز 2022 - جىلعى قىسقى وليمپيادا ويىندارىن الماتى قالاسىندا وتكىزۋگە كۇش سالىپ جاتقانىمىزدى بىلەسىزدەر. ويتكەنى الماتى - سپورتتىق قالا. ءبىز مۇنى ماقتان تۇتامىز»، - دەدى يۋ. يلين.

ال موتوجارىستار پروجەكتورلاردىڭ جارىعىمەن ءوتتى. تريبۋنالارعا حالىق لىق تولدى دەسە دە بولادى. كورەرمەندەردىڭ كۇتكەنىندەي، مۇز ايدىنىنداعى جارىس شيەلەنىسكە تولى بولدى. ەكىنشى اينالىمدا-اق ساعاتىنا 100 شاقىرىم جىلدامدىقتا كەلە جاتقان سپورتشىلار - اۆستريالىق فرانس تسورن مەن حارالد سيمون ءبىر-بىرىمەن سوقتىعىسىپ قالدى. ولاردىڭ ارتىنان كەلە جاتقان گەرمانيالىق حانس ۆەبەر سپورتشىلاردى باسىپ كەتپەس ءۇشىن قورشاۋعا بارىپ سوعىلدى.

قىسقاسى، مۇنداي جاعدايلار ءار اينالىمدا ورىن الىپ جاتتى. وكىنىشكە قاراي قازاقستاندىق ۆلاديمير چەبلاكوۆ تا سوقتىعىسقا ۇشىرادى.

سونىمەن، جارتىلاي فينالعا بەس رەسەيلىك، ەكى اۆستريالىق جانە ءبىر شۆەتسيالىق سپورتشى شىقتى.

ال اقتىق سىندا رەسەيلىك دميتريي كولتاكوۆ العاشقى كۇننىڭ جەڭىمپازى اتاندى. ەكىنشى ورىندا اۆستريالىق موتوسپورتشى فرانس تسورن، ال ءۇشىنشى ورىندى رەسەيلىك دميتري حوميتسيەۆيچ يەلەندى.

ايتا كەتەلىك، اتالمىش الەم بىرىنشىلىگىنە الەمنىڭ التى ەلى - شۆەتسيا، اۆستريا، گەرمانيا، رەسەي، چەحيا جانە قازاقستاننان بارلىعى 18 سپورتشى قاتىسۋدا.

بۇگىن كۇندىزگى ساعات 12:30 دا چەمپيوناتتىڭ سوڭعى جارىستارى باستالدى.

اۆتور: جاپپاربەرگەن ايبوتا

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى